Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Oktubre 2013

 NO ANIA TI KUNA TI BIBLIA

Depresion

Depresion

Ania ti depresion?

“Malagawanak idi, naparukobak iti napalalo; iti intero nga agmalem nagpagnapagnaak a sililiday.”—Salmo 38:6.

TI KUNA DAGITI MANAGSIRARAK

Pasaray malidayan ti tunggal maysa kadatayo, ngem ti clinical depression ket makapakapsut a sakit nga agpaut ken manglapped iti inaldaw nga aktibidad ti tao. Ngem saan nga agpapada ti kapanunotan ti amin nga eksperto maipapan iti makuna a “normal” a kinaliday ken no ania ti “sakit.” Nupay kasta, adda la ketdi tattao a makarikna iti nakaro a panagleddaang, a no dadduma mariknada pay nga awan serserbida ken nakaro ti panangsidir ti konsiensiada.

TI KUNA TI BIBLIA

Kuna ti Biblia nga adu a lallaki ken babbai ti nakapasar iti nakaro a panagleddaang. Kas pagarigan, narikna ni Anna a “sipapait ti kararuana”—sasao a naipatarus kas “masnaayan ti pusona” ken “maladingitan unay.” (1 Samuel 1:10) Iti maysa a gundaway, napalalo ti panagladingit ni Elias nga uray la inkararagna nga alaen koman ti Dios ti biagna!—1 Ar-ari 19:4.

Naibilin kadagiti nagkauna a Kristiano nga ‘agsaoda iti makaliwliwa kadagiti malmaldaangan a kararua.’ (1 Tesalonica 5:14) Sigun iti maysa a reperensia, ti termino a “malmaldaangan a kararua” ket mabalin a tumukoy kadagidiay “temporario a linapunos dagiti pakadukotan ti biag.” Nalawag nga adda met dagiti tiempo a nadepres uray dagiti matalek a lallaki ken babbai idi panawen ti Biblia.

 Basol kadi ti maysa ti depresionna?

“Ti intero a sangaparsuaan agtultuloy nga agas-asug a sangsangkamaysa ken agpapaut-ot a sangsangkamaysa.”—Roma 8:22.

TI KUNA TI BIBLIA

Isursuro ti Biblia a ti sakit ket resulta ti isusukir ti immuna a pagassawaan. Kas pagarigan, kuna ti Salmo 51:5: “Buyogen ti biddut naipasngayak a nabuyogan kadagiti panagpasikal, ket iti basol inyinawnak ni inak.” Ilawlawag met ti Roma 5:12 a “babaen iti maysa a tao [ti umuna a tao a ni Adan] simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.” Gapu ta natawidtayo ti kinaimperpekto ni Adan, amintayo ket agsakit iti pisikal ken emosional. Kas resultana, kuna ti Biblia a “ti intero a sangaparsuaan agtultuloy nga agas-asug a sangsangkamaysa ken agpapaut-ot a sangsangkamaysa.” (Roma 8:22) Ngem adda namnama nga ituktukon ti Biblia a di maipaay ti asinoman a doktor—ti kari ti Dios a natalna a baro a lubong a sadiay awanton ti amin a kita ti an-annayen ken sakit, agraman depresion.—Apocalipsis 21:4.

Kasano a madaeram ti depresion?

“Ni Jehova asideg kadagidiay nadunor ti pusoda; ket dagidiay a naidagel iti espiritu isalakanna.”—Salmo 34:18.

APAY A PAKASEKNAM?

Saanmo a kanayon a kontrolado ti kasasaadmo, ken adda dagiti dakes a mapasamak kenka no dadduma. (Eclesiastes 9:11, 12) Ngem adda dagiti mabalinmo nga aramiden tapno madaeram dagiti negatibo a rikna.

TI KUNA TI BIBLIA

Kuna ti Biblia a dagiti masakit kasapulanda ti mangngagas wenno doktor. (Lucas 5:31) Isu a no agpaspasarka iti nakaro a sakit iti emosion, awan pagdaksanna no agpadoktorka. Igunamgunam met ti Biblia ti pateg ti panagkararag. Kas pagarigan, kuna ti Salmo 55:22: “Ipalladawmo ti dadagsenmo ken Jehova a mismo, ket isu saranayennakanto. Saannanto a pulos ipalubos nga agdiwengdiweng daydiay nalinteg.” Ti kararag ket saan laeng a maysa a pamay-an a pangpasayaat iti rikna; aktual dayta a pannakisarita ken Jehova a Dios, nga “asideg kadagidiay nadunor ti pusoda.”—Salmo 34:18.

Mabalin a makatulong met kenka ti panangyebkasmo iti riknam iti nasinged a gayyemmo. (Proverbio 17:17) “Sidudungngo a pinaregtanak ti maysa a kapammatiak nga estoriaek kenkuana ti maipapan iti depresionko,” kuna ni Daniela, a maysa kadagiti Saksi ni Jehova. “Uray adun a tawen a likliklikak ti kasta a saritaan, naamirisko a dayta ti kasapulak. Talaga a nabang-aranak kalpasanna.”

Ammuem ti Ad-adu Pay

AGRIINGKAYO!

Ti Masapul a Maammuam Maipapan Kadagiti Sakit ti Isip

Siam nga addang a makatulong tapno ad-adda a mapagballigian ti sakit ti isip.