Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Hulio 2014

 NO ANIA TI KUNA TI BIBLIA

Relihion

Relihion

Apay a nagadu ti relihion?

“Binaybay-anyon ti bilin ti Dios ket dagiti pannursuro ti tao ti tungtungpalenyo.”—Marcos 7:8, Ti Baro a Naimbag a Damag Biblia.

TI KUNA TI BIBLIA

Addaan dagiti tattao iti nainkasigudan a ‘naespirituan a kasapulan’ a mapennek babaen ti panagdaydayawda iti Dios. (Mateo 5:3) Iti panangikagumaanda a mangpennek iti dayta a kasapulan, nangbuangayda iti adu a relihion a naibatay kadagiti pannursuro ti tattao imbes a pannursuro ti Dios.

Kas pagarigan, kuna ti Biblia maipapan kadagiti miembro ti maysa a narelihiosuan a grupo idi umuna a siglo: “Adda regtada iti Dios; ngem saan a maitunos iti umiso a pannakaammo; ta, gapu iti saanda a pannakaammo iti kinalinteg ti Dios no di ket ikagkagumaanda nga ipasdek ti bukodda, saanda nga impasakup ti bagbagida iti kinalinteg ti Dios.” (Roma 10:2, 3) Kasta met la ita. Adu a relihion ti ‘mangisursuro iti bilbilin dagiti tattao kas doktrina.’Marcos 7:7.

 Masapul kadi a makimiembroka iti maysa a relihion?

“Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa.”Hebreo 10:24, 25.

TI KUNA TI BIBLIA

Inusar ti Hebreo 10:25 ti sasao a “saantay a baybay-an ti panagtataripnongtayo a sangsangkamaysa.” Ipakita dagita a sasao a kayat ti Dios nga agtataripnong dagiti tattao kas organisado a grupo tapno agdaydayawda kenkuana. Ngem masapul kadi nga adda bukod nga interpretasion ti tunggal agdaydayaw no asino ti Dios ken no ania dagiti kalikagumanna? Saan. Kuna ti Biblia a dagidiay nga agdaydayaw iti wagas nga akseptaren ti Dios ket ‘rebbeng nga agsaoda amin a sangsangkatunos’ ken ‘naan-anay nga agkaykaysada koma iti isu met laeng a panunot ken iti isu met laeng a wagas ti panagpampanunot.’ (1 Corinto 1:10) Nasken a maorganisarda kadagiti kongregasion ken ‘maaddaanda iti ayat iti intero a timpuyog dagiti kakabsat’ iti sangalubongan. (1 Pedro 2:17; 1 Corinto 11:16) Napateg ti kasta nga agkaykaysa ken organisado a panagdaydayaw tapno maparagsak ti Dios.

Kasano a mailasin ti pudno a relihion?

“Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.”—Juan 13:35.

TI KUNA TI BIBLIA

Tapno isurona no kasano a mailasin dagidiay mangal-alagad iti pudno a relihion, kuna ti Biblia: “Babaen kadagiti bungada mailasinyonto ida. Saan aya a di pulos agburas dagiti tattao kadagiti ubas manipud kadagiti sisiitan wenno kadagiti higos manipud kadagiti kalunay?” (Mateo 7:16) Saan a kasapulan nga agbalinka nga eksperto kadagiti mula tapno mailasinmo ti puon ti higos manipud iti kalunay. Umasping iti dayta, saan a kasapulan nga agbalinka nga eksperto iti relihion tapno mailasinmo ti pudno manipud iti palso. Ania ti dadduma a bunga, wenno pakailasinan, ti pudno a relihion?

  • Ti pudno a relihion isursurona ti kinapudno manipud iti Biblia, ti Sao ti Dios. (Juan 4:24; 17:17) Saan a naibasar dayta kadagiti sursuro ti tattao.

  • Ti pudno a relihion tultulonganna dagiti tattao a mangam-ammo iti Dios, agraman iti naganna a Jehova.—Juan 17:3, 6.

  • Ti pudno a relihion ket nakapokus iti Pagarian ti Dios, saan a kadagiti gobierno ti tattao, kas ti kakaisuna a namnama para iti sangatauan.—Mateo 10:7; 24:14.

  • Ti pudno a relihion isursurona ti di agimbubukodan nga ayat. (Juan 13:35) Isursurona dagiti tattao a mangraem iti amin a tribu, nga usarenda ti tiempo ken sanikuada a tumulong iti sabsabali, ken dida makipaset kadagiti gubat dagiti nasnasion.—Mikias 4:1-4.

  • Ti pudno a relihion ket wagas ti panagbiag, saan laeng a ritual wenno pormalidad. Iyap-aplikar dagiti miembrona dagiti ikaskasabada.Roma 2:21; 1 Juan 3:18.

Dagiti Saksi ni Jehova a mangipabpablaak iti daytoy a magasin, ikagkagumaanda nga idaydayaw ti Dios iti panagsasao ken konduktada. Tapno makitam a mismo, awisendaka a tumabuno iti gimongda iti Kingdom Hall.

 

Ammuem ti Ad-adu Pay

GIMONG

Ania ti Maar-aramid iti Kingdom Hall?

Kitaem a mismo ti maar-aramid iti uneg ti Kingdom Hall.

MASANSAN A MAISALUDSOD

Kristiano Kadi Dagiti Saksi ni Jehova?

Pangngaasim ta ammuem no kasano a naidumakami kadagiti dadduma a relihion a maaw-awagan iti Kristiano.