Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

AGRIINGKAYO! NOBIEMBRE 2013

Panangsango Kadagiti Problema a Nainaig iti Menopause

Panangsango Kadagiti Problema a Nainaig iti Menopause

“Kellaat lattan a malidayanak unay idi nga awan gapgapuna. Nagsangitak ket napanunotko nga agbagtitak sa metten.”—Rondro, * 50 anyos.

“No makariingkan iti agsapa, makitam a nakawarwara ti balayyo. Dimo masarakan dagiti aruatem. Dagiti laklakaem idi nga aramiden ket kasla nakarigrigat itan ken dimo ammo no apay.”—Hanta, 55 anyos.

AWAN sakit dagita a babbai. Imbes ketdi, mapaspasamak kadakuada ti panagbalbaliw a mapasaran ti ag-menopause, maysa a natural a panagbalbaliw iti biag ti babai ken no agsardengen ti panagreglana. No maysaka a babai, dandanika kadin ag-menopause, wenno agmen-menopause-kan? Aniaman ti kasasaadmo, no ad-adu ti ammom ken dagiti ay-ayatem maipapan iti menopause, ad-adda a kabaelam a sanguen dagiti problema a nainaig iti dayta.

Panagbalbaliw a Mapasaran ti Ag-menopause

Karaman iti panagbalbaliw a mapasaran ti ag-menopause, a maawagan met iti perimenopause, ti panawen sakbay ti panag-menopause ken ti mismo a panag-menopause. * Ngem kadawyan a maus-usar ti “menopause” iti intero a panagbalbaliw.

Kaaduan a babbai ti mangrugin a makapasar iti perimenopause no nasurokdan a 40 anyos, ngem ti dadduma ket uray nasurokdan a 60 anyos. Kaaduanna, in-inut nga agsardeng ti panagregla. Gapu iti iregular a panagpataud kadagiti hormones, mabalin nga iregular ti regla ti maysa a babai, di ninamnama nga agregla, wenno nabuslon unay ti reglana. Adda met sumagmamano a basta kellaat lattan a din agregla.

“Agduduma ti mapasaran ti tunggal babai,” kuna ti Menopause Guidebook. Kunana pay: “Ti panagbara ti bagi wenno hot flash (maawagan no dadduma iti hot flush) ti kadawyan unay a mapasaran dagiti agmen-menopause,” a mabalin a sarunuen ti panagtigerger gapu iti lammin. Makasinga iti pannaturog ken makapakapsut dagita a sintoma.  Kasano kapaut a mapasaran dagita? Sigun iti The Menopause Book, “adda babbai a pasaray makapasar iti hot flashes iti las-ud ti maysa wenno dua a tawen ti panagbalbaliw a mapasaran ti ag-menopause. Ti met dadduma ket makapasar iti kasta iti adu a tawen, ken manmano laeng ti nangibaga a nagtultuloy ti pasaray pannakariknada iti dayta.” *

Gapu iti iregular a panagpataud kadagiti hormones, mabalin met a madepres ken agbaliwbaliw ti rikna ti maysa a babai isu a masansan nga agsangit, marigatan nga agpokus, ken pasaray makalipat. Ngem “adayo ti posibilidad a mapasaran ti maysa a babai amin dagita,” kuna ti The Menopause Book. Kinapudnona, adda dagiti makapasar iti sumagmamano kadagita a problema, no adda man.

No Kasano a Sanguen

Mabalin a makatulong ti simple a panangbalbaliw iti estilo ti panagbiag. Kas pagarigan, mabalin a maksayan ti hot flashes no isardeng ti panagsigarilio. Makatulong met no limitaran wenno interamenten a liklikan ti arak, caffeine, ken dagiti nagasang wenno nasam-it a taraon, a mamagkidar iti hot flashes. Siempre, napateg met ti pannangan iti balanse ken nadumaduma a taraon.

Dakkel met ti maitulong ti panagehersisio a mangkissay kadagiti sintoma ti menopause. Kas pagarigan, mabalin a sumayaat ti pannaturog ken riknam. Tumibker met dagiti tulangmo ken sumayaat ti salun-atmo. *

Ibagam ti Marikriknam

“Dimo bukbukodan ti marikriknam,” kinuna ti nadakamat itay a ni Rondro. “No ibagam dayta kadagiti ay-ayatem, saanda unay nga agdanag no makitada ti mapaspasamak kenka.” Kinapudnona, agbalinda a naan-anus ken ad-adda a mannakaawat. “Ti ayat naanus ken naasi,” kuna ti 1 Corinto 13:4.—Ti Baro a Naimbag a Damag Biblia.

Ti panagkararag ket nakatulong met iti adu a babbai, agraman kadagidiay malmaldaang ta didan mabalin ti agsikog. Ti Dios ti ‘mangliwliwa kadatayo iti amin a rigat,’ ipasigurado kadatayo ti Biblia. (2 Corinto 1:4) Makaliwliwa met a maammuan a temporario laeng ti panagbalbaliw a nainaig iti menopause. Kalpasanna, dagiti babbai nga agtultuloy a mangaywan iti salun-atda ket mabalin a sumaranta manen ken maaddaan iti ad-adu pay a tawen ti naragsak a panagbiag.

^ par. 2 Nabaliwan dagiti nagan.

^ par. 6 Ibilang dagiti doktor a nag-menopausen ti maysa a babai no 12 a bulanen a saan a nagregla.

^ par. 8 Mabalin met a pakaigapuan ti hot flashes ti sumagmamano a sakit, kas iti sakit iti thyroid ken dagiti impeksion, agraman ti dadduma nga agas. Nasaysayaat no masierto nga umuna a saan a dagita ti makagapu sakbay a maipagarup a dagiti hot flashes ket gapu iti menopause.

^ par. 12 Tapno matulonganda dagiti pasienteda a makapaspasar iti panagbalbaliw a nainaig iti menopause, mabalin a mangireseta dagiti doktor iti nadumaduma a produkto, kas kadagiti hormones, dietary supplements, ken antidepressants. Saan a mangirekrekomenda ti Agriingkayo! iti aniaman a produkto wenno therapy.