Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! ENERO 2014

 NO ANIA TI KUNA TI BIBLIA

Panamarsua

Panamarsua

Innem la kadi nga aldaw a sagduduapulo ket uppat nga oras ti panangparsua ti Dios iti daga kas ibagbaga ti dadduma a creationist?

“Idi punganay, ti Dios pinarsuana ti langlangit ken ti daga.”—Genesis 1:1.

TI KUNA TI BIBLIA

Ti Dios pinarsuana ti uniberso, agraman ti daga, iti di masinunuo a napalabas a tiempo—“idi punganay,” kas kuna ti Genesis 1:1. Umanamong ti moderno a siensia nga adda nangrugian ti uniberso. Nabiit pay a pinattapatta dagiti sientista nga agtawenen dayta iti agarup 14 a bilion.

Deskribiren met ti Biblia ti innem nga “aldaw” ti panamarsua. Nupay kasta, saanna nga ibaga a buklen dagita iti sag-24 nga oras nga aldaw. (Genesis 1:31) Kinapudnona, ti sao nga “aldaw” a nausar iti Biblia ket tumukoy iti nagduduma a kapaut ti panawen. Kas pagarigan, inawaganna ti intero a panawen ti panamarsua kas ti “aldaw a ni Jehova a Dios inaramidna ti daga ken langit.” (Genesis 2:4) Nalawag ngarud a dagiti “aldaw” ti panamarsua ket buklen ti rinibu a tawen.—Salmo 90:4.

NO APAY A PAKASEKNAM

Dagiti di umiso nga opinion dagiti creationist ket mabalin a mangimpluensia kenka tapno saanmon a pulos a patien ti Biblia. Ngem no ti Biblia ket agpayso a naglaon iti mapagtalkan a salaysay maipapan iti panamarsua, magunggonaanka iti adu a ‘praktikal a siribna.’—Proverbio 3:21.

 Ebolusion kadi ti inusar ti Dios a nangparsua iti biag ditoy daga?

“Kinuna ti Dios: ‘Ti daga pataudenna koma dagiti sibibiag a kararua sigun kadagiti kakikitada.’”—Genesis 1:24.

TI KUNA TI BIBLIA

Ti Dios saanna a pinarsua ti biag iti maymaysa a simple a porma sa binay-anna nga in-inut nga umadu ken agbalin a nadumaduma a komplikado a porma. Imbes ketdi, pinarsuana ti amin a kangrunaan a ‘kakikita’ dagiti komplikado a mula ken animal, ket agpaadu dagitoy “sigun kadagiti kakikitada.” (Genesis 1:11, 21, 24) Gapu iti daytoy a proseso, nga agtultuloy agingga ita, napno ti daga iti isu met laeng a ‘kakikita’ ti biag nga orihinal a pinarsua ti Dios.—Salmo 89:11.

Saan a nadakamat iti Biblia no kasano kadakkel ti pagbalbaliwan ti maysa a kakikita, a kas iti mabalin a resulta no dagiti animal nga agpada ti kakikitana ngem agduma ti pulina ket agasawa ken makibagayda iti aglawlaw. Nupay ibilang ti dadduma dayta kas porma ti ebolusion, awan ti napataud a baro a kita ti biag. Pasingkedan ti moderno a panagsirarak a bassit laeng ti nagbalbaliwan dagiti kangrunaan a kategoria dagiti mula ken animal iti unos ti din mabilang a panawen.

NO APAY A PAKASEKNAM

Gapu ta maitunos iti siensia ti panangdeskribir ti Biblia maipapan kadagiti kangrunaan a ‘kakikita’ ti biag, nakappapati met ti Biblia iti dadduma pay a banag, kas iti historia ken padto.

Naggapuan ti material a nausar iti pannakaparsua ti uniberso?

“Dagiti bukodko nga ima inyunnatda ti langlangit.”—Isaias 45:12.

TI KUNA TI BIBLIA

Ti Dios ti Gubuayan ti awan inggana a pannakabalin, wenno enerhia. (Job 37:23) Napateg daytoy gapu ta naammuan dagiti sientista a ti enerhia ket mapagbalin a materia (matter). Kuna ti Biblia a ti Dios a mismo ti Gubuayan ti ‘naruay a dinamiko nga enerhia’ a nangpataud iti uniberso. (Isaias 40:26) Inkari ti Dios nga usarenna ti pannakabalinna a mangsustiner kadagiti parsuana. Kuna ti Biblia maipapan iti init, bulan, ken bitbituen: “[Ti Dios] pagtalinaedenna ida iti agnanayon, agingga iti tiempo a di nakedngan.”—Salmo 148:3-6.

NO APAY A PAKASEKNAM

Kinuna ti astronomo a ni Allan Sandage: “Saan a masungbatan ti siensia dagiti karirigatan a saludsod. No saludsodem no apay a timmaud ti uniberso, saanna a mailawlawag dayta.” Ngem ti Biblia, kabaelanna nga ilawlawag ti panamarsua iti wagas a maitunos iti siensia. Sungbatanna pay dagiti saludsod a saan a masungbatan ti siensia kas iti, Ania ti panggep ti Dios para iti daga ken iti sangatauan? *

^ par. 16 Para iti ad-adu pay nga impormasion, kitaem ti kapitulo 3 ti libro nga Ania a Talaga ti Isursuro ti Biblia? nga impablaak dagiti Saksi ni Jehova.

Ammuem ti Ad-adu Pay

Ania ti Panggep ti Dios Para iti Daga?

Ilawlawag ti Biblia no apay a pinarsua ti Dios ti daga, no kaano nga agpatingga ti panagsagaba, ken no ania ti agur-uray iti masanguanan para iti daga ken dagiti agnaed iti dayta.

Siasino ti Dios?

Adda kadi nagan ti Dios ken maseknan kadi kadatayo?