Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! MAYO 2015

“Tultulongannakami ti Dios a Makalipat”

“Tultulongannakami ti Dios a Makalipat”

DIMMENDEN da Natalya ken ti 9 ti tawenna nga anakna a ni Aslan iti abay ti agina a da Zarina ken ti 12 ti tawenna a balasitangna a ni Anzhelika. Iti asidegda, nagdedekket a nakadalupisak ti nasurok a 1,000 nga ubbing ken nataengan, bayat a bambantayan ida dagiti armado a terorista.

Iti agsapa ti Mierkoles, Septiembre 1, 2004, agsagsagana idi iti ruar ti eskuelaan dagiti ubbing ken nagannak para iti selebrasion ti umuna nga aldaw ti klase idiay Beslan, maysa a bassit nga ili iti Alania, Russia. Pagammuan ta dimmarup lattan ti nasurok a 30 nga armado a lallaki ken suicide bomber sada nagpaltopaltog iti tangatang ken nagpukkapukkaw. Inserrekda dagiti mabutbuteng a tattao iti gymnasium ti eskuelaan sada pinalawlawan kadagiti bomba.

Ti Pannaka-hostage

Nangrugi ti tallo nga aldaw a tension iti nagbaetan dagiti terorista ken dagiti soldado. “Daydi pay laeng ti kapautan a panagkararagko,” kuna ni Natalya, a makipagad-adal idi iti Biblia kadagiti Saksi ni Jehova.

Nakapudpudot idi ta kaska la malingta iti uneg ti gymnasium. Mangrugi iti agsapa ti maikadua nga aldaw, awanen ti inted dagiti terorista a makan wenno uray danum la koma kadagiti hostage-da. Isu nga iti Biernes, ti maikatlo nga aldaw, adda payen dagiti imminum iti isboda ken nangan iti sabsabong nga ited koma dagiti ubbing kadagiti maestrada. Kuna ni Natalya: “Adda ubing a kaabaymi a nangted kaniak iti bulong, ginuduak dayta sa intedko kada Aslan ken Anzhelika.”

Iti malem ti Biernes, nangrugi ti rinnupak dagiti soldado ken terorista. “Natumbaak gapu iti panagbettak dagiti bomba,” kuna ni Natalya. “Napuskol ti asuk, ket nagpipinnaltogdan.” Nagkaradap da Natalya ken Aslan bayat ti engkuentro. Maysa a taga-Ossetia  a ni Alan ti nangiturong kadakuada iti natalged a lugar. Nupay kasta, adu ti saan a nakalibas.

Ti Imbungana

Natay ni Anzhelika bayat ti panaglalaban

Ginasut nga ubbing ken nataengan ti natay, karaman kadakuada ni Anzhelika. Adu a lawas a puro saibbek ken dung-aw ti mangngegan idiay Beslan. Iti apartment ni Natalya, matantannawagan ti eskuelaan, isu nga uray no addan baro nga eskuelaan a naibangon iti asideg, saan latta a kayat ni Aslan ti sumrek. Dina pay kayat ti mapan makiay-ayam. “Nagpakpakaasikami ken Apo Jehova a tulonganna koma ni Aslan tapno malabananna ti butengna,” kuna ni Natalya. Idi agangay, naituredna met laengen ti mapan ageskuela.

Marigatan idi ni Natalya a mapan makigimong iti Kingdom Hall. “No addaak iti uneg ti maysa a natao ken nakubong a lugar, panagriknak kasla adda umay umatake kadakami,” kunana. “Ikararagko no kua nga awan koma ti dakes a mapasamak. Idi kuan, saanakon a makigimgimong. Diak maawat nga adu ti natay, idinto ta nakalasatkami.”

Ti Pananglipat

“Agyamyamanak kadagiti Saksi a timmultulong kaniak,” imbaga ni Natalya. “Kada tallo nga aldaw nga umay bumisita ti Saksi a ni Tatyana. Idi agangay, inkuyogna ti maysa pay a Saksi nga agnagan Ulyana. Nasingpet, nataktika, ken naalumamay ti panagsasao ni Ulyana ken adu ti ammona iti Biblia. Kinomendarannak gapu iti panagporsegik, ken dimngeg a naimbag no ages-estoriaak.

“Mayestoriak met laengen ti napasamak iti daydi nga aldaw a diak makarikna iti sakit ti nakem wenno buteng”

“Imbasa ni Ulyana dagiti sasao ni apostol Pablo iti 2 Corinto 1:9. Kalpasan a nagpasar ni Pablo iti rigat idiay Asia, kinunana: ‘Nariknami iti unegmi nga inawatmi ti sentensia nga ipapatay.’ Imbasana pay ti Isaias 40:31: ‘Dagidiay mangin-inanama ken Jehova mapasublidanto ti bilegda. Agpangatodanto a sipapayak a kas kadagiti agila.’ Dagita a teksto ken ti kanayon a pammabileg da Ulyana ken ti dadduma pay a Saksi ti nangparegta kaniak a makigimong manen a kadua dagiti annakko. Ngem adda latta danagko no addaak iti Kingdom Hall.”

Ni ngay Zarina? Nagbalin a Saksi ni Jehova idi agangay. Il-iliwenna ti tiempo a sabtennanto ni Anzhelika inton mapagungar iti maysa a napintas ken natalna a daga, nga iturayan ti Pagarian ti Dios. (Mateo 6:9, 10; Aramid 24:15) Nabautisaran met da Natalya ken dagiti annakna idi 2009. Aggigianda pay laeng iti asideg ti nadadael a gymnasium, ngem adayon iti panunotda ti nakabutbuteng a pasamak. “Mayestoriak met laengen ti napasamak iti daydi nga aldaw a diak makarikna iti sakit ti nakem wenno buteng,” kinuna ni Natalya. “Tultulongannakami ti Dios a makalipat.”

Ammuem ti Ad-adu Pay

Apay a Mapasamak ti Dakes Kadagiti Naimbag a Tattao?

Tukoyen ti Biblia ti tallo a makagapu ti panagrigat ti tao.