Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! SEPTIEMBRE 2013

 TULONG PARA ITI PAMILIA | PANAGASAWA

No Kasano ti Mangpakawan

No Kasano ti Mangpakawan

TI PROBLEMA

No agapakayo nga agassawa, sangkadakamatmo dagiti nakalista a napalabas a nagririanyo a nabayag koman a narisut. Ti parikut? Mabalin a maysa kadakayo ti dina ammo no kasano ti mangpakawan wenno agpadakayo a kasta.

Kabaelam a sursuruen ti mamakawan. Ngem usigem nga umuna no apay a nagrigat nga agpinnakawan ti agassawa.

DAGITI MAKAGAPU

Panangkontrol. Agkedked a mangpakawan ti dadduma nga assawa a lallaki ken babbai tapno adda latta kontrolda iti asawada. Iti kasta, no adda tumaud a parikut, usarenda ti napalabas a pasamak kas alas tapno madominaranda ti asawada.

Sakit ti nakem. Narigat a malipatan dagiti sakit ti nakem nga epekto ti napalabas a pannakasair. Mabalin a kunaen ti asawam a ‘napakawankan’ ngem adda latta sakit ti nakemna iti napasamak—nalabit a kayatna pay ketdi ti bumales.

Pannakaupay. Impagarup ti dadduma a nakiasawa a kanayon a nakaragragsak ti biagda. Isu a no adda tumaud a riri, agpinnapilitda iti opinion. Pampanunotenda payen no apay a ti “perpekto a nakiasawaanda” ket naiduma ti panangmatmatna iti bambanag. Gapu kadagiti saan a realistiko a namnama, ad-adda nga agannayas ti maysa a kamali laeng ti kitkitaenna ken narigrigat a mangpakawan.

Di umiso a pannakaawat. Agkedked a mangpakawan ti adu nga assawa gapu ta di umiso ti pannakaawatda iti kaipapanan ti panangpakawan. Kas pagarigan:

No pakawanek, tagtagilag-anek ti kamalina.

No pakawanek, masapul a lipatek ti napasamak.

No pakawanek, mabalin nga addanto manen aramidenna a pakasairak.

Kinapudnona, awan kadagita ti kaipapanan ti panangpakawan. Kaskasdi a mabalin a narigat ti mangpakawan—nangruna iti agassawa nga addaan iti nasinged a relasion.

 TI MABALINMO NGA ARAMIDEN

Tarusam no ania ti karaman iti panangpakawan. Iti Biblia, ti kaipapanan no dadduma ti sao a “pakawanen” ket “palabsen.” Saan ngarud a kanayon a masapul a lipatem ti napasamak wenno tagtagilag-anem ti kamalina no pakawanem. No dadduma, kaipapananna a masapul a palabsem laengen ti problema, para iti pagimbagam ken iti relasionyo nga agassawa.

Ammuem dagiti pagdaksan ti di panangpakawan. Kuna ti dadduma nga eksperto a no agipempenka iti sakit ti nakem, dakdakkel ti risgo a maaddaanka iti adu a pisikal ken emosional a problema, a pakairamanan ti depresion ken alta presion—malaksid pay iti dakes nga epektona iti relasionyo nga agassawa. Adda nasayaat a rason a kuna ti Biblia: “Agbalinkayo a manangngaasi iti maysa ken maysa, nadungngo a mannakipagrikna, a sibubulos a pakawanenyo ti maysa ken maysa.”—Efeso 4:32.

Ammuem dagiti pagimbagan ti panangpakawan. Ti kinamanangpakawan tulongannakayo nga agtalek nga awan dakes a motibo ti tunggal maysa kadakayo, imbes a “kanayon nga agbimbinnilangkayo” iti kamali. Iti kasta, maliklikanyo ti agipempen iti sakit ti nakem ken maparayrayyo ti ayan-ayatyo.—Prinsipio ti Biblia: Colosas 3:13.

Agbalinka a realistiko. Nalaklaka ti mangpakawan no akseptarem ti kinasiasino ti asawam agraman dagiti pakapilawanna. Sigun iti libro a Fighting for Your Marriage, no sangkapanunotmo dagiti pagkurkuranganna, naglaka a malipatam ti amin a nasayaat a galadna. Insaludsod dayta a libro: “Ania kadagita ti kaykayatmo a panunoten?” Laglagipem nga awan ti tao a perpekto—a pakairamanam.—Prinsipio ti Biblia: Santiago 3:2.

Agbalinka a rasonable. Inton adda manen maibaga wenno maaramid ti asawam a pakasairam, isaludsodmo iti bagim: ‘Talaga kadi a nakaro unay ti naaramidna? Kasapulak kadi ti panagpadispensarna wenno palabsek lattan ti napasamak?’—Prinsipio ti Biblia: 1 Pedro 4:8.

No kasapulan, pagsaritaanyo ti problema. Ilawlawagmo a sikakalmado no aniat’ nakasairam ken no apay a kastat’ nariknam. Dimo ipapilit wenno akusaran nga adda dakes a motibo ti asawam ta dayta ti mangtignay kenkuana nga agikalintegan. Umanayen nga ibagam no kasano a naapektaranka iti inaramidna.

Ammuem ti Ad-adu Pay

No Kasano a Solbaren Dagiti Problema

Makatulong ti umiso a panangsolbar tapno agbalin a nabileg ken naragsak ti relasionyo nga agassawa wenno agbalin a naliday ken miserable.