Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! PEBRERO 2014

 SUHETO ITI AKKUB

No Kasano ti Kasayaatan a Panangusarmo iti Tiempom

No Kasano ti Kasayaatan a Panangusarmo iti Tiempom

“No ad-adu la koma ti tiempok!” Namin-anon a naibagam dayta? No maipapan iti tiempo, agpapada ti amin, mannakabalin man wenno nanumo, nabaknang man wenno napanglaw. Agpada a di makaurnong iti tiempo dagiti nabaknang ken napanglaw. No limmabasen, saanen a maisubli pay. Nainsiriban ngarud nga usarentayo a naimbag ti tiempotayo. Kasano? Usigem ti uppat a pamay-an a nakatulongen iti adu a nangusar a naimbag iti tiempoda.

1: Agbalin nga Organisado

Maaddaanka iti prioridad. ‘Siguraduenyo ti napatpateg a bambanag,’ imbalakad ti Biblia. (Filipos 1:10) Ilistam dagiti banag a napateg wenno naganat wenno agpada a kasta. Ngem laglagipem a mabalin a saan met a naganat ti banag a napateg kas iti pannakitienda. Mabalin a saan met a napateg ti kasla naganat a banag kas ti panangbuya iti paboritom a programa iti TV. *

Agplanoka. “No ti landok a rimienta ngumudel ket ti tademna saan nga inasa ti asinoman, ngarud gaedannanto nga usaren dagiti bukodna a kired,” kuna ti Eclesiastes 10:10, sana innayon: “Gapuna ti panangusar iti sirib tapno agballigi kaipapananna ti pagsayaatan.” Ti leksion? Babaen iti panangasam iti landok a rimientam, kayatna a sawen, babaen iti panagplanom a nasaksakbay, mausarmo ti tiempom iti kasayaatan a pamay-an. Itantan wenno isardengmon dagiti saan a napateg a banag a mangibus laeng iti panawen ken pigsam. No adda pay wayam ta nasapa a nairingpasmo ti trabahom, mabalin a rugiamon ti dadduma pay a nakaiskediul nga aramidem. No agplanoka a nasaksakbay, ad-adu ti maaramidam.

Pasimpliem ti biagmo. Sursuruem a pagkedkedan dagiti banag a saan a napateg wenno mangibus laeng iti panawenmo. Ad-adda a ma-stress-ka ken maksayan ti ragsakmo no adu unay ti aramidem ken asikasuem.

 2: Liklikan Dagiti Mangibus iti Tiempo

Panangitantan ken panagpangadua. “Ti mangsipsiput iti angin saanto nga agimula iti bin-i; ket ti kumitkita kadagiti ulep saanto nga agapit.” (Eclesiastes 11:4) Ti leksion? Ti panangitantan ket mannanakaw iti panawen ken iti maaramidan. No ur-urayen ti mannalon ti kasayaatan a paniempo, mabalin a saan a makapagmula wenno makaapit. Umasping iti dayta, mabalin nga agpangaduatayo gapu ta kayattay ti makasiguro. Wenno mabalin a kayattay pay nga ammuen ti amin a napateg nga impormasion sakbay nga agdesisiontayo. Siempre, dagiti napateg a desision ket masapul nga adalen ken panunoten a naimbag. “Daydiay nasaldet [wenno masirib] utobenna dagiti addangna,” kuna ti Proverbio 14:15. Ngem ti kinaagpaysuanna, ditay masierto dagiti resulta ti adu a desisiontayo.—Eclesiastes 11:6.

Perpeksionista. “Ti sirib manipud ngato [wenno Dios ket] . . . nainkalintegan,” kuna ti Santiago 3:17. Talaga a nasayaat a tarigagay ti maaddaan iti nangato nga ekspektasion! Ngem nalabit nangato unay dagita isu a maladingitan wenno maupayka pay ketdi no dimo maragpat dagita. Kas pagarigan, masapul nga ekspektaren ti maysa nga agsursuro iti sabali a lengguahe nga agkamali ken ammona a makasursuro kadagita. Ngem ti maysa a perpeksionista, ket mabalin a mabuteng nga agkamali isu a malapdan ti irarang-ayna. Nasaysayaat nga amang nga agbalintayo a rasonable kadagiti ekspektarentayo! “Ti sirib adda kadagidiay naemma,” kuna ti Proverbio 11:2. Saan met a serioso unay dagiti naemma ken napakumbaba ket kadawyanna a katawaanda dagiti kamalida.

“No gumatgatangka, saan a kuarta ti talaga a pagbaybayadmo no di ket ti panawenmo.”—What to Do Between Birth and Death

 3: Agbalin a Balanse ken Realistiko

Balansiem ti trabaho ken panaglinglingay. “Nasaysayaat ti sangarakem nga inana ngem iti dua a rakem a napinget a panagtrabaho ken panangkamkamat iti angin.” (Eclesiastes 4:6) Dagiti sobra ti kinagagetda nga agtrabaho ket masansan a papaidamanda ti bagida iti bunga ti ‘dua a rakem a napinget a panagtrabahoda.’ Awanen ti nabati a panawen wenno pigsada. Kaykayat met ti sadut ti “dua a rakem” nga inana ken saysayangenna ti napateg a tiempo. Iparparegta ti Biblia ti kinabalanse: Agtrabahoka a naimbag ket tagiragsakem dagiti gunggona a bunga dayta. Ti kasta a panangtagiragsak ket “sagut ti Dios.”—Eclesiastes 5:19.

Dika agpuypuyat. “Agiddaak ken maturogak a sitatalna,” kuna ti maysa a mannurat iti Biblia. (Salmo 4:8) Agarup walo nga oras a pannaturog iti rabii ti kasapulan ti kaaduan nga adulto tapno magunggonaan a naimbag ti bagi, emosion, ken isipda. Maipapan iti isip, napateg ti umdas a pannaturog agsipud ta pasayaatenna ti konsentrasion ken memoria ti maysa a tao isu a nalaklaka ti makasursuro. Ngem no kurang ti turogmo, marigatanka nga agsursuro ken nalakaka a maaksidente, agkamali, ken masuron.

Mangaramidka kadagiti kalat a kabaelam a maragpat. “Nasaysayaat ti pannakakita babaen kadagiti mata ngem ti panagpagnapagna ti kararua.” (Eclesiastes 6:9) Ti punto? Ti maysa a masirib ket saan nga agpakontrol kadagiti tarigagayna, nangruna no saan a realistiko wenno imposible a mapasamak dagita. Isu a saan nga agpaguyugoy kadagiti nasikap nga advertisement wenno nalaka a panagutang. Kontento ketdi iti kabaelanna a ragpaten.

 4: Agpaiwanwan Kadagiti Nasayaat a Prinsipio

Usigem dagiti prinsipiom. Tulongannaka dagiti prinsipiom a mangtingiting no ania ti nasayaat, napateg, ken makagunggona. No koma ti biagmo ket maysa a pana, dagiti prinsipiom ti mangiturong iti puntiria ti panam. Gapuna, dagiti nasayaat a prinsipiom ti makatulong kenka a mangaramid kadagiti makagunggona a prioridad iti biag ken mangusar iti tiempom iti tunggal oras ken aldaw iti kasayaatan a pamay-an. Pakasarakam kadagiti kasta a prinsipio? Adu ti agbasbasa iti Biblia gapu iti awan makaartap a sirib a linaonna.—Proverbio 2:6, 7.

Pagbalinem ti ayat a kangrunaan a prinsipiom. Ti ayat ti “naan-anay a singgalut ti panagkaykaysa,” kuna ti Colosas 3:14. Saan a pudpudno a naragsak ken natalged ti riknatayo no awan ti ayat nangruna iti pamilia. Dagiti di mangikabilangan iti dayta a kinapudno, a nalabit ipangpangrunada ti agpabaknang wenno ti propesionda, ket saanto la ketdi a naragsak. Wen, dayta ti gapuna a ti ayat ti kangrunaan a prinsipio iti Biblia ta uray la ginasut a daras a dinakamatna dayta.—1 Corinto 13:1-3; 1 Juan 4:8.

Mangitudingka iti panawen para iti Dios. Ni Geoff ket addaan iti nadungngo nga asawa, dua a nararagsak nga annak, nasingpet a gagayyem, ken nasayaat a trabaho kas paramediko. Ngem gapu iti trabahona, masansan a makakita kadagiti agsagsagaba ken matmatay. “Kastoy kadi a talaga ti biag?” naisaludsodna. Maysa nga aldaw, adda nabasana a naibasar-Biblia a literatura nga impablaak dagiti Saksi ni Jehova ket nasungbatan dagiti saludsodna.

Imbaga ni Geoff iti asawa ken annakna dagiti nasursurona ket nagbalinda met nga interesado. Ti intero a pamilia ket nakipagadal iti Biblia a nangpasayaat iti biagda ken nakatulong kadakuada tapno mas nainsiriban ti panangusarda iti tiempoda. Gapu iti panagadalda iti Biblia, naaddaanda met iti nagsayaat a namnama nga agbiag nga agnanayon iti lubong nga addaan panggep ti biag ken awanen ti panagsagaba.—Apocalipsis 21:3, 4.

Ti kapadasan ni Geoff ti mangipalagip kadatayo iti kinuna ni Jesu-Kristo: “Naragsak dagidiay sipapanunot iti naespirituan a kasapulanda.” (Mateo 5:3) Nakasaganaka kadi a mangilatang iti panawenmo para iti Dios? Dayta ti kasayaatan a pangusaram iti tiempom, saan laeng nga iti inaldaw, no di ket iti intero a panagbiagmo.

^ par. 5 Kitaem ti “20 a Pamay-an Tapno Ad-adu ti Tiempom” iti Abril 2010 a ruar ti Agriingkayo!