Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! HULIO 2013

 LUGLUGAR KEN TATTAO

Panagpasiar Idiay Azerbaijan

Panagpasiar Idiay Azerbaijan

TI Azerbaijan ti kadakkelan iti tallo a pagilian a mangbukel iti Southern Caucasus. Agarup 1,000 a tawen ti napalabasen, adu a tribu a Turkic ti nagnaed ditoy. Tinuladda ti dadduma kadagiti lokal a tradision ken kasta met ti inaramid dagiti lumugar iti dadduma kadagiti kulturada. Di ngarud pakasdaawan a ti lengguahe nga Azerbaijani ket kaarngi unay ti Turkish ken Turkmen.

Pagaammo a naragsak ken mannakigayyem dagiti Azeris. Nasinged ti agkakapamilia ken agtitinnulong ti agkakabagian no adda problema.

Pagaayat dagiti Azeris ti musika ken daniw. Iti maysa a kita ti musika a maawagan iti mugam, makanta dagiti klasikal a daniw dagiti Azeris nga akompaniaran dagiti nagkauna nga instrumento. Ti kumakanta iti mugam ket masapul a kabesadona dagiti tradisional a musika a mugam ken nalaing nga agimbento iti sasao nga iballaballaetna bayat nga agpabuya.

Napateg ti tsa iti kultura ti Azerbaijan

 Napateg ti tsa iti kultura ti Azerbaijan. Maidasar dayta kadagiti babassit ken sukog-peras a baso a napakuyogan iti kuadrado a napatangken nga asukar. No dadduma, adda met maidasar a pistasio, almendro (almond), ken pasas. Uray dagiti kabassitan nga ili ket addaan kadagiti paggatangan ken pagiinuman iti tsa.

Ti Caspian Sea iti daya ti pagilian ti pagbibiagan dagiti ikan nga sturgeon. Makapagbiag ti beluga sturgeon iti nasurok a 100 a tawen. Maysa kadagiti kadakkelan pay laeng a natiliw ket 8.5 a metro ti kaatiddogna ken 1,297 a kilo ti kadagsenna! Nangina ti sturgeon gapu kadagiti bugina a maaramid kas iti nalatak ken nangina a black caviar.

Relihioso dagiti Azeris ken magustuanda ti makisarita maipapan iti Dios. Muslim ti kaaduan kadakuada. Adda met dadduma pay a relihion a pakairamanan ti nasurok a sangaribu a Saksi ni Jehova—nga adu kadakuada ket katutubo nga Azerbaijanis.

Dagiti tradisional nga Azeris a musikero

AMMOM KADI?

Minilion iti intero a lubong ti yad-adalan iti Biblia dagiti Saksi ni Jehova. Us-usarenda ti libro nga Ania a Talaga ti Isursuro ti Biblia? a magun-odan iti nasurok a 250 a lengguahe a pakairamanan ti Azerbaijani.