Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Hulio 2015

 SUHETO ITI AKKUB | ADDA PAY KADI MAARAMIDAM ITI SITUASIONMO?

Ti Problema: Negatibo a Rikrikna

Ti Problema: Negatibo a Rikrikna

MALAPLAPUNOSKA kadi iti nakaro a negatibo a rikna—nalabit iti liday, pungtot, wenno sakit ti nakem? No wen, mabalin a maib-ibusen ti tiempo ken pigsam a para koma iti bambanag a talaga a napateg kenka. Ania ti maaramidam? *

PAGTULADAN ITI BIBLIA: DAVID

Adu a nagduduma nga emosion ti narikna ni David a kas iti panagdandanag ken ladingit. Ania ti nakatulong kenkuana tapno saan a sumuko? Impabiangna ti amin iti Dios. (1 Samuel 24:12, 15) Insuratna met ti rikriknana. Ken gapu ta natibker ti pammatina, kanayon a nagkarkararag. *

TI INARAMID NI GREGORY

Kas naibaga iti umuna nga artikulo, adda nakaro nga anxiety disorder ni Gregory. “Saanen a normal ken diak idin makontrol ti nakaro a panagdandanagko,” kunana. Ania ti nakatulong tapno malabananna ti nakaro a panagdandanagna? Kunana: “Inawatko ti naayat a tulong ni baketko ken dagiti gagayyemko. Nagkonsultaak met iti doktor ket adu ti naammuak maipapan iti kondisionko. Idi adda dagiti binalbaliwak iti estilo ti panagbiagko, nangrugi a mariknak nga adda latta maaramidak iti situasionko, ket saan a dayta ti mangkonkontrol kaniak. No dadduma, sumro latta ti panagdandanagko, ngem mas ammok itan no ania dagiti makagapu. Ken ammokon no ania ti aramidek tapno kumalma ti riknak.”

“Ti puso a narag-o nasayaat a pangagas.”—Proverbio 17:22

TI MAARAMIDAM

No dagiti negatibo a rikrikna ti kasla mangkonkontrol kenkan, padasem dagitoy:

  • Isuratmo ti rikriknam iti maysa a notebook.

  • Iyebkasmo ti riknam iti maysa a nadekket a kabagian wenno gayyemmo.

  • Saanka a dagus nga agpaapekto iti negatibo a riknam. Kas pagarigan, isaludsodmo iti bagim, ‘Talaga kadi nga adda nakaibatayan ti negatibo a panagkitak iti bagik?’

  • Dimo ipalubos a ti panagdandanag, pungtot, wenno sakit ti nakem ti mangibus iti pigsam. Usarem ketdi dayta iti napatpateg a bambanag. *

Konklusion: Kaaduanna a dagiti negatibo a rikriknatayo ket saan a maigapu iti situasiontayo, no di ket nakadepende no kasano ti panangkitatayo iti situasiontayo.

^ par. 3 Ti dadduma a negatibo nga emosion ket mabalin a resulta ti maysa a sakit nga agkasapulan iti panagpaagas iti doktor. Saan a mangirekrekomenda ti Agriingkayo! iti aniaman a partikular a pamay-an ti panangagas. Masapul nga adalen a naimbag ti tunggal maysa dagiti pagpilianna sakbay nga agdesision.

^ par. 5 Ti adu kadagiti salmo iti Biblia ket kararag ni David nga insuratna.

^ par. 13 Para iti ad-adu pay nga impormasion, kitaem ti topiko a naitampok iti akkub a napauluan iti “Kasanom a Sanguen Dagiti Pakadanagam?” iti Hulio 1, 2015 a ruar ti Pagwanawanan.

Ammuem ti Ad-adu Pay

TI PAGWANAWANAN

“Ti Pannakatarus ti Maysa a Tao Pudno Unay a Pabannayatenna ti Ungetna”

Ti maysa a pasamak iti biag ni David nga ari ti Israel, tulongannaka a mangkontrol iti emosionmo no masair wenno agpungtotka.

AGRIINGKAYO!

Dagiti Tulbek ti Naragsak a Biag

Talaga kadi a makatulong kenka ti kinasirib nga isursuro ti Biblia tapno agbalin a naragsak ti biagmo? Usigen daytoy nga artikulo ti uppat a prinsipio ti Biblia a talaga nga epektibo.

SUNGBAT DAGITI SALUDSOD MAIPAPAN ITI BIBLIA

Matulongannak Kadi ti Biblia No Malmaldaanganak?

Adda tallo a banag a sipaparabur nga ipaay ti Dios no agsagsagabatayo iti depresion.

SUNGBAT DAGITI SALUDSOD MAIPAPAN ITI BIBLIA

Tulongannak met Laeng Kadi ti Dios No Agkararagak?

Talaga kadi a maseknan ti Dios kadagiti problemam?