Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! NOBIEMBRE 2013

Damdamag iti Lubong

Damdamag iti Lubong

Germany

Idi 2012, imbilin ti maysa kadagiti kangatuan a korte iti Germany a dagiti umili ket saan a mabalin a pormal nga umikkat iti relihion a maysa a pangpubliko a korporasion ti status-na sa agtalinaed latta a miembro iti dayta a narelihiosuan a komunidad. Dagiti Katoliko a din agbaybayad iti buis gapu ta pormal nga immikkatdan iti relihionda ngem an-annurotenda pay laeng ti pammatida ket mabalin a maparitan nga agkomunion, agkompesar, agtakem kadagiti annongen, ken posible a saan payen a maipaayan iti misa no maipumponda.

Lubong

Sigun iti maysa a panagadal kadagiti relihion iti lubong, 1.1 a bilion itan ti bilang dagiti tattao a “saan a miembro ti maysa a relihion,” nupay saanda met ketdi nga ateista. Maikatloda iti Kristianidad nga addaan iti 2.2 a bilion ken iti Islam a 1.6 a bilion ti miembrona. Maikapat ti Hinduismo nga addaan iti agarup 1 a bilion a miembro.

Japan

Ipakita ti panagadal dagiti Hapones a sientista a no ti maysa ket “mapadpadayawan, magutugot dagiti paset ti utek” a pakaigapuan ti “pannakarikna iti kinaragsak.” Agparang a paneknekan dayta ti opinion a ti panangpadayaw ket maysa a nasayaat a pamay-an tapno matignay ti tattao a mangpasayaat pay iti ar-aramidenda.

Bolivia

Idi maudi a paset ti 2012, nangaramid ti Bolivia iti nasional a sensus. Tapno umiso ti maala a bilang, dagiti umili ket nabilin nga agtalinaed iti balayda iti aldaw a maaramid ti sensus. Naiparit met ti yiinum iti arak ken panagbiahe dagiti pribado a lugan sa naiserra dagiti border.

Italy

Iti maysa a surbey, kinuna dagiti Italiano, nga iti average, makiay-ayamda kadagiti annakda iti 15 a minuto kada aldaw. “Maysa laeng iti kada 5 a nagannak ti mamati a makaisuro ti panagay-ayam,” kuna ti La Repubblica. Sigun ken Andrea Angiolino a propesional a diseniador iti board games, babaen iti panagay-ayam, matulongan dagiti nagannak ti annakda a mangparang-ay iti imahinasionda ken masursuroda ti agtulnog kadagiti pagannurotan.