Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! AGOSTO 2014

 SUHETO ITI AKKUB

Kasano ti Makikappia?

Kasano ti Makikappia?

Nasayaat nga agkaarruba da Frank ken Jerry. Ngem nagbaliw dayta idi adda party nga inangay ni Jerry nupay nakarabrabiin. * Idi nagreklamo ni Frank maipapan iti kinatagarida, nasaktan ni Jerry iti wagas ti panangibagana iti dayta. Nagsinnungbatda. Sipud idin, aglinlinniklikdan.

GAGANGAY laeng ti problema da Frank ken Jerry. No adda di pagkinnaawatan ti dua a tao, masansan a makaungetda iti maysa ken maysa. Nalabit agpinnabasolda pay ketdi. No agpinnatangkenda latta, mabalin a madadael ti panaggayyemda.

Siguro, napadasamon dayta. No wen, posible a dimo nagustuan dayta! Kinapudnona, kayat ti kaaduan kadatayo a kanayon a natalna ti relasiontayo kadagiti gagayyem ken kaarrubatayo. Ngem kasanotay a maaramid dayta uray no sagpaminsan nga adda dagiti ditay pagkikinnaawatan? Kabaelantay kadi nga iwaksi dagiti negatibo a rikna ken pakawanen laengen dagiti nangpasakit kadatayo? Kabaelantayo kadi a solbaren dagiti ditay pagkikinnaawatan iti natalna a pamay-an?

Kitaem ti napasamak kada Frank ken Jerry. Nangrugi a nadadael ti panaggayyemda gapu iti sumagmamano a di umiso nga inaramidda: (1) awan konsiderasion ni Jerry, (2) impakita ni Frank ti suronna iti wagas a namagburek iti dara ni Jerry, (3) agpadada a nakapungtot, ken (4) agpadada a nagpinnatangken.

Ngem idi agangay, nakapagpampanunotda met laeng. Linipatdan ti napasamak ken nagkappiada. Ania ti nakatulong kadakuada? Inyaplikarda ti dadduma a praktikal a prinsipio a nakatulongen iti adu nga aggagayyem tapno masolbarda dagiti problema ken ad-adda a mapasinged pay ti relasionda.

Dagita a prinsipio ket masarakan iti kasaknapan ti pannakaiwarasna a libro iti lubong—ti Biblia. Parparegtaennatayo a mangpatanor kadagiti galad a kas iti pannakaawat, pannakatarus, kinasingpet, ayat, ken anus a makatulong tapno maadda ti talna ken umimbag dagiti emosional a sugat.Proverbio 14:29; 1 Corinto 13:4, 5.

Da Frank ken Jerry ket dua laeng kadagiti pammaneknek nga adda pannakabalin ti Biblia a mangpasayaat iti biag. Adu pay ti  dadduma a pagarigan, agraman dagidiay nagballigi a nangikkat kadagiti nabayagen a naalas a kababalinda. Kas pagarigan, naisardengen ti taga-Australia a ni Robert ti nakaro a kinamanagpungpungtotna. Linipat metten ti taga-Timor-Leste a ni Nelson ti nabayagen a gurana ken nagbalin payen a nasinged a gayyemna ti dati a kabusorna. Kasano a nakatulong ti Biblia kada Robert ken Nelson? Tapno maammuantayo, ininterbiu ida ti Agriingkayo!

INTERBIU 1

ROBERT, iyestoriam man biit ti biagmo sipud idi kinaubingmo.

Dimmakkelak iti saan a naragsak a pamilia. Naranggas ni tatangko ken masansan a kabilennak idi. Adda pay ketdi dagiti gundaway a binaybay-annak a daradara ken awanan puot. Gapu iti dayta, nagbalinak a managpungpungtot ken naranggas. Idi tin-edyerak, dua a tawen a nagyanak iti reform school (institusion a tumultulong iti panagbalbaliw dagiti menor de edad a nakabasol iti linteg). Idi agangay, nakaaramidak iti nakaro a krimen isu a naipisokak iti nakaing-inget ti pannakabantayna a pagbaludan. Idi nawayawayaanakon, immakarak idiay Australia bareng no mabalbaliwan ti biagko.

Ni Robert ket dimmakkel a managpungpungtot ken naranggas ken naibalud pay idi

Nakatulong kadi ti iyaakarmo?

Saan a ti iyaakarko ti nakatulong no di ket ti Biblia, nga inadalko babaen iti tulong dagiti Saksi ni Jehova. Nupay kasta, marigatanak pay laeng idi a mangkontrol iti pungtotko. Masansan a masuronak met iti bagik ken mariknak nga awan serserbik. Ngem naminsan, pinampanunotko ti kuna ti Proverbio 19:11: “Ti pannakatarus ti maysa a tao pudno unay a pabannayatenna ti ungetna, ket kinapintas iti biangna ti panangpalabas iti salungasing.” Gapu ta kayatko ti maaddaan iti kasta a pannakatarus, pinampanunotko no ania ti adda iti likudan dagiti rikna, sasao, ken aramidtayo. Gapu iti dayta, in-inut a nagbalinak a naan-anus, ad-adda a mannakaawat, ken manangpakawan.

Mangtedka man iti pagarigan.

Naminsan, diak inggaggagara a nasaktak ti rikna ti gayyemko isu a nakaunget ken binabalawnak iti imatang ti sabsabali. Talaga a napabainanak! Ngem nalagipko ti balakad ti Biblia a “dikay subadan ti dakes iti dakes” isu a dagus a nagpadispensarak. (Roma 12:17) Idi limmamiis ti ulo ti gayyemko, kinasaritak a duduakami ken naammuak a problemado gayam iti pamiliana. Nagkappiakami ken idi agangay, rinegaluannak iti napintas a kapote. Sumgarak a mangpanunot iti posible koma a napasamak no naranggasak pay laeng a kas idi no mapabainanak.

Ania ti aramidem no adda problema ti pamiliam?

Addaankami ken baketko iti baro nga agtawen iti 20. Kas iti dadduma a pamilia, adda met no kua dagiti dimi pagkikinnaawatan. Ngem adu ti nasursurok iti Biblia, agraman ti kinapateg ti panangibaga iti, “Sorry,” wenno ti panagpadispensar. Nagdakkel gayam ti maaramidan dayta a sao, no naimpusuan ti panangibagam ta mabalin a maliklikan wenno mapasardengna ti riri.

 INTERBIU 2

NELSON, naisem ken mannakigayyemka. Ngem adda idi tiempo a napnoka iti gura, di ngamin?

Wen! Idi agtutuboak pay, nakimiembroak iti maysa a napolitikaan a grupo a kontra gobierno. Kagurgurak met ti maysa a kalaban a partido iti politika a mayat a mangkontrol iti distritomi. Tapno agbalinak a nalaing a makilaban, nagadalak iti martial arts isu a no adda asinoman a mamagpungtot idi kaniak, kabilek la ketdi.

Idi agtutubo pay ni Nelson, nakimiembro iti maysa a napolitikaan a grupo a kontra gobierno

Ania ti namagbalbaliw kenka?

Nagadalak iti Biblia ken inyaplikarko dagiti pannursurona. Adda dua a nangtukay unay iti pusok. Ti umuna ket: “Amin a bambanag . . . a kayatyo nga aramiden kadakayo dagiti tattao, masapul a kasta met ti aramidenyo kadakuada.” (Mateo 7:12) Ti maikadua ket: “Masapul nga ayatem ti padam a tao a kas iti bagim.” (Mateo 22:39) Naobserbarak nga ipakpakita dagiti Saksi a nangyadal kaniak iti Biblia ti kasta a kita ti ayat, aniaman ti puli wenno nasionalidadda. Kayatko a tuladen ida. Nalawag a nagballigiak ta masmasdaaw dagiti dati a kaam-ammok ken didakon kabuteng.

Adda kadi tiempo a nakapungtotka manen iti nakaro?

Wen ngem saan nga iti publiko. No dadduma, marigatanak a mangkontrol iti pungtotko no addaak idiay balaymi. Kinaagpaysuanna, nakaungetak naminsan isu a nadissuak ni baketko. Anian a babawik! Imbag laengen ta pinakawannak isu a mas determinadoak pay a mangkontrol iti emosionko.

Kunam a didakan kabuteng dagiti tattao. Mangtedka man iti pagarigan.

Sige. Naminsan, nakitak ni Augusto a prominente a miembro ti kalabanmi a partido iti politika a nadakamatko itay. Idi damo, napalalo ti annadna. Ngem nainggayyeman a pinaguniak. Imbagak a lipatenmin dagiti dimi nagkinnaawatan ken inawisko idiay balay. Pinatganna dayta ken nasdaaw kadagiti inaramidko a panagbalbaliw isu a nagpayadal metten iti Biblia. Ita, saankami laengen a nasinged nga aggayyem ken ni Augusto no di ket agkabsatkami payen gapu ta agkarelihionankamin.

 “Makikappiakayo iti Amin a Tattao”

Komplikado ken agduduma dagiti makagapu kadagiti di pagkikinnaawatan, ken saan nga amin ket mayat kadagiti panagreggetmo a makikappia. Gapuna, daytoy ti realistiko nga ibalakad ti Biblia: “No mabalin, agingga a makapagpannuray kadakayo, makikappiakayo iti amin a tattao.”Roma 12:18.

Dagiti tattao a nadakamat iti daytoy nga artikulo ket sibibiag a pammaneknek a talaga nga epektibo ti sirib a linaon ti Biblia—nga adda bilegna a mangparut kadagiti “natibker ti pannakasarikedkedna” wenno nairamut a naalas a kababalin no ipalubostayo. (2 Corinto 10:4) Maipapan iti dayta a sirib, kuna ti Proverbio 3:17, 18: “Ti daldalanna ket daldalan ti kinamakaay-ayo, ket amin a dandanana talna. Maysa dayta a kayo ti biag kadagidiay mangpetpetpet iti dayta, ket dagidiay agtultuloy a mangsalimetmet a siiirut iti dayta maawaganda iti naragsak.”

Nasingeden nga aggayyem da Nelson ken Augusto

Kayatmo kadi ti agbalin a naragragsak ken mas mannakikappia? Kayatmo kadi ti pannakigayyem a saan a madadael uray no maipasango iti pannubok? No wen, agballigika no agpatulongka iti Biblia.

^ par. 3 Nabaliwan dagiti nagan.

Ammuem ti Ad-adu Pay

Ania ti Panagadal iti Biblia?

Ammuem ti sungbat dagiti saludsod maipapan iti programa a libre a panagadal iti Biblia.