Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! ABRIL 2013

 LUGLUGAR KEN TATTAO

Panagpasiar Idiay Indonesia

Panagpasiar Idiay Indonesia

TI Indonesia ket buklen ti agarup 17,000 nga isla. Agdinamag dagiti umilina a nainggayyeman, naanus, nadayaw, ken managpadagus unay.

Ti gagangay a taraon idiay Indonesia ket innapuy ken masida a masansan a nagasang—ken prutas. Iti dadduma a lugar, agkammet dagiti pamilia a mangan bayat a nakadalupisakda iti ikamen. Naim-imas kano ti kasta a pannangan sigun iti adu a taga-Indonesia.

Nakanannanam ti durian ken magusgustuan ti adu nupay naangot

Magusgustuan dagiti taga-Indonesia ti arte, panagsala, ken musika. Ti anklong ket gagangay a pagtokar sadiay; buklen dayta iti plauta a kawayan sa agsisina a naikabil iti frame wenno baskag. No matokar, agpataud dagita iti partikular a nota wenno chord. Tapno matokar, nasken nga agdadanggay dagiti tumutokar sada yugyogen ti bukodda nga anklong iti umiso a tiempo.

Ti orangutan—a gagangay kadagiti naraber a kabakiran iti Sumatra ken Borneo—ti kadakkelan nga animal nga agnanaed iti kayo. Ti adulto a kalakian ket mabalin nga agdagsen iti dandani 91 a kilo ken 2.4 a metro ti kaatiddog dagiti takkiagna no nakadeppa

Agingga idi maika-15 a siglo C.E., kaaduan a paset ti Indonesia ket inimpluensiaan ti Hinduismo ken idi agangay, ti Budismo. Idi maika-16 a siglo, nakaramuten ti Islam iti kultura ti Indonesia. Dimteng dagiti Europeo idi maika-16 a siglo tapno agbirokda kadagiti rekado. Intugotda dagiti relihion ti Kakristianuan.

 Dagiti Saksi ni Jehova, a nalatak iti intero a lubong gapu iti trabahoda a panangisuro, ket aktibo iti Indonesia sipud pay idi 1931. Nasurok itan a 22,000 ti bilangda idiay Indonesia ken ikagkagumaanda a kontaken dagiti umel. Itay nabiit, nasurok a 500 ti timmabuno iti espesial a gimong iti sign-language nga inangay dagiti Saksi ni Jehova kas panglaglagipda iti ipapatay ni Jesu-Kristo.

Maipabpablaak ti Agriingkayo! iti 98 a lengguahe agraman Indonesian (a maawagan met iti Bahasa Indonesia)