Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Marso 2014

Damdamag iti Lubong

Damdamag iti Lubong

Spain

Patien ti maysa a grupo dagiti sientista a dagiti aramid ti tattao ket mabalin nga adda nakainaiganna iti ginggined idi 2011 idiay Lorca, iti makin-abagatan nga Spain a nakatayan ti 9 ken nakadangranan ti adu. Natakuatan dagiti geologist nga adda koneksion ti makapapatay a ginggined ken dagiti lugar a nakaalaan iti nagadu a danum a naggapu iti uneg ti daga para iti irigasion.

China

Nakagasto iti $102 a bilion (U.S.) dagiti turista manipud China a nagpasiar iti nagduduma a pagilian idi 2012. Sigun iti UN World Tourism Organization, ipakita dayta nga iti umuna a gundaway, ti China ti kadakkelan iti nagasto para iti panagpasiar iti nagduduma a pagilian—a nanglab-aw iti Germany ken United States. Agarup $84 a bilion (U.S.) ti nagasto dagiti turista a naggapu iti tunggal maysa kadagita a pagilian.

Japan

Impadamag ti BMJ a medikal a magasin iti Britain a pinaliiw ti maysa a panagadal ti dandani 68,000 a tattao iti Japan iti average a 23 a tawen. Natakuatan dagiti managsirarak a dagiti babbai a nayanak manipud 1920-1945 a nangrugi a nagsigarilio sakbay a nag-20 anyosda ket 10 a tawen nga ab-ababa ti biagda ngem kadagiti babbai a saan a pulos nagsigarilio; 8 a tawen nga ab-ababa met kadagiti lallaki.

Mauritania

Naiparit ti panagangkat, panagaramid, ken panagusar kadagiti plastik a supot tapno masalakniban ti biag dagiti ikan ken animal a matay no makakaanda kadagita. Iparparegta ti gobierno ti panagusar kadagiti pagkargaan a marunaw.

Lubong

Iti kada tawen, nalugi iti agarup $50 a bilion (U.S.) dagiti kompania ti insurance kas resulta dagiti didigra gapu iti paniempo. Dagiti kasta a pannakalugi, a lalo a dimmakkel gapu iti ingingina dagiti presio ti gagatangen ken serbisio, ket mas nagdoble pay iti kada dekada sipud idi 1980’s.