Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Septiembre 2014

 NO ANIA TI KUNA TI BIBLIA

Kararag

Kararag

Adda kadi dumdumngeg iti kararagtayo?

“O Managdengngeg iti kararag, kenka a mismo umayto dagiti tattao iti isuamin a lasag.”—Salmo 65:2.

TI KUNA TI TATTAO

Ibagbagada a saan a makadanon idiay langit dagiti kararagtayo. Dagiti agrigrigat a tattao ti mabalin a kangrunaan nga agduadua no adda met la dumdumngeg kadagiti kararagda.

TI KUNA TI BIBLIA

“Dagiti mata ni Jehova [a Dios] addada kadagidiay nalinteg, ket dagiti lapayagna situturong iti ararawda; ngem ti rupa ni Jehova bumusor kadagidiay agar-aramid iti dakes a bambanag,” kuna ti Biblia. (1 Pedro 3:12) Nalawag ngarud a dengdenggen ti Dios dagiti kararag. Ngem nangnangruna a denggenna dagidiay mangtungtungpal kadagiti bilinna. Tapno maipakita a sisasagana ti Dios a dumngeg kadagiti kararagtayo, kuna ti maysa pay a teksto: “Daytoy ti adda kadatayo a panagtalek kenkuana, nga, uray ania ti dawatentayo maitunos iti pagayatanna, denggennatayo.” (1 Juan 5:14) Nasken ngarud a maawatan dagiti napasnek a managkararag dagiti kita ti dawdawat a posible a maitunos iti pagayatan ti Dios.

 Kasano ti rumbeng a panagkararagtayo?

“No agkarkararagkayo, dikay ulit-uliten a sawen ti isu met laeng a bambanag.”—Mateo 6:7.

TI KUNA TI TATTAO

Dagiti miembro ti nagduduma a relihion kas iti Budismo, Katolisismo, Hinduismo, ken Islam ket nasursuruan nga agusar iti beads wenno rosario tapno ikabesa ken bilangenda dagiti kararagda.

TI KUNA TI BIBLIA

Ti kararag ket masapul a naimpusuan ken sipapasnek a mayebkas. Saan a basta naikabesa laeng ken maulit-ulit a sawen. Paregtaennatayo ti Biblia: “No agkarkararagkayo, dikay ulit-uliten a sawen ti isu met laeng a bambanag, a kas iti ar-aramiden dagiti tattao iti nasnasion, ta pagarupenda a maipangagdanto gapu iti panagusarda iti adu a sasao. Gapuna, dikay agbalin a kas kadakuada, ta ti Dios nga Amayo ammona no ania ti bambanag a kasapulanyo sakbay pay a dawatenyo kenkuana.”—Mateo 6:7, 8.

APAY A PAKASEKNAM?

No agkararag ti maysa iti wagas a saan a makaay-ayo iti Dios, mabalin a saysayangenna laeng ti tiempona wenno posible a mapagurana ti Dios. Ipakdaar ti Biblia a ti kararag dagidiay saan nga agtultulnog iti pagayatan ti Dios ket “nakarimrimon” kenkuana.—Proverbio 28:9.

Siasino ti rumbeng a pagkararagantayo?

“Birokenyo ni Jehova [a Dios] bayat a masarakan pay. Umawagkayo kenkuana bayat nga asideg pay.”—Isaias 55:6.

TI KUNA TI TATTAO

Adda dagiti agkarkararag ken Maria wenno iti dadduma pay a parsua, kas kadagiti anghel ken tattao a mapadpadayawan kas “sasanto.” Maysa kadagitoy ket ni “Saint” Anthony of Padua, a naikuna a mangay-aywan iti “naespirituan ken pisikal a kasapulan,” ken ni “Saint” Jude a naibilang a patron a santo dagiti adda iti “desperado a kasasaad.” Adu ti agkarkararag kadagita a “sasanto” ken kadagiti anghel ta mangnamnamada a dagitoy kano ti mangibabaet kadakuada iti Dios.

TI KUNA TI BIBLIA

Dagiti pudno nga agdaydayaw ket rumbeng nga agkararag iti ‘Amatayo nga adda iti langit.’ (Mateo 6:9) Balakadannatayo ti Biblia: “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios.”Filipos 4:6.