Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! ABRIL 2015

 NO ANIA TI KUNA TI BIBLIA

Dagiti Animal

Dagiti Animal

Iti nadumaduma a pamay-an, dagiti animal ket paseten ti biag ti dandani amin a tattao. Adda kadi sungsungbatantayo iti wagas ti panangtratotayo kadakuada?

Kasano ti rumbeng a panangtrato ti tao kadagiti animal?

TI KUNA TI DADDUMA

Adda dagiti agkuna a mabalin nga aramiden ti tao ti aniaman a kaykayatna kadagiti animal. Kuna met ti dadduma a rumbeng a matrato dagiti animal a kas met laeng kadagiti tattao.

  • Inrason ti maysa a prominente nga aktibista a mangilablaban iti kalintegan dagiti animal, a masapul a maaddaan dagitoy iti “kalintegan a saan laeng a panguartaan wenno tagilako.” Innayonna: “Isardengtay koman a tratuen dagiti animal a kas sanikua.”

  • Ibilang met ti dadduma a nalabes ti inaramid ti bilionario a ni Leona Helmsley. Adda $12 a milion a trust fund nga impatawidna iti asona, ken inramanna iti testamentona a no matay ti tarakenna, maipaabay dayta iti panteonna.

Panunotem: Kasano ti rumbeng a panangtratotayo kadagiti animal?

TI KUNA TI BIBLIA

Ti Namarsua iti biag a ni Jehova a Dios imbilinna kadagiti tattao: “Pagpasakupenyo dagiti ikan iti baybay ken dagiti agtaytayab a parsua iti langlangit ken tunggal sibibiag a parsua nga aggargaraw iti rabaw ti daga.” (Genesis 1:28) Umiso la ngarud a kunaen nga iti imatang ti Dios, nangatngato dagiti tattao ngem kadagiti animal.

Dayta a konklusion ket suportaran dagiti sasao a naisurat sakbay ti nadakamat a teksto. Kuna ti Biblia a “ti Dios pinarsuana ti tao iti ladawanna, iti ladawan ti Dios isu pinarsuana; pinarsuana ida a lalaki ken babai.”—Genesis 1:27.

Gapu ta naparsuatayo “iti ladawan ti Dios,” naisangsangayantayo ta maipakitatayo dagiti nadiosan a kualidad, kas iti sirib, hustisia, ken ayat. Addaantayo met iti nainkasigudan nga abilidad a mangilasin iti naimbag ken dakes, ken kabaelantayo ti agbalin a nasinged iti Dios. Awanan dagiti animal kadagiti kasta nga abilidad ta saanda a naparsua “iti ladawan ti Dios.” Nababbabada ken saanda a nairanta a tratuen a kas iti pannakatrato ti tao.

Kayatna kadi a sawen nga adda kalintegan dagiti tattao a mangmaltrato kadagiti animal? Saan.

  • Iti Linteg nga inted ti Dios kadagiti Israelita, siniguradona a makainana, mapakan, maprotektaran iti pannakadangran ken matulongan dagiti animal no marigatanda.—Exodo 23:4, 5; Deuteronomio 22:10; 25:4.

“Innem nga aldaw nga aramidem ti trabahom; ngem iti maikapito nga aldaw sumardengka, tapno ti torom ken ti asnom makapaginanada.”Exodo 23:12.

 Dakes kadi ti pumatay kadagiti animal?

TI KUNA TI DADDUMA

Adda dagiti mangnganup ken mangngalap a mangpapatay kadagiti animal kas pagraragsakan wenno pagay-ayaman laeng. Umanamong met ti dadduma iti Russian a nobelista a ni Leo Tolstoy, a nangisurat a ti panangpapatay ken pannangan kadagiti animal ket “nalawag a dakes.”

TI KUNA TI BIBLIA

Ipalubos ti Dios ti panangpatay dagiti tattao kadagiti animal tapno protektaranda ti biagda wenno tapno adda pangalaanda iti aramidenda a kawes wenno bado. (Exodo 21:28; Marcos 1:6) Ibaga pay ti Biblia a mabalin ti agparti kadagiti animal kas pagtaraon. “Tunggal aggargaraw nga animal a sibibiag mabalin nga agserbi kas taraon maipaay kadakayo,” kuna ti Genesis 9:3. Tinulongan pay ketdi ni Jesus dagiti adalanna a nagkalap kadagiti ikan a kinnanda idi agangay.—Juan 21:4-13.

Ngem ibaga ti Biblia nga “asinoman a mangay-ayat iti kinaranggas pudno unay a guraen” ti Dios. (Salmo 11:5) Kaipapananna ngarud a saan a kayat ti Dios a dangrantayo wenno papatayentayo dagiti animal tapno laeng pagraragsakan wenno pagay-ayaman.

Ipakita ti Biblia a napateg iti Dios ti biag dagiti animal.

  • Kuna ti Biblia nga idi tiempo ti panamarsua, “ti Dios inaramidna ti atap nga animal iti daga sigun iti kakikitana ken ti naamo nga animal sigun iti kakikitana ken tunggal aggargaraw nga animal iti daga sigun iti kakikitana. Ket nakita ti Dios a nasayaat dayta.”Genesis 1:25.

  • Kuna pay ti Biblia maipapan ken Jehova: “Kadagiti animal itedna ti taraonda.” (Salmo 147:9) Dinisenio ti Dios ti daga a mangipaay iti adu a taraon ken pagtaengan para kadagiti animal.

  • Inkararag ni Ari David ti Israel: “Ti tao ken animal isalakanmo, O Jehova.” (Salmo 36:6) Kas pagarigan, idi kaaldawan ni Noe, insalakan ni Jehova ti walo a tao ken amin a kita ti animal sakbay a dinadaelna dagiti dakes a tattao iti sangalubongan a Layus.—Genesis 6:19.

Nalawag nga ipatpateg ni Jehova ti amin nga animal a pinarsuana, ket namnamaenna a kasta met ti aramiden dagiti tattao.

“Daydiay nalinteg ipategna ti kararua ti naamo nga animalna.”Proverbio 12:10.

Ammuem ti Ad-adu Pay

Ti Namarsua Pinagnaedna ti Tao iti Paraiso

Kasano ti panangiladawan ti Biblia iti pannakaparsua ti tao? Ania ti imbilin ti Dios iti umuna a pagassawaan?

Ania ti Panggep ti Dios Para iti Daga?

Ilawlawag ti Biblia no apay a pinarsua ti Dios ti daga, no kaano nga agpatingga ti panagsagaba, ken no ania ti agur-uray iti masanguanan para iti daga ken dagiti agnaed iti dayta.