Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! ENERO 2014

 INTERBIU | FENG-LING YANG

No Apay a Mamati iti Dios ti Maysa a Microbiologist

No Apay a Mamati iti Dios ti Maysa a Microbiologist

Ni Feng-Ling Yang ket maysa a senior research assistant iti central research academy iti Taipei, Taiwan. Naipablaaken dagiti gapuananna kadagiti pagiwarnak maipapan iti siensia. Mamati idi iti teoria ti ebolusion ngem nagbalbaliw dayta. Ininterbiu ti Agriingkayo! maipapan iti siensia ken no apay a mamati iti Dios.

Ibagam man kadakami ti biagmo idi ubingka pay.

Nakakurkurapay dagiti nagannakko, ken saan nga ammo ni nanangko ti agbasa. Agtartarakenkami idi kadagiti baboy ken agmulmula ti natnateng iti lalayusen a lugar nga asideg iti siudad ti Taipei. Insuro kaniak dagiti nagannakko ti kinapateg ti kinagaget ken sinuruandak pay a tumulong iti sabsabali.

Relihioso kadi ti pamiliam?

Taoismo ti relihionmi. Agat-atangkami idi iti “Nailangitan a Dios” ngem awan a pulos ti ammomi maipapan kenkuana. Sangkapanunotko idi: ‘Apay ngata nga agsagsagaba dagiti tattao? Apay a ti la bagbagida ti pampanunoten dagiti tattao?’ Binasak dagiti libro maipapan iti Taoismo, Budismo, ken ti pakasaritaan dagiti pagilian iti Laud ken Daya. Nakimismisaak pay ketdi iti nadumaduma a relihion. Ngem saan latta a nasungbatan dagiti saludsodko.

Apay nga inadalmo ti siensia?

Magustuak ti matematika ken pagsidsiddaawak dagiti pisikal ken kemikal a linteg a mangkonkontrol iti pakabuklan dagiti bambanag. Isuamin, manipud iti naglawa nga uniberso agingga kadagiti nagbabassit a mikrobio, adda pakabuklanda ken adda dagiti pagannurotan a mangkonkontrol kadagita ket kayatko a matarusan dagita.

Apay a mamatika idi a pudno ti teoria ti ebolusion?

Awan ngamin ti sabali a pagpilian a naisuro kaniak. Manipud haiskul agingga iti unibersidad, ti ebolusion laeng ti mangmangngegko nga ilawlawagda. Ken gapu ta maysaak a researcher iti life science, manamnama idi nga akseptarek ti ebolusion.

Gapu ta maysaak a researcher iti life science, manamnama idi nga akseptarek ti ebolusion

Apay a rinugiam a binasa ti Biblia?

Idi 1996, napanak idiay Germany tapno rugiak ti postgraduate  studies-ko. Iti simmaganad a tawen, naam-ammok ti maysa a babai nga agnagan Simone a maysa kadagiti Saksi ni Jehova. Impakitana kaniak dagiti sungbat ti Biblia kadagiti saludsodko. Naginteresak idi imbagana nga ilawlawag ti Biblia ti panggep ti biag. Sipud idin, pinarbangonen a bumangonak iti 4:30 tapno agbasa iti Biblia iti maysa nga oras. Kalpasanna, agpagnapagnaak tapno agpanunotak a naimbag. Iti simmaruno a tawen, nabasak ti intero a Biblia. Bilibak iti kinaumiso dagiti padtona. In-inut a nakombinsirak a ti Biblia ket nagtaud iti Dios.

Ania dagiti napanunotmo maipapan iti nagtaudan ti biag?

Bayat a pinampanunotko a naimbag daytoy idi maudi a paset ti 1990’s, naamiris dagiti molecular biologist a mas komplikado gayam ti chemistry dagiti sibibiag a banag ngem iti dati a pagarupda. Siempre, nabayagen nga ammo dagiti sientista a dagiti protina kadagiti sibibiag a selula ti kakomplikaduan a molekula. Ngem taktakuatenda itan no kasano a ti intero a grupo dagiti protina ket organisado a mangbukel kadagiti nagsayaat a makina nga addaan kadagiti agan-andar a piesa. Nasurok a 50 a protina ti mabalin a mangbukel iti maysa a makina dagiti molekula. Ken uray ti kasimplean a selula ket agkasapulan iti agduduma a makina—kas pagarigan, tapno mangpataud iti enerhia, tapno mangkopia iti impormasion, ken tapno mangkontrol iti aniaman a sumrek kadagiti kulapot.

Ania ngay ti konklusionmo?

Pinampanunotko, ‘Apay a nagsayaat ti pannakadisenio dagita a makina ti protina?’ Iti dayta a tiempo, kasta met laeng ti saludsod ti adu a sientista gapu iti dida ninamnama a kinakomplikado ti pakabuklan ti selula. Adda propesor ti biochemistry iti United States a nangipablaak iti libro a mangikalintegan a komplikado dagiti makina ti molekula kadagiti sibibiag a selula isu a saan a mabalin a basta timmaud lattan dagita. Mamatiak iti dayta. Kombinsidoak a talaga a naparsua ti biag.

Pinampanunotko, ‘Apay a nagsayaat ti pannakadisenio dagita a makina ti protina?’

Apay a nagbalinka a maysa kadagiti Saksi ni Jehova?

Bilibak ta uray adda idi sakit ni Simone, linawas nga umaynak latta iyadalan iti Biblia uray no agbiahe iti 56 a kilometro. Naammuak a bayat ti panagturay dagiti Nazi iti Germany, adda dagiti Saksi a naibalud kadagiti kampo konsentrasion gapu ta neutralda iti politika. Nagustuak unay ti kinaturedda. Gapu iti panagayat dagiti Saksi iti Dios, kayatko ti agbalin a maysa kadakuada.

Adda kadi naitulong kenka ti panamati iti Dios?

Kuna dagiti katrabahuak a naragragsakak itan. Nababa ngamin idi ti panagkitak iti bagik isu a diak imbagbaga no sadino ti dimmakkelak ken no siasino dagiti nagannakko. Ngem naadalko iti Biblia a saan a ti kasasaad ti biag ti maysa a tao ti napateg iti Dios. Kinapudnona, ni Jesus ket napadakkel iti nalabit nakurapay a pamilia a kas kaniak. Ay-aywanak itan dagiti nagannakko ken maragragsakanak a mangyam-ammo kadakuada kadagiti gagayyemko.

Ammuem ti Ad-adu Pay