Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Septiembre 2013

 NO ANIA TI KUNA TI BIBLIA

Panagdenna Sakbay ti Kasar

Panagdenna Sakbay ti Kasar

Dakes kadi ti panagdenna sakbay ti kasar?

“Ta daytoy ti pagayatan ti Dios, . . . nga adaywanyo ti pannakiabig.”—1 Tesalonica 4:3.

TI KUNA TI TATTAO

Iti dadduma a kultura, maipalubos ti seksual nga aktibidad ti dua nga adulto a di pay nagkasar. Iti dadduma a lugar, awan pagdaksanna ti sumagmamano a kita ti seksual a panaglinnailo dagiti di pay nagkasar nga agtutubo.

TI KUNA TI BIBLIA

Us-usaren ti Biblia ti sao a “pannakiabig” para iti sumagmamano a kita ti seksual nga aktibidad ti dua a di pay nagkasar. Namnamaen ti Dios a dagiti agdaydayaw kenkuana ket ‘adaywanda ti pannakiabig.’(1 Tesalonica 4:3) Karaman ti pannakiabig kadagiti nadagsen a basol a kas iti pannakikamalala, espiritismo, panagbarbartek, idolatria, panangpapatay, ken panagtakaw.—1 Corinto 6:9, 10; Apocalipsis 21:8.

APAY A PAKASEKNAM DAYTA?

Ti maysa a rason ket ti pakdaar ti Biblia a ti “Dios ukomennanto dagiti mannakiabig.” (Hebreo 13:4) Napatpateg pay, no agtulnogtayo kadagiti linteg ti Dios maipapan iti seksual a kinadalus, pampaneknekantayo nga ay-ayatentayo ni Jehova a Dios. (1 Juan 5:3) Iti met biangna, bendisionanna dagidiay mangipangag kadagiti bilinna.—Isaias 48:18.

 Immoral kadi ti aniaman a kita ti seksual a panaglinnailo dagiti di pay nagkasar?

“Ti pannakiabig ken tunggal kita ti kinarugit wenno kinaagum saan koma nga uray madakamat iti nagtetengngaanyo.”—Efeso 5:3.

TI KUNA TI TATTAO

Patien ti adu a malaksid iti seksual a panagdenna, awan pagdaksanna ti seksual a panaglinnailo ti dua a di pay nagkasar.

TI KUNA TI BIBLIA

No dakamaten ti Biblia dagiti immoral a seksual nga aramid, saan la a ti pannakiabig ti karaman no di ket uray ti seksual a ‘kinarugit’ ken “nalulok a kababalin.” (2 Corinto 12:21) Nalawag nga adda nadumaduma a kita ti seksual a panaglinnailo a kagura ti Dios no aramiden dagiti saan a nagkasar, uray no dida aktual a nagdenna.

Daytoy ngarud ti pakagupgopan ti mensahe ti Biblia maipapan iti seksual a panagdenna: Ti seksual a panaglinnailo ket para laeng iti nagkasaren a lalaki ken babai. Kondenaren met ti Biblia ti “naagum a panaggartem iti sekso.” (1 Tesalonica 4:5) Ania ti kayatna a sawen daytoy? Usigem ti maysa a pagarigan nga agpada nga agaplikar iti lalaki wenno babai: Mabalin a determinado ti maysa a babai a di makidenna iti nobiona. Ngem adda met dagiti seksual a pannakilinnailo nga ar-aramidenna kenkuana. Ipakpakita dayta nga ag-aguman wenno gargartemanda ti maysa a banag a dida kukua. Gapuna, nakabasolda iti “naagum a panaggartem iti sekso.” Kondenaren ti Biblia ti kasta a seksual a kinaagum.—Efeso 5:3-5.

Kasanom a maliklikan ti seksual nga immoralidad?

“Adaywanyo ti pannakiabig.”—1 Corinto 6:18.

APAY A PAKASEKNAM DAYTA?

Sigun iti Biblia, dagidiay makidenna sakbay ti kasar ket agpegpeggad a mapukawda ti pannakigayyemda iti Dios.—Colosas 3:5, 6.

TI KUNA TI BIBLIA

Balakadan ti Biblia dagiti tattao nga ‘adaywanda ti pannakiabig.’ (1 Corinto 6:18) Kaipapananna a masapul nga ikagumaan ti maysa nga indibidual a naan-anay nga adaywan ti aniaman a mangsulisog kenkuana nga agaramid iti seksual nga immoralidad. (Proverbio 22:3) Kas pagarigan, tapno makapagtalinaed a nadalus iti moral, nasken a di makisinninged kadagiti di mangikankano kadagiti prinsipio ti Dios maipapan iti seksual a pannakidenna. Namakdaar ti Biblia: “Daydiay makipagna kadagiti masirib a tattao agbalinto a masirib, ngem daydiay addaan kadagiti pannakilangen kadagidiay maag nakadakdakesto ti pagtungpalanna.”—Proverbio 13:20.

Dagiti immoral a kapanunotan nga ipaspastrektayo iti isiptayo ket mabalin met nga agresulta iti seksual nga immoralidad. (Roma 8:5, 6) No kasta, nainsiriban a liklikantayo dagiti musika, videos, pagbasaan, ken dadduma pay a mangipakpakita iti di maitutop a seksual nga aramid wenno aniaman a mangitantandudo iti seksual a kababalin a kagura ti Dios.—Salmo 101:3.