Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Nobiembre 2014

 NO ANIA TI KUNA TI BIBLIA

Kinadalus

Kinadalus

Napateg kadi iti Dios ti pisikal a kinadalustayo?

“Dalusantayo koma ti bagbagitayo iti tunggal pakatulawan iti lasag ken iti espiritu.”—2 Corinto 7:1.

TI KUNA TI BIBLIA

Ay-ayatennatayo ti Namarsua kadatayo ken kayatna a nasalun-at, atiddog, ken naragsak ti biagtayo. “Dagiti bilinko salimetmetan koma ta pusom,” kuna ti Dios, “agsipud ta ti kaatiddog ti al-aldaw ken tawtawen ti biag ken talna mainayonto kenka.” (Proverbio 3:1, 2) Ti ayat ti Dios kadagiti tattao ket makita kadagiti bilinna idi iti Israel, a pakairamanan dagiti espesipiko a pagannurotan maipapan iti kinadalus ti bagi ken ti aglawlaw. (Deuteronomio 23:12-14) Idi sinurot dagita dagiti Israelita, simmalun-atda ken naprotektaranda kadagiti sakit a nangapektar iti dadduma a nasion a kas iti Egipto, nga awanan kadagiti kasta a kodigo ti linteg nga awan kaaspingna idi a tiempo.—Deuteronomio 7:12, 15.

Kasta met ita, dagidiay ‘mangdalus iti bagbagida iti tunggal pakatulawan iti lasag,’ a pakairamanan dagiti makadangran a bisio a kas iti panagsigarilio, panagbartek, ken panagdroga, basbassit ti posibilidad nga agsakitda ken maliklikanda ti nasapa nga ipapatay. Gapu ta kanayon met nga adda dagiti makapulapoltayo, ipakpakitatayo nga ikabkabilangantayo ti padatayo a tattao no sursurotentayo dagiti pagalagadan ti Dios maipapan iti kinadalus.—Marcos 12:30, 31.

 Napateg kadi iti Dios ti moral ken naespirituan a kinadalus?

“Papatayenyo . . . dagiti kameng ti bagiyo . . . no maipapan iti pannakiabig, kinarugit, panaggartem iti sekso, makapasakit a tarigagay, ken kinaagum, a dayta ket idolatria. Maigapu kadagidiay a bambanag umay ti pungtot ti Dios.”—Colosas 3:5, 6.

TI KUNA TI BIBLIA

Kas nadakamaten, iparegta ti Biblia kadatayo a “dalusantayo ti bagbagitayo iti tunggal pakatulawan iti lasag ken iti espiritu.” Idi adda ni Jesu-Kristo ditoy daga, adu a tattao, agraman dagiti panguluen ti relihion dagiti Judio, ti aglablabes ti panangikagumaanda nga agbalin a nadalus iti pisikal ngem suksukirenda met dagiti moral ken naespirituan a pagannurotan. (Marcos 7:1-5) Tapno mailinteg ni Jesus dagiti bambanag, kinunana: “Awan ti banag manipud iti ruar a sumrek iti tao a mabalin a mangtulaw kenkuana, yantangay sumrek dayta . . . kadagiti bagisna, ket lumasat a rummuar iti pagiblengan.” Innayonna: “Daydiay rummuar manipud iti tao isu ti mangtulaw iti tao; ta manipud iti uneg, manipud iti puso dagiti tattao, rummuar dagiti makadangran a panagrasrason: dagiti pannakiabig, dagiti panagtakaw, dagiti panangpapatay, dagiti pannakikamalala, dagiti panagagum, dagiti aramid ti kinadangkes, allilaw, nalulok a kababalin, naapal a mata, . . . di kinanainkalintegan. Amin dagitoy a nadangkes a banag . . . tulawanda ti tao.”—Marcos 7:18-23.

Sigun ken Jesus, dagidiay aglablabes ti panangmatmatda iti pisikal a kinadalus ngem suksukirenda met dagiti moral ken naespirituan a pagalagadan ti Dios ket umasping kadagiti kopa a nadalus iti ruar ngem narugit iti uneg.—Mateo 23:25, 26.

Rasonable kadi dagiti pagalagadan ti Biblia?

“Daytoy ti kaipapanan ti ayat iti Dios, a tungpalentayo dagiti bilinna; ket kaskasdi a dagiti bilinna saanda a makapadagsen.”—1 Juan 5:3.

TI KUNA TI BIBLIA

Mabasatayo iti Mikias 6:8: “Ania ti kidkiddawen kenka ni Jehova no di ti panangwatwat iti kinahustisia ken panangayat iti kinamanangngaasi ken panagbalin a naemma iti pannakipagna iti Diosmo?” Talaga a rasonable unay dayta a kiddaw! Kayat pay ti Namarsua kadatayo nga agtulnogtayo kenkuana gapu iti ayat. No kasta ti aramidentayo, mariknatayo ti napalalo a ragsak. (Salmo 40:8) Ket no agkamalitayo, manamnamatayo ti asi ti Dios. “Kas iti maysa nga ama mangipakita iti asi iti annakna, ni Jehova nangipakita iti asi kadagidiay agbuteng kenkuana. Ta pagaammona unay ti pannakapormatayo, a laglagipenna a tapoktayo,” wenno nakapuy ken imperpektotayo.—Salmo 103:13, 14.

Kas sumario, dagiti pagalagadan ti Dios maipapan iti pisikal, moral, ken naespirituan a kinadalus ipakitada ti kinaimbag ken ayatna kadatayo. No naimpusuan a surotentayo dagita a pagalagadan, ipakpakitatayo a masirib ken ay-ayatentayo ni Jehova a Dios.

Ammuem ti Ad-adu Pay

TI PAGWANAWANAN

Ania ti Kuna ti Dios Maipapan iti Panagsigarilio?

Kasanotayo nga ammo a saan a dakamaten ti Biblia ti tabako?

TI PAGWANAWANAN

Ti Biblia Balbaliwanna ti Biag—Oktubre 2012

Kasano a naisardeng ti dua a tao ti bisioda a pakairamanan ti arak ken droga ket nagbalinda a pudpudno a naragsak?