Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! OKTUBRE 2014

Dagiti Agtaytayab a Hardinero iti Naraber a Kabakiran iti Tropiko

Dagiti Agtaytayab a Hardinero iti Naraber a Kabakiran iti Tropiko

AMMO ti asinoman a hardinero a ti naballigi a panagmula ket nakadepende iti pannakaiwaras dagiti bukel iti umiso a lugar ken tiempo. Nupay kasla karkarna, maar-aramid iti rabii—ken manipud iti ngato ti maysa a kaepektibuan a panagmula iti naraber a kabakiran. Dagita nga agtaytayab a hardinero ket isu dagiti Old World fruit bats—a dadduma ket pagaammo kas flying foxes. *

Panangiwaras iti Bukel

No rabiin, agtayab ti kaaduan a fruit bats a mangsawar iti kabakiran tapno agbirokda kadagiti kayo nga addaan iti naiimas a prutas wenno sabsabong nga aduan iti nektar. Bayat nga agtaytayabda tapno agsapul iti makan, gilingen dagiti panniki ti kinnanda a prutas sadanto itakki ti di narunaw a paset ken bukbukelna. Tapno mairingpas ti panagmulada, polinarenda met dagiti sabong bayat a sussusopenda ti paboritoda unay a nektar.

Yantangay adayo ti madanonda iti rabii, makaiwarasda kadagiti bukel iti nalawa a paset ti kabakiran. Gapu ta ti dadduma a bukel ket maisurot iti itakkida, agserbi met dayta kas “abuno” a mangpapartak iti panagtubo ti bukel. Di ngarud pakasdaawan a ti nadumaduma a mula iti naraber a kabakiran  ket agdepende kadagiti panniki a mangpolinar iti sabsabong wenno mangiwaras iti bukbukelda.

Adayo ken nalawa ti madaliasatda isu a masapul a nalaingda iti nabigasion ken naisangsangayan ti panagkitada. No nasipnget, nalawlawag ti panagkitada ngem iti tattao. Mailasinda pay ti dadduma a kolor. Kasta met, agtayabda latta aldaw man wenno rabii.

Panagpamilia

AMMOM KADI? Us-usaren dagiti fruit bats ti panagkita ken panagangotda no agsapulda iti taraon, saan a kas iti adu a dadduma a panniki nga agus-usar iti echolocation wenno agallungogan nga uni. Maibagay unay ti dadakkel a matada iti trabahoda iti rabii

Iti intero a panagbiag ti Samoan flying fox (Pteropus samoensis), maymaysa laeng ti asawana. Iti dadduma a kita ti panniki, napaliiw nga ay-aywanan a naimbag ti kabaian ti anakna, tugottugotna dayta iti sumagmamano a lawas, ken pasusuenna uray dandani adulton. Ti met sabali a dua a kita ti panniki ket mabalin pay nga agpatulong iti sabali a kabaian a mangasikaso kenkuana no aganak.

Nakalkaldaang ta maib-ibusen ti adu a fruit bats. Ti maysa a makagapu ket madaddadaelen ti pagtaenganda. Nakaro la ketdi ti dakes nga epekto ti kaawanda kadagiti isla ti Abagatan a Pacifico ta dadduma a kita ti mula sadiay ket agparang a di makapolinar no awan dagiti panniki. Nalawag a rumbeng laeng a tagipatgentayo ti trabaho dagitoy nga agtaytayab a hardinero.

^ par. 2 Masarakan dagitoy a kita ti panniki iti Africa, Asia, Australia, ken dadduma nga Isla ti Pacifico.