Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! NOBIEMBRE 2015

 NADISENIO KADI?

Ti Abilidad ti Mula nga Agkuenta

Ti Abilidad ti Mula nga Agkuenta

AGUS-USAR dagiti mula iti maysa a komplikado a proseso a maaw-awagan iti photosynthesis tapno makaalada iti enerhia manipud iti init ket makaaramidda iti taraon. Ngem ipakita dagiti panagadal iti maysa a kita ti mula nga adda pay sabali nga ekstraordinario nga abilidadda—kuentaenda ti kasayaatan a kapartak ti panangkonsumoda iti taraon iti agpatnag.

Usigem: Iti aldaw, pagbalinen dagiti mula nga starch ken sugar dagiti carbon dioxide iti atmospera. Iti met rabii, usaren ti adu a kita ti mula ti starch nga inurnongda iti aldaw, isu a saanda nga agbisin ken agtultuloy ti panagbunga ken panagdakkelda. Kasta met, iprosesoda ti naurnongda nga starch iti kalkalainganna a kapartak—saan unay a napartak ken saan met unay a nabayag—isu nga agarup 95% laeng ti mausarda sakbay nga aglawag, inton mangrugida manen nga agaramid ken agurnong iti starch.

Naibatay dagita a konklusion kadagiti eksperimento iti maysa a kita ti mustasa, a maaw-awagan iti Arabidopsis thaliana. Nadiskobre dagiti researcher nga ibadbadyet a naimbag daytoy a mula ti naurnongna a taraon depende iti kaatiddog ti rabii—8, 12, wenno 16 nga oras man sakbay nga aglawag. Nalawag a bingaybingayen ti mula ti kaadu ti starch depende iti kaatiddog ti oras sakbay nga aglawag, isu nga ammona ti kasayaatan a kapartak ti panangusarna iti taraon.

Kasano a maammuan dagiti mula no kasano pay kaadu ti nabati nga starch? Kasanoda a marukod ti kaatiddog ti rabii? Ken ania ti tumultulong kadakuada nga agkuenta? Kasapulan pay ti kanayonan a panag-research tapno masungbatan dagita a saludsod.

Ania ti makunam? Resulta kadi ti ebolusion ti abilidad ti mula nga agkuenta? Wenno adda nangdisenio iti dayta?

Ammuem ti Ad-adu Pay