Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! SEPTIEMBRE 2013

 INTERBIU | CÉLINE GRANOLLERAS

No Apay a Mamati iti Dios ti Maysa a Kidney Specialist

No Apay a Mamati iti Dios ti Maysa a Kidney Specialist

Ni Dr. Céline Granolleras iti France ket maysa a doktor nga espesialista iti sakit ti kidney wenno bekkel. Kalpasan ti nasurok a 20 a tawen a kinadoktorna, nakombinsir nga adda Namarsua a maseknan kadatayo. Ininterbiu ti Agriingkayo! maipapan iti trabahona ken pammatina.

Ibagam man kadakami ti biagmo idi ubingka pay?

Immakar ti pamiliak iti France manipud Spain idi agtawenak iti siam. Katoliko dagiti nagannakko ngem saanakon a mamati iti Dios idi agtawenak iti 16. Para kaniak, ti relihion ket saan a napateg iti biag. No adda idi agdamag no kasano a nangrugi ti biag no awan ti Dios, ti sungbatko ket, “Saan pay a mailawlawag ita dagiti sientista, ngem addanto tiempo a mailawlawagda dayta.”

Apay nga inadalmo dagiti sakit ti bekkel?

Nagadalak iti kinadoktor iti Montpellier, France. Adda propesor sadiay a nakisarita kaniak maipapan iti trabaho iti nephrology, maysa a tay-ak ti medisina a naipamaysa kadagiti bekkel. Iti dayta a trabaho, ti panagsukimat maipapan iti sakit dagiti bekkel kakuykuyogna ti panangaywan kadagiti pasiente. Kasta ti kayatko a trabaho. Idi 1990, nangrugiak a makipaset iti maibilang a baro a tay-ak ti panagsukimat—ti panagsukimat iti usar ti recombinant erythropoietin (EPO) a mangkontrol iti yaadu ti nalabaga a selula ti dara kadagiti tulangtayo.

Apay a natignayka nga agpanunot maipapan iti Dios?

Idi 1979, ni lakayko a Floréal ket nangrugi a makipagadal iti Biblia kadagiti Saksi ni Jehova. Ngem saanak nga interesado idi. Ngamin, naumaakon iti relihion idi ubingak pay laeng. Nupay kasta, nagbalin a Saksi ni Jehova ni lakayko ken dagiti annakmi. Idi  agangay, dandani amin a gagayyemmin ket Saksi. Insingasing ti maysa kadakuada a ni Patricia a padasek ti agkararag. “No awan ti adda idiay langit, awan met ti mapukaw kenka,” kinunana. “Ngem no adda, makitam ti mapasamak.” Tawtawen kalpasanna, pampanunotekon no ania ti panggep ti biag ket nalagipko ti imbaga idi ni Patricia. Inkararagko a maawatak koma dayta.

Ania ti namagpanunot kenka maipapan iti panggep ti biag?

Ti panangatake dagiti terorista iti World Trade Center idiay New York ti namagpapanunot kaniak no apay a nagadu ti kinadakes iti kagimongan. Napanunotko: ‘Agpegpeggad ti masakbayantayo gapu iti narelihiosuan a kinapanatiko. Ngem adtoyak a nalikmut kadagiti natalna a tattao—dagiti Saksi ni Jehova. Saanda a panatiko. Tungtungpalenda ti Biblia. Nalabit nasken nga ammuekon ti ibagbaga dayta.’ Inrugik ngarud a basaen ti Biblia.

Kas doktor, narigatanka kadi a mamati iti Namarsua?

Saan. Bilibak unay iti komplikado a disenio ti bagitayo. Kas pagarigan, nakaskasdaaw ti pamay-an dagiti bekkeltayo a mangkontrol iti kaadu ti nalabaga a selula iti daratayo.

Apay a kasta ti makunam?

Naamirisko a Dios laeng ti makabael a mangdisenio iti kasta kaelegante a sistema

Kas iti nalabit ammomon, dagiti nalabaga a selula ti dara ti para itulod iti oksihena. No maawananka iti adu a dara wenno no addaka iti nangato a disso, agkurang ti bagim iti oksihena. Dagiti bekkeltayo ket addaan kadagiti sensor ti oksihena. No madlaw dagita nga agkurang iti oksihena ti daratayo, tignayenda ti pannakapataud iti EPO. Iti kasta, mabalin a rinibu a daras nga umadu ti EPO iti dara. Ti EPO tignayenna dagiti pata ti tulang a mangpataud iti ad-adu a nalabaga a selula a mangitulod iti ad-adu nga oksihena. Nakaskasdaaw! Ngem sa la naamirisko a Dios laeng ti makabael a mangdisenio iti kasta kaelegante a sistema kalpasan ti 10 a tawen a panangadalko iti dayta a proseso.

Ania ti makunam iti Biblia?

Adun ti nabasak a libro iti historia ken nalatak a nobela, ngem dagus a nakitak a naiduma ti Biblia. Praktikal unay ti balakadna, ket sigurado a nasirsirib ngem iti tao ti nagtaudanna. Magustuak unay ti kababalin ni Jesus. Naawatak a talaga a nagbiag idi kas maysa a tao nga addaan rikrikna ken gagayyem. Gapu ta diak kayat idi ti agbasa kadagiti publikasion dagiti Saksi ni Jehova, nagsukimatak kadagiti ensiklopedia ken dadduma pay a reperensia no adda tumaud a saludsodko.

Ania ti sinukimatmo?

Sinukimatko dagiti libro ti historia . . . Nakombinsirak met laengen a dayta a padto ti Biblia ket napasamak iti eksakto a tiempo

Ti maysa a naginteresak ket ti panangipadto ti Biblia iti tawen a nabautisaran ni Jesus. Eksakto ti ipakita dayta a kapaut ti lumabas a panawen manipud maika-20 a tawen ti panagturay ni Ari Artaxerxes ti Persia agingga iti tawen nga indatag ni Jesus ti bagina kas ti Mesias. * Naruamak nga agsukimat ta paset dayta ti trabahok. Isu a sinukimatko dagiti libro ti historia a mangpatalged kadagiti petsa ti panagturay ni Artaxerxes ken dagiti petsa ti ministerio ni Jesus. Nakombinsirak idi agangay a dayta a padto ti Biblia ket napasamak iti eksakto a tiempo isu a sigurado nga impaisurat dayta ti Dios.

^ par. 19 Kitaem ti libro nga Ania a Talaga ti Isursuro ti Biblia? nga impablaak dagiti Saksi ni Jehova, panid 197-199.