Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

AGRIINGKAYO! SEPTIEMBRE 2015

 TULONG PARA ITI PAMILIA | PANAGASAWA

No Kasano ti Agpadispensar

No Kasano ti Agpadispensar

TI PROBLEMA

Kalkalpasyo laeng a nagriri iti asawam. ‘Apay koma nga ag-sorry-ak,’ kinunam iti bagim. ‘Saan met a siak ti nangirugi!’

Binaybay-amon ti napasamak ngem adda latta tension iti nagbaetanyo. Kayatmo koma ti agpadispensar ngem marigatanka a mangibaga iti simple a sao a “sorry.”

DAGITI MAKAGAPU

Pride. “No dadduma, nagrigat ti ag-sorry gapu iti pride-ko,” inamin ti maysa nga asawa a ni Charles. * No nangato ti pride-mo, mabainka a mangamin nga adda met kamalim.

Kapanunotan. Mabalin a mariknam nga agpadispensarka laeng no sika ti makimbasol iti problema. Kinuna ti asawa a babai a ni Jill: “No ammok a siento porsiento a siak ti makimbasol, nalaka laeng ti ag-sorry. Ngem nagrigat no agpadakami a nakaibaga iti makapasakit. Apay koma a dumawatak iti pammakawan ket agpadakami met a nagkamali?”

Mabalin a mas mapatalgedan pay ti riknam nga okey laeng a dika agpadispensar no mariknam a basol amin ti asawam ti napasamak. “No kombinsidoka nga awan pulos kamalim,” kinuna ti maysa nga asawa nga agnagan Joseph, “dika no kuan agpadispensar kas panangipakitam nga awan basolmo.”

Pannakapadakkel. Baka saan a nairuam a dumawat iti pammakawan ti pamilia a dimmakkelam. No kasta, mabalin a dimo nasursuro nga admitiren dagiti kamalim. Ket gapu ta saanka unay a nasanay idi ubingka, dimo nayugali ti naimpusuan a panagpadispensar ita ta adultokan.

 TI MABALINMO NGA ARAMIDEN

Sebseban ti panagpadispensar ti umap-apuy a riri

Panunotem ti rikna ti asawam. Adda kadi malagipmo a dimmawat iti pammakawan kenka? Saan kadi a nagsayaat ti nariknam kalpasanna? Ipariknam met koma dayta iti asawam. Uray no panagkunam ket awan ti basolmo, agpadispensarka latta gapu ta nasaktan ti riknana, wenno gapu iti dimo nagay-ayatan a resulta ti inaramidmo. Makatulong dayta tapno lumag-an ti rikna ti asawam.—Prinsipio ti Biblia: Lucas 6:31.

Iyun-unam ti panagasawayo. Dimo koma ibilang a pakaabakam no agpadispensarka. Ibilangmo ketdi dayta a balligi iti panagasawayo. Ngamin, ti agipempempen iti sakit ti nakem ket mas determinado pay a di agpaabak “ngem iti nabileg nga ili,” kuna ti Proverbio 18:19. Narigat, wenno baka imposible pay ketdi ti makikappia no kasta ti kasasaad. Ngem no agpadispensarka, makatulong dayta tapno saan a dumakkel ti problema. No kasta ti aramidem, ipakpakitam a napatpateg kenka ti panagasawayo ngem iti bagim.—Prinsipio ti Biblia: Filipos 2:3.

Dimo itantantan ti agpadispensar. Agpayso, narigat ti agpadispensar no talaga a saan laeng a sika ti adda kamalina. Ngem saanmo a mabalin a pagpambar ti kamali ti asawam tapno dimo aramiden ti umiso. Isu a saanmo nga itantantan ti dumawat iti pammakawan ken dimo panunoten a malipatanyonto met laeng ti napasamak iti panaglabas ti aldaw. No agpadispensarka, nalaklaka met para iti asawam ti agpadispensar. Ket no kanayonka nga agpadispensar, nalaklakanton para kenka nga aramiden dayta.—Prinsipio ti Biblia: Mateo 5:25.

Paneknekam a naimpusuan dayta. Ti panangikalintegam iti naaramidam ket naiduma iti panagpadispensar. Ken ti panangibaga iti medio sarkastiko a, “Sorry a, nakaar-arsagidkanto met ngamin” ket saan a pudno a panagpadispensar. Saanmo nga irasrasonanen ti naaramidam ken bigbigem ti nasaktan a rikna ti asawam, uray no iti panagkunam ket saan met koma a rumbeng a masaktan.

Akseptarem ti realidad. Sipapakumbaba nga akseptarem nga agkamalika. Total, agkamalitayo amin! Uray no ipagarupmo nga awan basolmo iti maysa a situasion, bigbigem a ti bersionmo iti napasamak ket mabalin a saan nga isu ti intero nga estoria. “Kasla pudno ti amin a sao ti umuna a mangikalintegan iti bagina iti pangukoman,” kuna ti Biblia, “agingga nga iparang met ti bangir ti kalinteganna.” (Proverbio 18:17, Ti Baro a Naimbag a Damag Biblia) No realistiko ti panangkitam iti bagim ken kadagiti pagkurkurangam, nalaklakaka nga agpadispensar.

^ par. 7 Nabaliwan ti dadduma a nagan iti daytoy nga artikulo.

Ammuem ti Ad-adu Pay

POSIBLE NGA AGBALIN A NARAGSAK TI PAMILIAM

Agpatulong iti Dios Tapno Naragsak ti Panagasawayo

Sumayaat ti relasionyo nga agassawa no isaludsodyo dagitoy.

AGRIINGKAYO!

Dagiti Di Agkupas a Prinsipio—Ayat

Ti ayat ket masansan a dakamaten ti Biblia, ngem manmano a tumukoy dayta iti romantiko nga ayat wenno seksual a rikna.

NAIMBAG A DAMAG MANIPUD ITI DIOS

Kasanotayo a Magunggonaan Kadagiti Prinsipio ti Biblia?

Inlawlawag ni Jesus no apay a kasapulantayo ti panangiwanwan ken no ania ti dua a prinsipio ti Biblia a kapatgan.