Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Mayo 2014

 NO ANIA TI KUNA TI BIBLIA

Dagiti Pampanunotentayo

Dagiti Pampanunotentayo

Napateg kadi no ania ti pampanunotentayo?

“Mennamennaekto ti isuamin nga aramidmo ket kadagiti pannakilangenmo maseknanakto.”—Salmo 77:12.

TI KUNA TI TATTAO

Tapno agbalinka kano a naragsak ken kontento, adu dagiti mangisingasing nga agpanunotka iti nauneg wenno agmennamennaka. Adu ti kita ti panagpanunot wenno panagmennamenna. Dadduma kadagita ket nagtaud kadagiti nagkauna a relihion iti Daya. “Masapul a maiwaksi ti amin a linaon ti isip tapno makapanunot a naimbag,” kuna ti maysa a mannurat maipapan iti dayta a banag. Ipakita ti sasaona ti ideya a ti panangiwaksi iti isip iti aniaman a pampanunoten bayat a nakapokus dayta iti espesipiko a sasao wenno ladawan ket makatulong iti natalna a panagpanunot, nalawag nga isip, ken naespirituan a pannakalawlawag.

TI KUNA TI BIBLIA

Saan nga iparparegta ti Biblia kadatayo ti kita ti panagpanunot a mangikalikagum iti panangiwaksi iti amin a pampanunoten ti isip wenno panangulit-ulit iti maysa a sao wenno sasao, a maawagan no dadduma iti mantra. Imbes ketdi, parparegtaennatayo ti Biblia a kanayon koma a panunotentayo dagiti nasayaat a bambanag kas kadagiti kababalin, pagalagadan, ken pinarsua ti Dios. (1 Timoteo 4:15) “Minennamennak ti isuamin nga aramidmo; situtulokak a nangut-utob iti aramid dagiti bukodmo nga ima,” inkararag ti maysa a matalek nga adipen ti Dios. (Salmo 143:5) Kinunana pay: “No malaglagipka idi iti rabaw ti pagiddaak, bayat dagiti panagbantay iti rabii mennamennaenka.”—Salmo 63:6.

 Apay a makagunggona ti panangpanunot kadagiti nasayaat a bambanag?

“Ti puso daydiay nalinteg agmennamenna tapno makasungbat.”—Proverbio 15:28.

TI KUNA TI BIBLIA

Ti nasayaat a panagpanunot ket mangpasayaat iti personalidadtayo, iti abilidadtayo a mangkontrol iti emosion, ken iti determinasiontayo a mangaramid iti umiso. Amin dagita ket mangnayon iti pannakatarus ken pannakaawattayo iti panagsasao ken kababalintayo. (Proverbio 16:23) Makatulong met ngarud ti kasta a panagpanunot tapno naragsak ken makagunggona ti biagtayo. Maipapan iti tao a kanayon nga agpanunot maipapan iti Dios, kuna ti Salmo 1:3: “Agbalinto a kas iti kayo a naimula iti igid dagiti pagayusan ti danum, a mangipaay iti bukodna a bunga iti panawenna ket dagiti bulongna saan a malaylay, ket ti isuamin nga aramidenna agballiginto.”

Ti nauneg a panagpanunot ket mangpasayaat met iti pannakaawat ken memoriatayo. Kas pagarigan, no adalentayo ti maysa nga aspeto ti panamarsua wenno topiko iti Biblia, adu ti makapainteres a masursurotayo. Ngem no panunotentayo a naimbag dagita, makitatayo ti pakainaiganda iti maysa ken maysa ken iti nasursurotayon. Gapuna, no kasano a mapagbalin ti maysa a karpintero a napintas a balay ti nasinasina a materiales, tulongannatayo ti panagpanunot a “mangsangal” kadagiti impormasion tapno agbalin a naurnos nga estruktura.

Apay a masapul nga annadantayo no ania dagiti pampanunotentayo?

“Ti puso nagulgulib [mas traidor] ngem iti aniaman a banag ket desperado. Siasino ti makaammo iti dayta?”—Jeremias 17:9.

TI KUNA TI BIBLIA

“Manipud iti uneg, manipud iti puso dagiti tattao, rummuar dagiti makadangran a panagrasrason: dagiti pannakiabig, dagiti panagtakaw, dagiti panangpapatay, dagiti pannakikamalala, dagiti panagagum, dagiti aramid ti kinadangkes, allilaw, nalulok a kababalin, naapal a mata, . . . di kinanainkalintegan.” (Marcos 7:21, 22) Maitunos kadagita a sasao, masapul nga annadantayo no ania ti pampanunotentayo, no kasano nga annadantayo ti panagusartayo iti apuy. No saan, ti di umiso a pampanunot ket makapatanor kadagiti makapasakit a tarigagay a mabalin a narigat a kontrolen ken agresulta kadagiti dakes nga aramid.—Santiago 1:14, 15.

Iparegta ngarud kadatayo ti Biblia a panunotentayo dagiti ‘bambanag a napudno, nalinteg, nadalus, maay-ayat, naimbag, ken nadayaw.’ (Filipos 4:8, 9) No dagita a nagsayaat a banag ti panunoten ken imulatayo iti isiptayo, agapittayto kadagiti napipintas a kababalin, nasayaat a panagsasao, ken nadekket a relasion iti dadduma.—Colosas 4:6.