Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! MARSO 2015

 SUHETO ITI AKKUB

Adda Kadi Dios? Ania ti Epektona Kenka no Mamatika?

Adda Kadi Dios? Ania ti Epektona Kenka no Mamatika?

Para iti adu, awan sungbat wenno saanen a napateg dayta a saludsod. Kuna ni Hervé a dimmakkel idiay France: “Diak ibilang ti bagik a di mamati iti Dios wenno agduadua iti kaaddana, ngem awan ti relihionko. Para kaniak, ti kasayaatan a wagas ti panagbiag ket ti panangusar iti sentido komon ta no dayta ti pagkurriem, saanmon a kasapulan ti agpatulong iti Dios.”

Ti met dadduma ket mabalin a kas ken John iti United States. Kinunana: “Dagiti nagannakko ket saan a mamati iti Dios. Idi baritoak, diak masigurado no adda Dios wenno awan. Ngem pasaray pinampanunotko dayta.”

Pinampanunotmo met kadin no adda Dios, ket no adda nga agpayso, adda kadi nasaysayaat a panggep ti biag? Nalabit addan dagiti naammuam a narigat nga ilawlawag no awan ti Namarsua, kas kadagiti impormasion ti siensia maipapan kadagiti kasasaad iti nakaparsuaan a mayanatup unay tapno posible ti biag ditoy daga ken ebidensia a ti biag ket saan a timmaud manipud iti awan biagna a banag.—Kitaem ti kahon a “ Sukimatem Dagiti Ebidensia.”

Usigem dagita a napateg nga impormasion. Kasda la karatula a nakatudo iti maysa a gameng. No makakitaka kadagiti makakombinsir nga ebidensia nga adda Dios ken mapagtalkan nga impormasion maipapan kenkuana, nagdakkel la ketdi ti maitulong dagita kenka. Adtoy ti uppat a pagarigan.

 1. TI PANGGEP TI BIAG

No adda nasaysayaat a panggep ti biag, kayattayo a maammuan no ania dayta ken no ania ti epektona kadatayo. Ngamin, no adda Dios ngem ditay ammo dayta, agbibiagtayo a ditay man la ammo ti kapatgan a kinapudno iti uniberso.

Kuna ti Biblia a ti Dios ti Nagtaudan ti amin a biag. (Apocalipsis 4:11) Kasano a ti pannakaammo iti dayta ket makaipaay iti panggep iti biagtayo? Kitaem ti isursuro ti Biblia maipapan iti dayta.

Kadagiti amin a parsua ditoy daga, naidumduma dagiti tattao. Sigun iti Biblia, pinarsuanatayo ti Dios tapno agbalintayo a kas kenkuana babaen ti panangtuladtayo iti personalidadna. (Genesis 1:27) Isursuro pay ti Biblia a dagiti tattao ket posible nga agbalin a gagayyem ti Dios. (Santiago 2:23) Awanen ti makaipaay pay iti nasaysayaat a panggep ti biagtayo no di ti maaddaan iti kasta a relasion iti Namarsua kadatayo.

Ania ti kaipapanan ti panagbalin a gayyem ti Dios? Dagiti gagayyem ti Dios maibagada kenkuana ti amin a linaon ti pusoda. Inkarina met a denggenna ida ken agtignay para kadakuada. (Salmo 91:15) Kas gagayyem ti Dios, mabalintay a maammuan ti kapanunotanna iti adu a banag. Gapu iti dayta, maawatantayo a naimbag dagiti sungbat kadagiti kapatgan a saludsod maipapan iti biagtayo.

No adda Dios ngem ditay ammo dayta, agbibiagtayo a ditay man la ammo ti kapatgan a kinapudno iti uniberso

2. NATALNA A PANUNOT

Kas pagarigan, narigat a patien ti dadduma nga adda Dios gapu kadagiti panagrigrigat a makitkitada iti intero a lubong. Isalsaludsodda, ‘Apay nga ipalpalubos ti mannakabalin-amin a Namarsua nga agtultuloy ti panagrigrigat ken kinadakes?’

Daytoy ti makaliwliwa a sungbat ti Biblia: Di pulos pinanggep ti Dios nga agrigat dagiti tattao. Idi pinarsuana ti tao, awan ti panagrigat. Uray ti ipapatay ket saan a paset ti orihinal a panggep ti Dios para iti sangatauan. (Genesis 2:7-9, 15-17) Narigat a patien? Arapaap laeng? Saan. No adda mannakabalin-amin a Namarsua ken no agpayso nga ayat ti kangrunaan a galadna, dayta ngarud ti talaga a kita ti biag a manamnamatayo a panggepna para kadagiti tattao.

Apay ngarud a kastoy ti kasasaad ita ti sangatauan? Ilawlawag ti Biblia a pinarsua ti Dios dagiti tattao nga addaan iti wayawaya nga agdesision. Saantayo a robot, a mapuerpuersa nga agtulnog iti Dios. Ti immuna a pagassawaan, a nagtaudan ti amin a tattao, pinilida a laksiden ti panangiwanwan ti Dios. Imbes nga agtulnogda iti Dios, inaramidda ti kaykayatda. (Genesis 3:1-6, 22-24) Gapu iti dayta, mapaspasarantayon dagiti nasaem a resultana.

Natalna ti panunottayo ta ammotayo a saan a panggep ti Dios nga agrigat ti tao. Ngem natural a kayattayo met ti mabang-aran. Kasapulantayo ti namnama para iti masanguanan.

 3. NAMNAMA

Kalpasan unay a simmukir ti sangatauan, inkari ti Dios nga addanto tiempo a tungpalenna ti orihinal a panggepna para iti daga. Gapu ta mannakabalin-amin, awan ti makalapped kenkuana iti panangaramidna iti dayta. (Isaias 55:11) Di agbayag, ikkatenton ti Dios ti amin nga epekto dayta nga isusukir. Isublinanto metten ti kasasaad ti daga ken sangatauan maitunos iti orihinal a panggepna.

Ania ti kaipapanan dayta kenka? Usigem ti dua laeng kadagiti adu a kari ti Dios para iti masanguanantayo a mabasa iti Biblia.

  • NATALNANTON TI INTERO A DAGA KEN MAIKKAT TI KINADAKES. “Iti apagbiit laengen a kanito, ket daydiay nadangkes awanton; ket pudno unay nga imutektekamto ti lugarna, ket isu awanton. Ngem dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.”—Salmo 37:10, 11.

  • MAPUKAW TI SAKIT KEN IPAPATAY. “Awanto ti agtataeng nga agkuna: ‘Masakitak.’” (Isaias 33:24) “Pudno nga alimonennanto ni patay iti agnanayon, ket ti Soberano nga Apo Jehova sigurado a punasennanto ti lulua iti amin a rupa.”—Isaias 25:8.

Apay a makapagtalektayo kadagiti kari ti Dios a naisurat iti Biblia? Agsipud ta adu a padto a nailanad iti dayta ti napaneknekan a natungpalen. Ngem nupay adda namnamatayo nga awanton ti panagrigrigat, dina kayat a sawen a ditayon agproblema ita. Ania pay a tulong ti ipapaay ti Dios?

4. TULONG KADAGITI PROBLEMA KEN PANAGDESISION

Iwanwanwannatayo ti Dios tapno matulongannatayo a mangsango kadagiti problema ken mangaramid kadagiti nasayaat a desision. Simple laeng ti adu a desision, ngem ti dadduma ket addaan kadagiti tungpal biag nga epekto kadatayo. Awan tao a makaipaay kadatayo iti kas iti sirib a maipaay ti Namarsua kadatayo. Ngamin, ammona ti amin a napasamak ken mapasamakto pay laeng ken isu ti mismo a Nagtaudan ti biag ti tao. Ammona ngarud no ania ti kasayaatan para kadatayo.

Naglaon ti Biblia iti kapanunotan ni Jehova a Dios ta pinaltiingan wenno inwanwanna ti nadumaduma a tattao a nangisurat iti dayta. Mabasatayo daytoy iti Biblia: “Siak, ni Jehova, ti Diosmo, Daydiay mangisursuro kenka tapno magunggonaam ti bagim, Daydiay mangpappapagna kenka iti dalan a rebbeng a pagnaam.”—Isaias 48:17, 18.

Awan limitasion ti pannakabalin ti Dios ken sisasagana a mangusar iti dayta para kadatayo. Ti Biblia dineskribirna ti Dios kas nadungngo nga ama a nakasagana a tumulong kadatayo. Kunana: “Ti Ama sadi langit mangtedto iti nasantuan nga espiritu kadagidiay agdawdawat kenkuana!” (Lucas 11:13) Dayta a pannakabalin ti Dios ti mangigiya ken mangpabileg kadatayo.

Kasanom a magun-odan ti kasta a tulong ti Dios? Kastoy ti sungbat ti Biblia: “Ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.” (Hebreo 11:6) Tapno agbalinka a kombinsido nga adda Dios, masapul a sukimatem a mismo dagiti ebidensia.

 IWAYAAM KADI TI AGSUKIMAT?

Kasapulan ti panawen tapno mabirokam ti kinapudno maipapan iti Dios. Ngem sigurado a magunggonaanka iti panangaramidmo iti dayta. Usigem ti kapadasan ni Xiujin Xiao a nayanak idiay China ngem agnanaed itan iti United States. Kunana: “Nupay mamatiak idi iti teoria ti ebolusion, interesadoak iti Biblia. Isu a nagpayadalak iti Biblia kadagiti Saksi ni Jehova. Iti maudi a tawenko iti kolehio, nagbalinak nga okupado unay nga uray la awanen tiempok a mangpanunot kadagiti ad-adalek iti Biblia. Ngem saanak unay a naragsak. Idi impangpangrunak manen ti panagadalko iti Biblia, nariknak ti pudpudno a ragsak.”

Kayatmo kadi a maammuan ti ad-adu pay maipapan iti Namarsua kadatayo a ni Jehova a Dios? Iwayaam koma ngarud ti agsukimat.

Ammuem ti Ad-adu Pay

Adda Kadi Nagan ti Dios?

Adu ti titulo ti Dios, kas iti Mannakabalin-amin, Namarsua, ken Apo. Ngem agarup 7,000 a daras a nausar ti personal a nagan ti Dios iti Biblia.

Apay nga Adalem ti Biblia?

Mangipapaay ti Biblia kadagiti sungbat ti agkakapateg a saludsod ti minilion a tattao iti intero a lubong. Kayatmo kadi met ti matulongan?