Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! PEBRERO 2014

 NO ANIA TI KUNA TI BIBLIA

Espiritismo

Espiritismo

Dakes kadi a padasen ti makisarita kadagiti natay?

“Dikay bumaw-ing kadagiti mannakiuman iti espiritu . . . iti kasta agbalinkayo a narugit babaen kadakuada.”Levitico 19:31.

TI KUNA TI TATTAO

Siempre, kayat dagiti tattao a masigurado a saan nga agsagsagaba ti natayen nga ipatpategda. Isu a kunada: “Apay a ditay padasen a kasarita babaen iti maysa nga espiritista, wenno mammadles? Mabalin a matulongannatayo a mangammo iti kasasaadna tapno agtalna ti panunottayo.”

TI KUNA TI BIBLIA

Nalawag ti kuna ti Biblia maipapan iti panangpadas dagiti sibibiag a makisarita kadagiti natay—a gagangay a maar-aramid idi un-unana. Kas pagarigan, kinuna ti Linteg ni Jehova a Dios iti nasion ti Israel: “Awan koma ti masarakan kenka nga asinoman . . . nga umuman iti mannakiuman iti espiritu wenno . . . agimtuod iti natay. Ta isuamin nga agar-aramid kadagitoy a banag ket nakarimrimon ken Jehova.” (Deuteronomio 18:10-12) Ibaga pay ti Biblia a dagidiay makipaspaset iti aniaman a kita ti espiritismo “saandanto a tawiden ti pagarian ti Dios.”—Galacia 5:19-21.

 Adda kadi maaramid dagiti natay kadagiti sibibiag?

“Dagiti sibibiag sipapanunotda a mataydanto; ngem no maipapan kadagiti natay, saanda a pulos sipapanunot iti aniaman.”—Eclesiastes 9:5.

TI KUNA TI TATTAO

Adu ti mangibagbaga a dagiti natay ket agtultuloy nga agbiag iti sabali a kita. Isu a mabalin a padasenda ti makisarita kadagiti natay nalabit tapno makaalada iti impormasion wenno maay-ayoda ida, iti kasta dida an-anuen dagiti sibibiag.

TI KUNA TI BIBLIA

“Dagiti sibibiag sipapanunotda a mataydanto; ngem no maipapan kadagiti natay, saanda a pulos sipapanunot iti aniaman . . . Ti ayatda ken ti gurada ken ti imonda [a nariknada idi sibibiagda pay] napukawen.” (Eclesiastes 9:5, 6) Wen, isursuro ti Biblia a dagiti natay ket talaga a natayen! Didan makapagpanunot, makapagtignay, wenno uray makapagdayaw iti Dios. “Dagiti met laeng natay saanda nga idaydayaw [ti Dios], wenno uray ti asinoman a bumabbaba iti kinaulimek,” kuna ti Salmo 115:17.

Saan kadi a husto met no dadduma ti ibagbaga dagiti espiritista?

[Rebbeng aya ti umuman] kadagiti natay a tattao maigapu kadagiti sibibiag a tattao?”—Isaias 8:19.

TI KUNA TI TATTAO

Para iti dadduma, kabaelan kano dagiti espiritista nga ibaga dagiti impormasion a ti laeng posible a makaammo ket ti natay ken ti pamilia wenno gagayyemna.

TI KUNA TI BIBLIA

Mabasa iti kapitulo 28 ti libro nga 1 Samuel no kasano a ti di matalek nga ari nga agnagan Saul sinukirna ti bilin ti Dios a saan nga agkonsulta kadagiti mannakiuman iti espiritu. Nagpatulong iti maysa a babai nga espiritista a kasla makabael a makisarita ken Samuel, ti natay idin a propeta ti Dios! Ngem talaga kadi a nakasaritana ni Samuel? Saan! Kinapudnona, isu ket nakisarita iti maysa nga impostor a mangtultulad iti natayen a ni Samuel.

Dayta nga impostor ket maysa a dakes nga espiritu nga us-usaren ni Satanas—“ti ama ti kinaulbod.” (Juan 8:44) Apay a pagparparangen dagiti dakes nga espiritu, wenno demonio, a sibibiag pay laeng dagiti natay? Kayatda ngamin a padaksen ti Dios ken pagparangen nga ulbod ti naisurat a Saona, ti Biblia.—2 Timoteo 3:16.

Kayat kadi a sawen dayta nga awanen namnama dagiti natay? Siempre, saan! Ikarkari ti Biblia a mapagungarto dagiti natay. * (Juan 11:11-13; Aramid 24:15) Kabayatanna, masiguradotayo a saan a pulos nga agsagsagaba dagiti natayen nga ay-ayatentayo iti biag.

^ par. 16 Ti kapitulo 7 ti libro nga Ania a Talaga ti Isursuro ti Biblia? ket napauluan “Ti Pudno a Namnama Dagiti Natayen a Patpatgem iti Biag.”

Ammuem ti Ad-adu Pay

Kabaelan Kadi ti Diablo a Kontrolen Dagiti Tattao?

Kasano a ti Diablo impluensiaanna dagiti tattao ken no kasanom a maliklikan dagiti palab-ogna?