Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! OKTUBRE 2014

 TULONG PARA ITI PAMILIA | AGTUTUBO

No Kasano a Labanan ti Sulisog

No Kasano a Labanan ti Sulisog

TI PROBLEMA

“No dadduma, dawdawaten dagiti babbai ti numero ti teleponok ken aw-awisendak a makiseks. Agkedkedak ken pumanawak no kuan. Ngem kalpasanna pampanunotek, ‘Kasano ngata no intedko ti numerok?’ Kinapudnona, nakapimpintas ti dadduma kadakuada. Isu a natural a mapanunotko, ‘Apay koma ta saan?’”—Carlos, * 16.

Kaslaka kadi ken Carlos a makilablaban iti sulisog? No wen, kabaelam ti agballigi.

TI MASAPUL A MAAMMUAM

Madangranka laeng no agpasulisogka

Maipaspasangotayo amin iti sulisog—uray dagiti adulto. Adu ngamin ti kita ti sulisog. Adulton ni apostol Pablo idi insuratna: “Pudno a pagragsakak ti linteg ti Dios . . . , ngem makitak iti kamkamengko ti sabali a linteg a makigubgubat iti linteg ti panunotko ken mangiturturong kaniak a kautibo iti linteg ti basol.” (Roma 7:22, 23) Nupay narigat, nalabanan ni Pablo ti tarigagayna nga agbasol isu a kabaelam met dayta! Apay koma nga agpaadipenka kadagiti tarigagaymo? (1 Corinto 9:27) No masursurom a labanan ti sulisog bayat nga agtutuboka pay, maliklikam ti adu a pakadanagan ita ken talaga a mausarmonto dayta a nagpateg nga abilidad inton adultokan.

Ti media rubrubrobanna ti sulisog. Dinakamat ti Biblia ti maipapan “kadagiti tarigagay a naikasigudan iti kinaagtutubo” ken talaga a napigsa dagita. (2 Timoteo 2:22) Ngem dagita a tarigagay ket masansan a rubrubroban ti TV, dagiti pelikula, musika, ken libro a mailaklako kadagiti agtutubo babaen iti panangipakitada a saan a dakes ti tumulok iti sulisog. Kas pagarigan, no ‘in love’ ti dua a karakter iti maysa a pelikula, sigurado la ketdi nga addanto eksena iti estoria nga agseksda. Nupay kasta, ibaga ti Biblia a dagiti pudpudno a lallaki ken babbai kabaelanda ti ‘agtultuloy nga umadayo kadagiti nainlasagan a tarigagay.’ (1 Pedro 2:11) Kaipapanan dayta a kabaelam met a labanan ti sulisog. Ngem kasano?

 TI MABALINMO NGA ARAMIDEN

Ammuem dagiti pagkapuyam. Uray natibker ti kawar, mapugsat dayta no adda nakapuy a pasetna. Nagdakkel met ti posibilidad a madadael ti determinasionmo a mangaramid iti umiso kadagiti situasion a naglakaka a tumulok iti sulisog. Aniada a pagkapuyam ti masapul a kontrolem?—Prinsipio ti Biblia: Santiago 1:14.

Saganaam ti sulisog. Panunotem dagiti situasion a mabalin a maipasangoka iti sulisog. Panunotem no kasanom a labanan ti kasta a sulisog no bilang dumteng dayta.—Prinsipio ti Biblia: Proverbio 22:3.

Patibkerem ti determinasionmo. Idi masulisog ni Jose iti seksual nga immoralidad, kinunana: “Kasano koma a maaramidko daytoy dakkel a kinadakes ket pudno nga agbasolak a maikaniwas iti Dios?” (Genesis 39:9) Ipakita ti sasao a “kasano koma a maaramidko” a natibker ti determinasion ni Jose a mangaramid iti umiso ken mangliklik iti dakes. Kastaka met kadi?

Agbirokka iti makatulong a gagayyem. Maliklikam ti adu a sulisog iti biagmo no ti piliem a pakikaduaan ket dagidiay nasayaat ti prinsipioda a kas kenka. Kuna ti Biblia: “Daydiay makipagna kadagiti masirib a tattao agbalinto a masirib.”—Proverbio 13:20.

Liklikam dagiti situasion nga ad-adda a mangparigat kenka a manglaban iti sulisog. Kas pagarigan:

  • Dimo ipalubos a duduakayo laeng iti dimo kapada iti sekso.

  • Dika aginternet iti oras wenno lugar a mabalin a masulisogka nga agbuya iti pornograpia.

  • Adaywam dagidiay mangipakpakita iti panagsasao ken konduktada a makaay-ayo ti agaramid iti dakes.

Aniada a pagalagadan ti ipaannurotmo iti bagim tapno matulonganka a mangliklik iti sulisog?—Prinsipio ti Biblia: 2 Timoteo 2:22.

Agkararagka. Kinuna ni Jesus kadagiti adalanna: “Agkararagkayo nga agpatpatuloy, tapno saankayo a sumrek iti pannakasulisog.” (Mateo 26:41) Kinapudnona, kayat ni Jehova a Dios a malabanam ti sulisog, ket matulongannaka a mangaramid iti dayta. Kuna ti Biblia: “Saannanto nga ipalubos a masulisogkayo iti labes ti kabaelanyo nga itured, no di ket maigiddan iti pannakasulisog aramidennanto met ti dalan a pagruaran tapno mabalinanyo nga ibturan dayta.”—1 Corinto 10:13.

^ par. 4 Nabaliwan ti nagan.

Ammuem ti Ad-adu Pay

Malabanam ti Sulisog!

Tallo a pamay-an a makatulong tapno maaddaanka iti determinasion.

Kasanok a Masaranget ti Sulisog?

Ammuem dagiti praktikal nga addang a mabalinmo nga aramiden tapno malimitaram wenno naan-anay a maliklikam ti sulisog.