Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Agosto 2015

Dina Tinallikudan ti Pammatina

Dina Tinallikudan ti Pammatina

Idi 11 ti tawen ni Song Hee, nadlaw ni nanangna nga abnormal ti killo ti durina (spine). Nadayagnos ti maysa a doktor nga adda scoliosis-na, pasikig a panagkillo ti duri a sinan letra “C” wenno “S.” Kimmaro ti kondision ni Song Hee isu a masapul a maoperaan. Ngem saanna a kayat ti agpayalison wenno agpasaksak iti dara. Ininterbiu ti Agriingkayo! maipapan iti kapadasanna.

Idi damo a naammuan dagiti doktor ti sakitmo, natulongandaka kadi?

Iti agarup tallo a tawen, dua a doktor ti nangmonitor kaniak ngem kimmaro latta ti panagkillo ti durik. Kinapudnona, kimmaro ti killo ti durik nga uray la maipiten ti puso ken barak isu a marigatanak nga aganges. Masapul idin a maoperaanak.

Kinayatmo kadi ti agpaopera?

Wen. Ngem imbagada kaniak a narigat ti operasion. Immabuten iti 116 degrees ti killo ti durik, ket nakaro unayen dayta. Ngem adda pay sabali a problema. Saanko a kayat ti agpayalison iti dara gapu iti naibatay-Biblia a patpatiek. *

Adda kadi doktor a nangayat a mangopera kenka?

Nakasarakkami ken ni nanangko iti espesialista iti duri iti lugarmi a Florida, U.S.A. Ngem idi imbagak a diak agpayalison iti dara, kinunana nga awan doktor a mayat a mangaramid iti kasta karigat nga operasion a di agusar iti dara. Kinunana pay a no saanak nga agpaopera, baka saankon a madanon ti edad a 20. Ket katorseak laeng idi.

Inlawlawagmo kadi no apay a saanmo a kayat ti agpayalison iti dara?

Wen. Imbagak a naibatay iti Biblia ti patpatiek, ken ibilang ti Dios a sagrado ti dara, dara man dayta ti tao wenno animal. * Ipapatay pay ketdi idi ti dusa ti Israelita a mangan iti dara! * Impakitak met ti Aramid 15:19, 20. Iti dayta a teksto, naibilin kadagiti Kristiano nga ‘umadayoda iti dara.’ Kayatna a sawen a saan a mabalin nga ipauneg ti dara iti bagi ti tao, kanen man dayta wenno babaen ti panang-injection iti urat.

Ania ti reaksion ti doktor?

Impapilitna latta nga agusar iti dara no operaannak. Ken nasdaawak iti kinuna ti ospital a libre ti operasionko no agpayalisonak iti dara.

Talaga, ania ngarud ti inaramidyo ken ni nanangmo?

Uray no kasla awan idin ti mayat a mangopera kaniak a di agusar iti dara, desididokami latta  a di mangtallikud iti pammatimi. Lallalo pay a rimmigat ti situasion ta menor de edadak pay la idi. Gapu ta kumarkaron ti kondisionko, nayuli ti kasok iti korte. Imbag laengen ta inikkannakami ti abogado a pannakabagi ti estado ti Florida iti 30 nga aldaw tapno agsapul iti doktor a mangrespeto iti patpatiek.

Adda kadi nasapulanyo?

Adda! Nakaim-imbag ti Hospital Liaison Committee dagiti Saksi ni Jehova iti lugarmi. Isuda ti nangkontak iti espesialista iti duri a taga New York a mayat nga agopera a di agusar iti dara ken immanamong a kitaennak. Isu a nakabirokkami iti doktor sakbay nga agpatingga ti deadline nga inted ti korte. *

Naballigi kadi ti operasion?

Wen! Tapno mailinteg ti durik, nangikabil ti surgeon a ni Dr. Robert M. Bernstein iti adjustable a metal iti likudko. Namindua a naoperaanak, ket dua a lawas ti baetda.

Apay a namindua a naoperaanka?

No bilang ta adu a dara ti mapukaw iti umuna nga operasionko, adda dua a lawas a makapataud ti bagik iti ad-adu a red blood cells para iti maikadua nga operasionko. Ngem nagbassit laeng ti napukaw a darak iti dua nga operasionko. Gapu dayta iti nasayaat a panagplano, abilidad, ken kinaannad ti grupo a nangopera kaniak. Immimbagak a dagus ken awan ti naalak a komplikasion a mabalin a resulta ti panagpayalison iti dara. *

Ania ti narikna ti doktormo iti resulta ti operasionmo?

Masapul nga ikabilangan dagiti doktor ti amin maipapan iti pasiente

Naragsakan unay! Imbagana a “ti panangaywan iti salun-at ti pasiente ket saan la a basta panagopera.” Kinunana pay a masapul nga ikabilangan dagiti doktor ti amin maipapan iti pasiente, agraman dagiti patpatien ken prinsipiona. Adu a tattao, saan laeng a dagiti Saksi ni Jehova, ti kasta ti kapanunotanna.

^ par. 7 Saksi ni Jehova ti ina ni Song Hee. Saksi met ni Song Hee a nabautisaran idi 2012 idi agtawen iti 16.

^ par. 17 Tultulongan dagiti Hospital Liaison Committee dagiti pasiente a Saksi nga agbirok kadagiti doktor a mangipaay iti kasayaatan a panangagas a di agusar iti dara.

^ par. 21 Iti artikulo maipapan iti peggad ti panangyalison iti dara, kuna ti Clinical Excellence Commission, New South Wales (Australia) Health: “Ti panangyalison iti dara ket maysa a panangiserrek iti bagi iti sibibiag a tisyu (living tissue transplant). Gagangay a saan nga awaten ti bagi ti tao ti aniaman a maiserrek a saan a dati a pasetna. Ipakita dayta a saan a natalged ti panagpayalison iti dara.”