Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! HULIO 2014

 NADISENIO KADI?

Ti Sistema ti Panaganak ti Gastric Brooding Frog

Ti Sistema ti Panaganak ti Gastric Brooding Frog

TI Australian gastric brooding frog ket naipagarup a naungaw wenno napukawen sipud pay idi 2002. Karkarna ti pamay-an dayta a tukak nga aganak. Tilmonen ti ina a tukak dagiti pertilisado nga itlogna sana padakkelen dagita iti tianna iti agarup 6 a lawas. Inton agangay, rummuaren iti ngiwatna dagiti sibubukel nga annakna a tukak.

Tapno saan a marunaw dagiti itlogna, masapul a saan a mangmangan ti ina a tukak ken isardeng ti tianna ti agpataud iti acid. Sigun iti ebidensia, dagiti kemikal nga iruruar dagiti itlog ken babassit pay nga annakna ti manglapped iti itataud ti acid.

Agarup 24 nga itlog ti isikogna. Inton aganaken, dagiti annakna ti mangbukel iti dandani 40% iti intero a dagsenna. Kapada dayta ti maysa a babai nga 68 a kilo ti timbangna sakbay a nagsikog iti 24 a maladaga nga agdagsen ti tunggal maysa iti 1.8 a kilo! Gapu iti kaadu ti annakna, aglobo ti tianna iti kasta unay nga uray la maipit dagiti barana isu a mapilitan nga aganges babaen iti kudilna.

Gagangay a rummuar dagiti babassit a tukak kalpasan ti sumagmamano nga aldaw inton kabaelandan. Ngem no adda madlaw ti ina a peggad, iyanakna idan babaen iti panangisaruana kadakuada. Naminsan, naobserbaran dagiti managsirarak ti maysa nga ina a nangipugso a namimpinsan iti 6 a maladaga a tukak iti kaadayo a maysa a metro.

Adda dagiti mangibagbaga a timmaud babaen iti ebolusion ti sistema ti panaganakna. No agpayso dayta, nagdakkel la ketdi dagiti panagbalbaliw a nasken koma a mamimpinsan nga aramidenna agpadpada iti pakabuklan ti bagina ken iti kababalinna. Insurat ti sientista ken ebolusionista a ni Michael J. Tyler: “Imposible a mapasamak ti nabuntog ken in-inut a panagbalbaliw ti sistema ti panaganakna. Masapul a nakaan-annayas dayta ta no saan, agpalia la ketdi.” Ti laeng rasonable nga eksplanasion kuna ni Tyler ket ti “mammaminsan ken nagdakkel a panagbalbaliw.” Kuna ti dadduma a dayta a nagdakkel a panagbalbaliw ket maawagan iti panamarsua. *

Ania ti makunam? Babaen kadi iti ebolusion a timmaud ti sistema ti panaganak ti gastric brooding frog? Wenno nadisenio dayta?

^ par. 7 Iti librona nga Origin of Species, kinuna ni Charles Darwin: “Mapasamak laeng ti natural selection (dagiti laeng kapigsaan ti matda) babaen ti babassit ken agsasaruno a panagbalbaliw; saan a pulos a mabalin ti . . . nagdakkel a panagbalbaliw.”