Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Mayo 2015

 DAMDAMAG ITI LUBONG

Maipapan iti Asia

Maipapan iti Asia

Ti Asia ti kadakkelan ti populasionna a kontinente iti lubong. Iti laengen China ken India, nasuroken a kakatlo ti populasion ti lubong ti agnanaed dita. Aniada a problema ti sangsanguen dagiti nasion iti Asia tapno maisuro ken maprotektaran dagiti umilida?

Maprotektaran Dagiti Ubbing No Masursuruanda

Sigun kadagiti Chinese nga eksperto iti linteg, dakdakkel ti posibilidad a maabuso dagiti ubbing no saan nga isuro dagiti nagannakda ti maipapan iti seksual a pannakaabuso. Manipud 2010 agingga iti 2013, agarup 8,000 a darum gapu iti seksual a pannakaabuso dagiti ubbing ti inasikaso dagiti abogado iti China. Dagiti ubbing ket “alisto a maluko isu a nalakada a mabiktima,” kuna ti propesor iti linteg iti Beijing Normal University. “Edukasion ti tulbek tapno malapdan ti seksual a pannakaabuso.”

TI KUNA TI BIBLIA: Dagiti masirib a nagannak isuroda dagiti annakda no kasanoda a protektaran ti bagida “manipud iti tao nga agsasao iti balusingsing [wenno naalas] a bambanag.”—Proverbio 2:1, 10-12.

Matmatay Kalpasan ti Bagyo

Sigun iti maysa a panagadal, ti bilang dagiti kayyanak nga ubbing a babbai iti Pilipinas a matmatay iti tawen kalpasan ti bagyo ket agarup mamin-15 nga ad-adu ngem kadagiti natay gapu iti bagyo. Posible a gapu dayta iti kinaawan ti trabaho kalpasan ti bagyo, ti magasto iti panangtarimaan iti balay, ken ti saan a pannakaited ti kasapulan dagiti maladaga a babbai, kas iti nutrision ken pannakaaywan ti salun-atda.

TI KUNA TI BIBLIA: ‘Ibingaymo ti tinapaymo iti daydiay mabisin, ket rebbeng nga iyegmo dagiti naparigatan, awanan pagtaengan a tattao iti balaymo, a no kas pagarigan makitam ti asinoman a lamolamo, masapul nga abbongam.’—Isaias 58:7.

Panagpakamatay Dagiti Nataengan iti South Korea

Idi 2011, nasurok a 25% iti amin a nagpakamatay idiay South Korea ti agtawen iti 65 wenno nasursurok pay. Kuna ti dadduma a researcher a gapu dayta iti nagbaliw a pannakatrato dagiti lallakay ken babbaket ken gapu iti kasasaad ti ekonomia—agarup 50% kadagiti senior citizen iti South Korea ti maibilang a marigrigat. Kumurang a 50% laeng itan kadagiti taga-South Korea ti mangibagbaga a rumbeng nga ited dagiti annak ti kasapulan dagiti lumallakay wenno bumabbaketen a nagannakda.

TI KUNA TI BIBLIA: “Dayawem ni amam ken ni inam.”—Efeso 6:2.