Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! OKTUBRE 2013

 SUHETO ITI AKKUB

Tallo a Banag a Saan a Magatang ti Kuarta

Tallo a Banag a Saan a Magatang ti Kuarta

NAKASKASDAAW unay ta uray no agngangabit a maawanan dagiti tattao iti trabaho, balay, ken uray pensionda, adu kadakuada ti agporsegi latta a maaddaan iti amin a banag a magatang ti kuarta.

Dagiti kasta ket nalaka a biktimaen dagiti advertisers, a mangar-aramid kadagiti makaguyugoy a patalastas a mangibagbaga a masapul a maaddaantayo iti dakdakkel a balay, napimpintas a lugan, ken nalatak ti tatakna a kawes. Awan kuartam? Saan a problema dayta. Di utangem! Para iti adu, kayatda ti agparang a nabaknang uray no nailumlomda met iti utang.

Ngem di agbayag, rummuaren ti kinapudno. “Ti panaggatang kadagiti agkakangina a produkto babaen iti credit card tapno agparangka a nabaknang ket kas iti panagdroga tapno sumayaat ti riknam,” kuna ti libro a The Narcissism Epidemic. “Iti damo, agpada a nalaka ken talaga a mayat—ngem apagbiit la dayta. Inton agangay, pumobre ken lumdaangka.”

Ipalgak ti Biblia a di nainsiriban “ti panangiparammag iti sanikua a pagbiag ti maysa.” (1 Juan 2:16) Kinaagpaysuanna, no agporsegitayo a maaddaan iti material a bambanag, maisiasitayo kadagiti mismo a kapatgan iti biag—dagiti banag a saan a magatang ti kuarta. Usigem ti tallo a pagarigan.

 1. PANAGKAKADUA TI SANGAPAMILIAAN

Panagrikna ni Brianne * a maysa a tin-edyer iti United States, ti trabaho ken ti mateggedan a kuarta ti napatpateg nga amang ken ni tatangna. “Adda kadakami ti amin a kasapulanmi ken dadduma pay,” kunana, “ngem kanayon nga awan ni Tatang iti balaymi ta agkarabiahe. Ammok met ketdi a gapu dayta iti trabahona, ngem adda met responsabilidadna iti pamiliana!”

Panunotem: Anianto ngata ti mabalin a pagbabawyan ti ama ni Brianne? Gapu iti nalabes a panangipangpangrunana kadagiti material a banag, kasano a maap-apektaran ti relasionna iti anakna? Ania ti ad-adda a kasapulan ti pamiliana ngem iti kuarta?

Dagiti prinsipio ti Biblia nga usigen:

  • “Ti ayat iti kuarta isu ti ramut dagiti amin a kita ti makadangran a bambanag, ket babaen ti panangragpat iti daytoy nga ayat nayaw-awan ti sumagmamano manipud iti pammati ket sinalputda ti intero a bagbagida iti adu nga ut-ot.”—1 Timoteo 6:10.

  • “Nasaysayaat ti agsida iti nateng a kasangom dagiti tattao nga ay-ayatem ngem ti agsida iti kaimasan a karne nga adda gura iti unegmo.”—Proverbio 15:17, Ti Baro a Naimbag a Damag Biblia.

Laglagipem: Ti panagkakadua ti sangapamiliaan ket saan a magatang ti kuarta. Maadda laeng dayta no mangiwayaka iti panawen a makikaduaka iti pamiliam ken ipaayam ida iti umdas nga ayat ken atension.—Colosas 3:18-21.

 2. PUDNO A KINATALGED

“Sangkaibaga ni Nanang a masapul a makiasawaak iti baknang ken ageskuelaak tapno addanto nasayaat a trabahok no bilang maibus ti kuarta ni lakayko,” kuna ti 17 anyos a ni Sarah. “Kuarta ti sangkapanunotna.”

Panunotem: No pampanunotem ti masakbayam, ania dagiti napateg a pakaseknam? Kaano nga agbalin a nalabes unayen ti panagdanagmo kadagita? Ania koma ti nasken nga isuro ti nanang ni Sarah a mas balanse a panangmatmat maipapan iti pinansial a kinatalged?

Dagiti prinsipio ti Biblia nga usigen:

  • “Isardengyo ti agurnong maipaay iti bagbagiyo kadagiti gameng iti daga, sadiay nga ibusen ti sanga ken lati, ken sadiay a serken ken takawen dagiti mannanakaw.”—Mateo 6:19.

  • “Saanyo nga ammo no anianto ti biagyo inton bigat.”—Santiago 4:14.

Laglagipem: Uray no adu ti urnongmo a kuarta, dimo latta masigurado a natalged ti masakbayam. Ngamin, mabalin a matakaw ti kuarta—ken saanna a kabaelan nga agasan ti sakit wenno lapdan ti ipapatay. (Eclesiastes 7:12) Isursuro ti Biblia a ti pudno a kinatalged ket agtaud iti pannakaammo iti Dios ken iti panggepna.—Juan 17:3.

 3. PERSONAL A PANNAKAPNEK

“Pinadakkelnakami dagiti nagannakko iti simple a panagbiag,” kuna ti 24 anyos a ni Tanya. “Naragsakkami iti kasinginko uray no masansan a dagiti laeng kangrunaan a kasapulanmi ti adda kadakami.”

Panunotem: Apay ngata a mabalin a narigat ti mapnek kadagiti kangrunaan a kasapulan? No maipapan iti panangmatmat iti kuarta, ania nga ulidan ti ipakpakitam iti pamiliam?

Dagiti prinsipio ti Biblia nga usigen:

  • “No adda pagtaraon ken pagkawestayo, mapnektayon kadagitoy a banag.”—1 Timoteo 6:8.

  • “Naragsak dagidiay sipapanunot iti naespirituan a kasapulanda.”—Mateo 5:3.

Laglagipem: Adda napatpateg iti biag ngem iti kuarta ken kadagiti banag a magatangna. Ngamin, kuna ti Biblia: “Uray no addaan kinaruay ti maysa a tao ti biagna saan nga agtaud iti bambanag nga ik-ikutanna.” (Lucas 12:15) Kinapudnona, maaddaantayo iti naan-anay a pannakapnek iti biag no masungbatan dagiti agkakapateg a saludsod a kas kadagitoy:

  • Apay nga addatayo ditoy?

  • Ania ti masakbayantayo?

  • Kasanok a mapennek dagiti naespirituan a kasapulak?

Dagiti Saksi ni Jehova a mangipabpablaak iti daytoy a magasin ket maragsakan a tumulong kenka a mangammo kadagiti sungbat dagita a saludsod. Mabalinmo a kontaken ida iti lugaryo wenno kitaen ti Web site-mi a jw.org/ilo.

^ par. 8 Nabaliwan dagiti nagan iti daytoy nga artikulo.

Ammuem ti Ad-adu Pay

Kasano nga Agbalin a Naragsak ti Pamiliam?

Ni Jehova a naragsak a Dios, kayatna a naragsak dagiti pamilia. Ammuem ti praktikal a balakad ti Biblia iti asawa a lalaki, asawa a babai, nagannak, ken annak.

No Kasano a Kontrolen ti Panaggasto

Dimo urayen agingga nga awanen ti kuarta sakbay a baliwam ti ugalim iti panaggasto. Ammuem no kasanom a kontrolen ti panaggasto sakbay nga agbabawika.