Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Mayo 2014

Damdamag iti Lubong

Damdamag iti Lubong

Southeast Asia

Sigun iti World Wildlife Fund, iti nagbaetan ti 1997 ken 2011, adu a baro a kita ti mulmula ken an-animal, agraman ti ruby-eyed pit viper (Trimeresurus rubeus), ti nadiskobre iti rehion ti Greater Mekong a mangsaklaw iti Cambodia, Laos, Myanmar, Thailand, Vietnam, ken iti probinsia ti Yunnan, China. Kadagiti nadiskobre idi 2011 laeng, 82 ti mulmula, 21 ti reptilia, 13 ti ikan, 5 ti ampibian, ken 5 ti mamalia.

Europe

Nagbalinen ti human trafficking a grabe a problema iti “intero a European Union,” kuna ti maysa a report iti The Moscow Times. Mailaklako dagiti tattao para iti seksual a pannakaabuso, puersado a panagtrabaho, ken uray iti “illegal a panangilako kadagiti paset ti bagi.” Gunggundawayan dagiti traffickers ti kinapanglaw, kinaawan trabaho, ken panangidumduma maigapu iti sekso.

New Zealand

Naammuan dagiti managsirarak a nangimbestigar iti panagbuya iti TV dagiti ubbing ken tin-edyer a ti sobra a panagbuya ket “adda pakainaiganna iti ikakaro ti naranggas a kababalin iti rugrugi ti kinaadulto.” Kuna dagiti managsirarak a ti natakuatanda ti mangsuportar iti singasing a dagiti ubbing ket agbuya iti ‘1-2 nga oras la koma iti de kalidad a pabuya ti kada aldaw.’

Alaska

Dandani amin nga “Alaska Native villages” ket adda iti igid ti baybay wenno asideg kadagiti karayan. Apektado iti layus ken panagreggaay ti daga ti 86% kadagita a purok. Ipakita dagiti report a gapu iti ingangato ti temperatura, malaplapdan ti pannakabukel dagiti mangsalaknib a dadakkel a yelo iti igid ti baybay wenno karayan isu a dagiti purok ket nalaklaka a mabagyo bayat ti Setiembre-Nobiembre.

Lubong

Nupay nagdakkel ti magasgastos kadagiti teknolohia para iti nadalus nga enerhia kas iti koriente a patauden ti angin ken init, “ti average ti kaadu ti mapatpataud nga enerhia ita ket kas karugit iti mapatpataud 20 a tawenen ti napalabas,” kuna ni Maria van der Hoeven nga executive director ti International Energy Agency.