Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Disiembre 2013

 NO ANIA TI KUNA TI BIBLIA

Jesus

Jesus

Ni Jesus kadi ti Dios?

“Awan ti tao a nakakita iti Dios uray kaano.”—Juan 1:18.

TI KUNA TI TATTAO

Adu ti mamati a saan a ni Jesus ti Dios. Ngem kuna ti dadduma nga adda dagiti teksto iti Biblia a mangipasimudaag kano a ni Jesus ket kapada ti Dios.

TI KUNA TI BIBLIA

Awan nadakamat iti Biblia a ni Jesus ket Mannakabalin-amin a Dios wenno kapada ti Dios. Silalawag ketdi nga isurona a nababbaba ni Jesus ngem iti Dios. Kas pagarigan, nailanad iti Biblia ti kinuna a mismo ni Jesus: “Ti Ama dakdakkel ngem siak.” (Juan 14:28) Kuna pay ti Biblia: “Awan ti tao a nakakita iti Dios uray kaano.” (Juan 1:18) Saan a mabalin a ni Jesus ti Dios ta adu a tattao idi ti talaga a nakakita ken Jesus.

Saan nga imbaga dagiti nagkauna a pasurot ni Jesus nga isu ti Dios. Kas pagarigan, kastoy ti kinuna ti mannurat iti Ebanghelio a ni Juan maipapan kadagiti inlanadna: “Naisurat dagitoy tapno patienyo koma a ni Jesus isu ti Kristo nga Anak ti Dios.”Juan 20:31. *

 Kaano a nayanak ni Jesus?

“Adda . . . idi dagiti pastor nga aggigian iti ruar ken agbambantay iti rabii kadagiti arbanda.”—Lucas 2:8.

TI KUNA TI TATTAO

Dadduma ti mangrambak iti Krismas iti Disiembre 25—ti ipagarupda a petsa ti pannakayanak ni Jesus. Adda met dagidiay mangselebrar iti dayta iti rugrugi ti Enero.

TI KUNA TI BIBLIA

Saan nga ibaga ti Biblia ti petsa ti pannakayanak ni Jesus. Ngem kunana nga idi aldaw a nayanak ni Jesus, “adda . . . idi dagiti pastor nga aggigian iti ruar ken agbambantay iti rabii kadagiti arbanda.” (Lucas 2:8) Imposible a mapasamak dayta kabayatan ti rabii ti Disiembre ken Enero. Apay?

Karaman dagita kadagiti kalam-ekan a bulan iti lugar a nakayanakan ni Jesus. Sigun iti Biblia, kabayatan dagita a bulan, dagiti tattao “agtigtigergerda . . . maigapu kadagiti dumayasadas a tudo.” (Esdras 10:9, 13; Jeremias 36:22) Sigurado a saan nga iti dayta a paset ti tawen nga “aggigian iti ruar” dagiti pastor ken dagiti arbanda.

Talaga kadi a nagbiag manen ni Jesus kalpasan a natay?

Ni Jesus ket “imbangon ti Dios manipud kadagiti natay.”—Aramid 3:15.

TI KUNA TI TATTAO

Patien ti dadduma nga imposible a ti siasinoman, a pakairamanan ni Jesus, ket agbiag manen kalpasan ti ipapatayna.

TI KUNA TI BIBLIA

Imbaga ni Jesus kadagiti pasurotna nga isu “agsagaba iti adu a banag . . . ket mapapatay, ket iti maikatlo nga aldaw maibangon.” (Mateo 16:21) Kuna ti Biblia a kalpasan a napapatay ken napagungar, nagpakita ni Jesus iti nasurok a 500 a tattao. (1 Corinto 15:6) Talaga a kombinsido dagidiay a nakasaksi nga isu ket nagungar. Nakasaganada pay ketdi a matay para iti dayta a patpatienda!—Aramid 7:51-60; 12:1, 2.

APAY A PAKASEKNAM?

Isursuro ti Biblia a maigapu iti ipapatay ken panagungar ni Jesus, naluktan ti gundaway para iti amin a tattao a magunggonaan iti Paraiso a daga nga inkari ti Biblia. (Salmo 37:11, 29; Apocalipsis 21:3, 4) Addaantayo iti namnama a naragsak ken agnanayon a biag iti dayta a Paraiso a daga maigapu iti ayat nga impakita ni Jesus ken ti Amana, ti Mannakabalin-amin a Dios a ni Jehova.—Juan 3:16; Roma 6:23.

^ par. 7 Saan nga isursuro ti Biblia a ti Dios ket addaan iti literal nga asawa a nagbalin nga ina dagiti annakda. Inawaganna ketdi ni Jesus kas ti “Anak ti Dios” yantangay direkta a pinarsua ti Dios ken addaan kadagiti galad nga umasping ken Amana.