Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN NO. 1 2016

 TOPIKO ITI AKKUB | MAPAGTALKANKA KADI?

Kinamapagtalkan—Importante Pay Kadi?

Kinamapagtalkan—Importante Pay Kadi?

Nagtrabaho ni Hitoshi iti accounting office ti maysa nga ahensia idiay Japan. Bayat nga ad-adalenda ken boss-na ti maysa a report maipapan iti kuarta, imbaga kenkuana ti boss-na a masapul a “doktorenna” ti report. Inlawlawag ni Hitoshi a saan nga ipalubos ti konsiensiana nga aramiden dayta a panagulbod. Kas resultana, imbaga ti boss-na a masesante isuna, ket talaga a kasta ti napasamak.

Kalpasan ti mano a bulan, naupay ni Hitoshi iti panagbirokna iti trabaho. Kas pagarigan, idi nainterbiu iti maysa a trabaho, imbaga ni Hitoshi a dina kayat ti agulbod iti trabahona. Insungbat ti nanginterbiu, “Sabsabali ti panagpampanunotmo!” Pinatibker dagiti kapamilia ken gagayyem ni Hitoshi ti determinasionna nga agbalin a napudno, ngem nagduadua. Kinunana, “Pinampanunotko no pagsayaatak met laeng ti panagbalinko a napudno gapu iti pammatik.”

Ipakita ti kapadasan ni Hitoshi a saan nga ipatpateg ti amin ti panagbalin a mapagpiaran. Kinaagpaysuanna, ibilang pay ti dadduma a padagsen laeng dayta, nangruna iti panagnegosio. “Napalawlawanak kadagiti suitik a tattao,” kuna ti maysa a babai nga agtrabtrabaho idiay South Africa, “isu a no dadduma, kasla mapilitanak a mangtulad kadakuada.”

Ti maysa a kita ti di kinamapagpiaran ket ti panagulbod, a normalen ita. Tawtawenen ti napalabas, iti panagadal ti maysa a psychologist ti University of Massachusetts Amherst a ni Robert S. Feldman, nakitana nga 60% kadagiti adulto ti agulbod iti maminsan iti kada 10 a minuto a panagsasarita. “Makapakigtot ti resultana,” kuna ni Feldman. “Dimi inekspektar a normalen a paset ti inaldaw a panagbiag ti panagulbod.” Ngem kasla saan a nakappapati ta nupay di kayat ti kaaduan ti mapagulbodan, kaaduan met a tattao ti agulbod.

Apay a normal itan ti panagulbod, panagtakaw, ken dadduma pay a kita ti di kinamapagtalkan? Ania ti epektona kadatayo ti di kinamapagtalkan? Ken kasanotayo a maliklikan dagita nga aramid?