Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! DISIEMBRE 2015

 NO ANIA TI KUNA TI BIBLIA

Ti Kararua

Ti Kararua

Agkokontra ti opinion ti adu a relihion maipapan iti kararua ken no ania ti mapasamak iti dayta no matay ti tao. Ngem nalawag ti isursuro ti Biblia.

Saan kadi a matay ti kararua?

TI KUNA TI DADDUMA

Adu ti mamati nga immortal wenno saan a matay ti kararua. Patien ti dadduma a no matay ti tao, umakar kano ti kararua iti mayanak a bagi, ken kastanto manen ti mapasamak no matay ti bagi nga immakaranna. Adda met dagiti mamati a no matay ti tao, mapan kano ti kararuana iti sabali a lugar, kas iti langit wenno impierno.

TI KUNA TI BIBLIA

Saan nga ibagbaga ti Biblia nga immortal ti kararua. Kinaagpaysuanna, masansan nga ibagana a matay ti kararua. Kinuna ni propeta Ezequiel, maysa kadagiti inusar ti Dios a mangisurat iti Biblia, a ti kararua ket mabalin a madusa iti ipapatay. Inusar met ti Biblia ti termino a “natay a kararua” kas pangtukoy iti maysa a bangkay. (Levitico 21:11) Nalawag a saan nga isursuro ti Biblia nga immortal ti kararua.

“Ti kararua nga agbasbasoldayta a mismo matayto.”Ezequiel 18:20.

Agduma kadi ti kararua ken ti bagi?

TI KUNA TI DADDUMA

Ti kararua ti mangpapaandar iti bagi bayat a sibibiag ti maysa a tao ngem sumina dayta no matay isuna.

TI KUNA TI BIBLIA

Adda imbaga ti Biblia a maysa nga ina a nangyanak iti 16 a “kararua”—kayatna a sawen, sibibiag ken agang-anges a tattao. (Genesis 46:18) Kinapudnona, ti Hebreo a sao a nausar iti Biblia para iti “kararua” ket mabalin met a maipatarus kas “maysa nga agang-anges.” No dadduma, mausar pay ketdi dayta a termino a pangtukoy kadagiti animal. Ibaga pay ti Biblia nga agkasapulan ti kararua iti makan. (Deuteronomio 12:20) Isu a ti kararua ket isu met la ti bagi ta kasapulanna ti aganges ken mangan. Iti Biblia, ti sao a “kararua” ket kaaduanna a tumukoy iti kompleto a sibibiag a tao, a pakairamanan ti bagi, rikrikna, ken personalidadna.

“Impasngayna dagitoy . . . sangapulo ket innem a kararua.”Genesis 46:18.

 Ania ti mapasamak iti kararua kalpasan ti ipapatay?

TI KUNA TI BIBLIA

No kasano kasigurado a marunot ti bagi ti maysa a tao no matay, kasta met kasigurado nga ‘awanen ti aramid wenno uray gakat wenno uray pannakaammo wenno uray sirib idiay Sheol [wenno, Tanem].’ (Eclesiastes 9:10) Nalawag ti ibaga ti Biblia a no matay ti maysa, ‘isu agsubli iti daga; iti dayta nga aldaw mapukaw dagiti panunotna.’ (Salmo 146:4) Awanen a pulos maaramidan ti natay a kararua, isu a masansan nga ipada ti Biblia ti natay iti maysa a “matmaturog.”—Mateo 9:24.

APAY A RUMBENG A PANUNOTEM?

No matay ti maysa nga ipatpategmo, siempre kayatmo a maammuan ti sungbat dagitoy a saludsod: Ayanna ngata isunan? Ania ti kasasaadnan? Agrigrigat kadi? Ipasigurado kadatayo ti Biblia nga awanen ti puot dagiti natay, isu a maliwliwatayo ta ammotayo a saanen nga agrigrigat dagiti natayen nga ipatpategtayo. Ad-adda pay a maliwliwatayo ta ammotayo nga ikarkari ni Jehova a Dios nga iti masanguanan, riingennanto wenno isublina ti biag dagiti awan puotna a natay a kararua.—Isaias 26:19.

“Awan ammo dagiti natay.”Eclesiastes 9:5, Ti Baro a Naimbag a Damag Biblia.

Ammuem ti Ad-adu Pay

Kinaulbod a ti Dios Naulpit

Patien ti adu nga agnanayon a dusaen ti Dios dagiti managbasol. Agtignay kadi ti Dios a sidadangkes? Ania a talaga ti mapasamak no matay ti tao?

Ania ti Panagungar?

Mabalin a masdaawka no asino dagiti mapagungar.