Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! ENERO 2014

Damdamag iti Lubong

Damdamag iti Lubong

Sub-Saharan Africa

Sigun iti report ti UNICEF maipapan iti abagatan ti Sahara iti Africa, “38% laeng kadagiti ubbing nga awan pay 5 ti tawenda ti addaan iti birth certificate.” Ngem iti dadduma a paset dayta a lugar, “nagpateg ti pannakairehistro ti pannakayanak tapno makapagpaagas, makapageskuela, ken maala dagiti ulila ti tawidda iti nagannakda,” kuna ni Elke Wisch a deputy regional director ti UNICEF iti makindaya ken makin-abagatan nga Africa.

Italy

Sigun iti maysa a surbey, ti cyberbullying ti kangrunaan a pagbutbutngan dagiti tin-edyer nga Italiano. Kadagiti agtawen iti 12-17, kuna ti 72% a pagbutbutnganda dayta. Dakdakkel dayta a porsiento ngem kadagidiay mabuteng a mabiktima iti droga (55%), seksual a panangmolestia ti adulto (44%), wenno maakaran iti sexually transmitted disease (24%).

Japan

Impadamag ti The Japan Times nga umad-adu dagiti agkabannuag a Hapones ti di mayat a mai-promote iti trabaho. Kagura ti 40% ti kinaawan dagiti nasayaat a prinsipio ken ti nasaknap a panagkusit. Adu nga empleado ti bumdeng a makisarita kadagiti boss-da. Idi, uray la aglaklakayen dagiti empleado iti trabahoda. Ngem ita, agtaltalinaed laeng iti trabahoda ti 60% kadagiti agkabannuag nga empleado bayat nga awan pay nakitada a nasaysayaat a pagtrabahuanda.

Brazil

Manipud 1980 agingga 2010, dandani 800,000 a tattao ti natay gapu kadagiti paltog iti Brazil. Agtawen iti 15-29 ti nasurok nga 450,000 a biktima. Ipakita ti maysa a panagadal kadagiti nabiit pay a krimen a ti panangpapatay ket masansan a maigapu kadagiti apa iti pagtaengan, riri kadagiti kaarruba, imon, wenno panagsupiat dagiti drayber.