Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! OKTUBRE 2015

 SUHETO ITI AKKUB

Tallo a Saludsod a Kayat ti Tao a Damagen iti Dios

Tallo a Saludsod a Kayat ti Tao a Damagen iti Dios

PITO la ti tawen ni Susan idi nangrugi ti salsaludsodna maipapan iti Dios, idi nayospital ti 9 ti tawenna a gayyemna a ni Al gapu iti polio ken naikabil iti iron lung (aparato a tumulong iti pasiente nga aganges). Naisurat ti kapadasanna iti Enero 6, 2013 a ruar ti The New York Times.

Kalpasan a binisita ni Susan ni Al iti ospital, dinamagna ken ni nanangna: “Apay nga inaramid ti Dios ti kasdiay iti maysa nga ubing?”

Insungbat ni nanangna: “Kuna ni Apo padi nga adda la ketdi rason ti Dios, isuna laeng ta diak ammo no ania.” Dua a tawen kalpasanna, idi 1954, nairuar ti bakuna para iti polio nga inaramid ni Jonas Salk, isu a naikuna ti ina ni Susan a baka ti Dios ti nangidalan iti research ni Salk.

Kuna ni Susan: “Idi koma pay ngarud a, nga indalan ti Dios dagiti doktor tapno din naikabil ni Al iti iron lung.”

Impatingga ni Susan ti estoriana maipapan iti kapadasanna idi ubing pay kadagitoy a sasao: “Sa la natay ni [Al] walo a tawen kalpasanna, ket idi a tiempo, napeklanakon nga ateista.”

Kas ken Susan, adu kadagiti biktima wenno nakasaksi iti trahedia ti saan a makabirok iti makapnek a sungbat kadagiti saludsodda maipapan iti Dios. Adda dagiti nagbalin nga ateista (di mamati iti Dios). Dadduma met ti mamati latta nga adda Dios ngem addan panagduaduada.

Ignorante kadi iti relihion dagiti ateista ken dagiti agduadua nga adda Dios? Saan met ketdi. Kinapudnona, ti kapadasanda iti relihion ti kaaduanna a rason a napukaw ti pammatida iti Dios. Para kadakuada, saan a nasungbatan ti organisado a relihion dagiti saludsod nga importante iti biag. Ania dagita a saludsod? Nakaskasdaaw ta kaaduanna, isu met la dagita ti salsaludsod a pakaburburiboran dagidiay mangibagbaga a mamati iti Dios. Kitaentayo ti tallo a saludsod a kayat ti adu a damagen iti Dios no maikkanda iti tsansa, ken no ania ti sungbat ti Biblia.

 1 “APAY NGA IPALPALUBOSMO TI PANAGRIGRIGAT?”

Apay a maisaludsodda dayta?

Patien ti adu, ‘Naayat ti Dios isu a lapdanna koma a mapasamak dagiti trahedia iti biag.’

PAGPANUNOTAN: Mabalin a kasla ditay maawatan dagiti ugali ken kostumbre dagiti sabali ti kulturada—baka makigtottay pay ketdi. Ket alistotay la no kua nga ipapan a madi ti ar-aramidenda. Kas pagarigan, iti maysa a kultura, ibilang dagiti tattao a panangipakita iti sinseridad no makikinnitada iti kasarsaritada. Ngem para iti dadduma, awan daydayawda no aramidenda dayta. Ngem ditay mabalin nga ibaga nga adda kamali kadakuada. Masapul laeng nga am-ammuentayo ida a naimbag.

Posible ngata a kasta met ti mapasamak no iti panangtarus iti Dios? Patien ti adu a ti panagrigrigat ket pammaneknek nga awan ti Dios. Ngem no maipapan kadagidiay nalawlawagan no apay nga ipalpalubos ti Dios ti panagrigrigat, kombinsidoda nga adda Dios.

TI KUNA TI BIBLIA: Naiduma ti pampanunot ken daldalan ti Dios iti pampanunot ken daldalantayo. (Isaias 55:8, 9) Isu a mabalin a kasla ditay maawatan dagiti tignayna ken dagiti rason no apay a saan a dagus nga agtignay.

Ngem saan nga ibagbaga ti Biblia a basta awatentayo lattan dagiti narabaw a rason a kas iti “misterio ti ar-aramid ti Dios.” Aw-awisennatayo ketdi nga am-ammuentayo pay a naimbag ti Dios tapno maawatantayo no apay nga ipalpalubosna ti panagrigrigat ken no apay a dina pay la pagpatinggaen dayta ita. * Dumekket pay no kua ti relasiontayo kenkuana.—Santiago 4:8.

 2 “APAY A NAPNO TI RELIHION KADAGITI MANAGINSISINGPET?”

Apay a maisaludsodda dayta?

‘No napateg iti Dios ti sinseridad,’ irason ti dadduma, ‘awan koman a, ti managinsisingpet kadagidiay agkunkuna nga agdaydayaw kenkuana.’

PAGPANUNOTAN: Alaentay a pagarigan ti maysa nga anak a nangtallikud iti nagsayaat a panangpadakkel kenkuana ni tatangna ket nagtalaw sa pinilina ti dakes a panagbiag. Uray saan koma a kayat ti ama, pinalubosanna ti anakna. Ngem umiso kadi nga ibaga a dakes ti amana wenno awan pay ketdi amana? Siempre saan! Kasta met, ti panaginsisingpet iti uneg ti relihion ket pammaneknek laeng a palpalubosan ti Dios dagiti tattao nga agpili no ania a biag ti kayatda.

TI KUNA TI BIBLIA: Kagura ti Dios ti panaginsisingpet iti relihion. (Jeremias 7:29-31; 32:35) Ngem bay-anna dagiti tattao nga agpili no ania a biag ti kayatda. Kinaykayat ti adu nga agkunkuna a mamati iti Dios a suroten dagiti aramid ti tao a pannursuro ti relihion ken dagiti bukodda nga estandarte iti moral.—Mateo 15:7-9.

Ngem awan panaginsisingpetna ti relihion nga akseptaren ti Dios. * Kinuna ni Jesus: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:35) Masapul nga ‘awan panaginsisingpetna’ dayta nga ayat. (Roma 12:9) Adu a relihion ti saan a makapasa iti dayta nga estandarte. Kas pagarigan, bayat ti genocide (panaginnibus ti puli) idiay Rwanda idi 1994, rinibribu a relihioso a tattao ti nangpapatay kadagiti karelihionanda gapu laeng ta naiduma ti tribuda. Ngem saan a nakiraman dagiti Saksi ni Jehova iti dayta, ken adu kadakuada ti nangprotektar kadagiti kapammatianda ken iti sabsabali, uray pay no pakatayanda. Dayta a kinamanagsakripisio ti mangpaneknek a posible ti relihion nga awan panaginsisingpetna.

 3 “APAY NGA ADDATAYO DITOY LUBONG?”

Apay a maisaludsodda dayta?

Pampanunoten ti dadduma: ‘Apay a 80 wenno 90 laeng a tawen ti kapaut ti biag ti tao? Ania ti nakairantaan ti kasta kaababa a panagbiag?’

PAGPANUNOTAN: Aminado ti adu kadagidiay di mamati iti Dios nga adda makingapuanan kadagiti narigat a matarusan a detalye ti nakaparsuaan ken iti kinaurnosna. Maawatanda a ti planetatayo, ti dadduma pay a planeta, ken ti bulan ket apagisu ti pannakaurnosna tapno agtultuloy ti biag ditoy daga. Kunada a dagiti linteg ti nakaparsuaan a mangkonkontrol iti uniberso ket eksakto unay ken perpekto ti pannakaaramidna nga uray bassit la a panagbalbaliw dagita, awanen ti agbiag ditoy daga.

TI KUNA TI BIBLIA: Patien ti adu a ti ababa a biagtayo ket pammaneknek nga awan ti Dios. Ngem ti agpayso, nagadu ti makita iti nakaparsuaan nga ebidensia nga adda Namarsua. (Roma 1:20) Adda panggepna no apay nga inaramidna dagitoy a bambanag. Ti rason nga agbibiagtayo ket adda koneksionna iti dayta. Inaramid ti Dios ti tao tapno agbiag nga agnanayon ditoy daga, ken saanna a linipat ti panggepna.—Salmo 37:11, 29; Isaias 55:11.

Pudno a makatulong ti nakaparsuaan tapno matarusantayo nga adda Dios ken maammuantayo ti personalidadna. Ngem adda sabali a pamay-an nga inranta ti Dios tapno maawatantayo ti panggepna ket iti kasta, maammuantayo ti rason nga agbibiagtayo. Masapul nga ibagana dayta kadatayo. Iti Biblia, imbagana dayta iti simple ken direkta a sasao. * Awisendaka dagiti Saksi ni Jehova a padasem manen a kitaen dagiti sungbat iti Biblia.

^ par. 16 Tapno maammuam no apay nga ipalpalubos ti Dios ti panagrigrigat, kitaem ti kapitulo 11 ti libro nga Ania a Talaga ti Isursuro ti Biblia? nga impablaak dagiti Saksi ni Jehova. Mabasa met iti www.jw.org/ilo.

^ par. 22 Para iti ad-adu pay nga impormasion, kitaem ti kapitulo 15 ti libro nga Ania a Talaga ti Isursuro ti Biblia? nga impablaak dagiti Saksi ni Jehova. Mabasa met iti www.jw.org/ilo.

^ par. 28 Para iti ad-adu pay nga impormasion, kitaem ti kapitulo 3 ti libro nga Ania a Talaga ti Isursuro ti Biblia? nga impablaak dagiti Saksi ni Jehova. Mabasa met iti www.jw.org/ilo.

Ammuem ti Ad-adu Pay

Apay nga Ipalpalubos ti Dios ti Kinadakes ken Panagsagaba?

Kasano a nangrugi ti kinadakes, ken apay nga ipalpalubos dayta ti Dios? Agpatingganto ngata ti panagsagaba?

Agpapada Kadi Amin a Relihion? Agturongda Kadi Amin iti Dios?

Ti dua a banag a naitampok iti Biblia ti mangipaay iti sungbat.

Ania ti Panggep ti Biag?

Napanunotmo kadin, ‘No ania ti panggep ti biag?’ Ammuen ti sungbat ti Biblia iti dayta a saludsod.