Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

AGRIINGKAYO! MARSO 2015

 TULONG PARA ITI PAMILIA | PANAGASAWA

Pannakibagay Kadagiti Katugangan

Pannakibagay Kadagiti Katugangan

TI PROBLEMA

“No adda idi problemami nga agassawa, ibaga dayta ni baketko kadagiti nagannakna. Intono kuan, awagannak metten ni tatangna tapno balakadannak. Masuronak iti dayta!”—James. *

“Masansan nga ibaga ti katugangak a babai, ‘Mailiwak unayen iti barok!’ Iyes-estoriana no kua ti kinasingedda idi nga agina isu a makonsiensiaak ta nakiasawaak iti anakna a nakaigapuan ti lidayna!”—Natasha.

Posible kadi a maliklikan nga agbalin a problema ti agassawa ti problema ti agkatugangan?

TI MASAPUL A MAAMMUAM

Ti panagasawa ket panangbukel iti baro a pamilia. Kuna ti Biblia a no mangasawa ti maysa a lalaki, “panawannanto ti amana ken ti inana ket makitiponto iti asawana.” Kasta met laeng ti aramiden ti asawa a babai kadagiti nagannakna. No makiasawa, kuna ti Biblia a ti dua “maymaysadanton a lasag.” Maysadan a baro a pamilia.—Mateo 19:5.

Unaem ti asawam sakbay dagiti nagannakmo. “Ti maysa kadagiti kapatgan a masapul a sursuruen ti agassawa ket ti kanayon a panangpanunotda a maymaysada itan,” insurat ti mamalbalakad a ni John M. Gottman. “Tapno masursurom ti makikaykaysa iti asawam, baka masapul a pumanawkan iti poder ti nagannak ken kakabsatmo.” *

Mabalin a maikawa ti dadduma a nagannak. Kuna ti maysa nga agkabannuag nga asawa a lalaki: “Idi balasang pay ni baketko, kanayon nga ipangpangrunana ti kayat dagiti nagannakna. Idi nagkasarkamin, nakita ni nanangna a sabalin ti ipangpangruna ti anakda isu a narigatan a mangakseptar iti dayta.”

Mabalin a maikawa met ti dadduma a kakaskasar. “Mapilim ti agbalin a gagayyemmo idinto ta saanmo a mapili dagiti agbalin a katugangam,” kuna ti nadakamaten a ni James. “Kasla adda mangibagbaga iti, ‘Kayatmo man wenno saan, addan dua a kabbaro a gagayyemmo.’ Pagpungtotendaka man, kapamiliam idan!”

 TI MABALINMO NGA ARAMIDEN

No agkontrakayo nga agassawa maipapan iti situasion a mainaig iti katugangan, pagreggetanyo ti agtinnunos a mangsolbar iti dayta. Iyaplikaryo daytoy a balakad ti Biblia: “Ikagumaam a saraken ti talna, ket surotem dayta.”—Salmo 34:14.

Tapno maaramidyo dayta, makatulong no usigenyo dagiti sumaganad a senario. Nupay naiparang ti tunggal senario sigun iti panangmatmat ti asawa a lalaki wenno babai, agpada nga agaplikar dagita kadakuada. Dagiti nadakamat a prinsipio ket makatulong tapno masolbaryo ti dadduma a problema maipapan kadagiti katugangan.

Kuna ni baketmo a kayatna a makatunosam koma a naimbag ni nanangna. Ngem para kenka, narigat a pakitunosan ti katugangam.

Padasem daytoy: Pagsaritaanyo ken baketmo ti problema, ken sisasaganakayo koma nga agpinnabus-oy. Ti problema ket saan a no ania ti panagriknam iti katugangam a babai, imbes ketdi, no ania ti panagriknam iti asawam—ti tao a nagkariam nga ayaten. Bayat ti saritaanyo, mangpanunotkayo iti maysa wenno dua nga espesipiko a pamay-an tapno mapasayaatmo ti relasionmo ken ni nanangna. Kalpasanna, aramidem dayta. Bayat a makitkita ni baketmo dagiti panagreggetmo, sigurado nga umuneg ti panagraemna kenka.—Prinsipio ti Biblia: 1 Corinto 10:24.

Kuna ni lakaymo a dagiti nagannakmo ti ad-adda a pagpagustuam ngem isuna.

Padasem daytoy: Pagsaritaanyo ken lakaymo ti problema ket ikagumaam a tarusan ti kapanunotanna. Siempre, saan a rumbeng a madanagan ni lakaymo no ipakpakitam met laeng ti maitutop a respeto kadagiti nagannakmo. (Proverbio 23:22) Ngem nalabit kasapulan latta nga ipanamnamam kenkuana—babaen kadagiti saom ken aramidmo—nga isu ti iyun-unam imbes a dagiti nagannakmo. No agtalek ni lakaymo, dinanto unayen marikna a dagiti nagannakmo ket kainnagawna iti atensionmo.—Prinsipio ti Biblia: Efeso 5:33.

Imbes a sika ti pagpabalakadan ni baketmo, dagiti nagannakna ti asitganna.

Padasem daytoy: Makisaritaka ken baketmo, ket mangaramidkayo kadagiti limitasion a pagnumuanyo. Ikagumaam ti agbalin a rasonable. Kanayon kadi a di umiso ti makisarita kadagiti nagannak maipapan iti maysa a problema? Kaano a mabalin a maitutop dayta? Saan nga agbalin a problema dayta no adda dagiti rasonable a limitasion a nagnumuanyo.—Prinsipio ti Biblia: Filipos 4:5.

^ par. 4 Nabaliwan dagiti nagan iti daytoy nga artikulo.

^ par. 9 Manipud iti libro a The Seven Principles for Making Marriage Work.

Ammuem ti Ad-adu Pay

POSIBLE NGA AGBALIN A NARAGSAK TI PAMILIAM

No Kasano a Mataginayon ti Natalna a Relasion Kadagiti Kabagian

Maipakitayo a raraemenyo latta dagiti nagannakyo a saan a madadael ti relasionyo nga agassawa.