Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Hulio 2013

 NO ANIA TI KUNA TI BIBLIA

Pagarian ti Dios

Pagarian ti Dios

Ti kadi Pagarian ti Dios ket maysa laeng a kasasaad ti puso?

“Saanka nga adayo iti pagarian ti Dios.”—Marcos 12:34.

TI KUNA TI TATTAO

Patien ti adu a ti Pagarian ti Dios ket “ti panagturay ti Dios iti puso ken biag ti indibidual” kas iti kinuna ti maysa a nalatak a relihion iti Kakristianuan.

TI KUNA TI BIBLIA

Ti Pagarian ti Dios ket maysa a pudpudno a gobierno, saan la a pangiladawan iti naimpusuan a panagpasakup ti maysa a tao iti Dios. Ti Pagarian ti Dios iturayannanto ti intero a daga.—Salmo 72:8; Daniel 7:14.

Ngem ania ngarud ti kaipapanan ti kinuna ni Jesus a “ti pagarian ti Dios adda iti unegyo”? (Dakami ti nangyitaliko; Lucas 17:21, Ti Biblia, Philippine Bible Society) Saan a kayat a sawen ni Jesus a ti Pagarian ket adda iti puso dagiti dumdumngeg kenkuana. Apay a saan? Ngamin, dagiti Fariseo ti agdengdengngeg kenkuana idi. Imbaga ni Jesus a saanda a karaman iti Pagarian gapu ta managinsisingpet ti pamay-an ti panagdaydayawda isu a saan ida nga anamongan ti Dios. (Mateo 23:13) Nupay kasta, umiso ni Jesus idi kinunana a ti Pagarian ti Dios ket “adda iti unegyo” wenno, “iti tengngayo” sigun iti Baro a Lubong a Patarus. Apay? Agsipud ta kas ti masanguanan nga Ari ti Pagarian, agtaktakder idi iti sanguananda.—Lucas 17:21.

 Ania ti Pagarian ti Dios?

“Umay koma ti pagariam. Maaramid koma ti pagayatam, kas sadi langit, kasta met iti daga.”—Mateo 6:10.

TI KUNA TI BIBLIA

Ti Pagarian ket maysa a pudpudno a gobierno ti Dios ken ni Jesu-Kristo ti Agturay. (Mateo 28:18; 1 Timoteo 6:14, 15) Panggepna nga itungpal ti pagayatan ti Dios idiay langit ken ditoy daga. (Mateo 6:10) No kasta, usarento ti Dios daytoy a Pagarian a mangsolbar kadagiti problema ti tattao. Ibanagto ti Pagarian ti di pulos maaramid dagiti gobierno ti tattao.

Natalna, natalged, ken nanam-ayto ti biag ti amin a tattao iti paraiso a daga bayat ti panagturay ti Pagarian ti Dios. (Salmo 46:9; Isaias 35:1; Mikias 4:4) Awanton ti agsakit wenno matay. (Isaias 33:24; Apocalipsis 21:4) Sumalibukagto metten dagiti lallakay ken babbaket. Impadto ti Biblia: “Ti lasagna agbalin a nasalsalibukag ngem iti kinaagtutubo; isu agsubli kadagiti aldaw ti kired ti kinaagtutubona.”—Job 33:25.

TI MABALINMO NGA ARAMIDEN

Aniaman a puli ti nagtaudam wenno lugar a nakayanakam, makapagbalinka nga iturayan ti Pagarian ti Dios no aramidem ti kidkiddawen kenka ti Dios. Kuna ti Biblia: “Ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.”—Aramid 10:34, 35.

Tattao kadi ti mangipasdek iti Pagarian ti Dios?

“Mangipasdekto ti Dios ti langit iti maysa a pagarian a saanto a pulos madadael.”—Daniel 2:44.

TI KUNA TI TATTAO

Patien ti dadduma a dagiti tattao ti mangipasdekto iti Pagarian ti Dios ditoy daga, babaen man iti panangkomberteda iti sabsabali iti relihionda wenno iti panagreggetda para iti sangalubongan a talna ken panagkaykaysa.

TI KUNA TI BIBLIA

Ti Dios—saan a tao—ti mangipasdek iti Pagarian. (Daniel 2:44) Idi naipasdek ti Pagarian, kuna ti Dios: “Siak, mismo a siak, insaadko ti arik.” (Salmo 2:6) Saan a dagiti tattao ti mangipasdek iti Pagarian ti Dios, ken dida malapdan dagiti proyektona, yantangay iturayannanto ti intero a daga manipud langit.—Mateo 4:17.

APAY A PAKASEKNAM DAYTA?

Natural laeng a kayattayo nga addanto koma aldaw nga agari ti talna ken panagkaykaysa iti intero a sangatauan. Nalabit ikagkagumaam pay ketdi nga ibanag dagita ngem maup-upayka ta saan a maragpat dagita nga arapaapmo. No ammom a ti pannakabalin ti Dios ti mangiwanwanwan iti Pagarianna, maipamaysam dagiti panagreggetmo kadagiti kasayaatan a pamay-an babaen ti panagbalinmo a sakup dayta a Pagarian.