Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! HULIO 2013

Awan Hustisia iti Sadinoman

Awan Hustisia iti Sadinoman

NAYANAKAK idi 1965 iti napanglaw a pamilia iti Northern Ireland. Dimmakkelak iti County Derry bayat ti “Troubles,” ti naranggas a rinnanget dagiti Katoliko ken Protestante a nagpaut iti nasurok a 30 a tawen. Ti minoria a Katoliko ket nakarikna iti diskriminasion kadagiti naturturay a mayoria a Protestante. Sigun kadagiti Katoliko, saan a patas dagiti Protestante no maipapan iti eleksion, pannakaipatungpal ti linteg, trabaho, ken panagpabalay.

Awan hustisia iti sadinoman ken adda panangidumduma. Diak mabilangen no namin-anoak a nakabkabil, naulod iti lugan ken natutokan iti paltog, wenno pinalutpot ken rinekisa dagiti polis wenno soldado. Nakaro ti pannakamaltratok isu a napanunotko, ‘Akseptarek lattan dayta wenno agibalesak!’

Nakipasetak kadagiti parada ti Bloody Sunday idi 1972 kas pananglagip iti ipapatay ti 14 a tattao a pinaltogan dagiti soldado ti Britania, ken iti di pannangan kas protesta a pammadayaw kadagiti mangilablaban iti demokrasia a balud a di nangnangan agingga a natayda idi 1981. Nagikabilak kadagiti maiparit a bandera ken nagsurat ken nagdrowingak kadagiti mensahe a kontra-Britania iti sadinoman. Kasla kanayon nga adda  mapasamak a panangilupitlupit wenno panangpapatay iti Katoliko a mitsa ti protesta. Ti mangrugi a parada wenno martsa ket masansan nga agresulta iti nakaro a riribuk.

Iti unibersidad, nakiramanak iti protesta dagiti estudiante para iti kasasaad ti aglawlaw. Idi agangay, immakarak iti London, ket nakipasetak kadagiti martsa kontra kadagiti pagannurotan ti gobierno a kasla pabor kadagiti babaknang ken mangikuspil kadagiti napanglaw. Nakipasetak kadagiti welga kontra iti panangkissay iti sueldo ken nakikaduaak iti martsa kontra iti buis idi 1990 a nagresulta iti nakaro a pannakadadael ti Trafalgar Square.

Ngem naupayak idi agangay. Imbes a maragpatmi dagiti kalatmi, dagiti protesta ti masansan a nangrubrob iti gura.

Nupay nagsayaat dagiti panggep ti tattao, dida maipaay ti hustisia ken panagpapada

Iti dayta a tiempo, inyam-ammonak ti maysa a gayyemko kadagiti Saksi ni Jehova. Insuroda ti kuna ti Biblia a maseknan ti Dios iti panagsagabatayo ken pukawennanto ti amin a pannakadangran a gapuanan ti tattao. (Isaias 65:17; Apocalipsis 21:3, 4) Nupay nagsayaat dagiti panggep ti tattao, dida maipaay ti hustisia ken panagpapada. Saan la a panangiwanwan ti Dios ti kasapulantayo no di ket uray ti pannakabalinna a mangparmek kadagiti di makita a puersa nga adda iti likudan dagiti problema iti lubong.—Jeremias 10:23; Efeso 6:12.

Naamirisko a ti panagprotestak kontra kinaawan hustisia ket kayariganna ti panangikagumaan a mangurnos kadagiti tugaw iti lumlumned a barko. Makapabang-ar a maammuan nga addanto tiempo nga awanen ti kinaawan hustisia ditoy daga, ken talaga nga agpapadanton ti kasasaad ti amin a tattao.

Isursuro ti Biblia a ni Jehova ket Dios a “managayat iti kinahustisia.” (Salmo 37:28) Dayta ti maysa a rason a masiertotayo nga ipaaynanto ti hustisia iti wagas a di maipaay dagiti gobierno ti tattao. (Daniel 2:44) No kayatmo a maammuan ti ad-adu pay, kontakem dagiti Saksi ni Jehova iti lugarmo wenno kitaem ti Web site-mi a www.jw.org/ilo.

Ammuem ti Ad-adu Pay

Apay nga Ipalpalubos ti Dios ti Kinadakes ken Panagsagaba?

Kasano a nangrugi ti kinadakes, ken apay nga ipalpalubos dayta ti Dios? Agpatingganto ngata ti panagsagaba?

Apay nga Adalem ti Biblia?

Mangipapaay ti Biblia kadagiti sungbat ti agkakapateg a saludsod ti minilion a tattao iti intero a lubong. Kayatmo kadi met ti matulongan?