Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! PEBRERO 2013

 NO ANIA TI KUNA TI BIBLIA

Dagiti Marigrigat

Dagiti Marigrigat

Maseknan kadi ti Dios kadagiti marigrigat?

“Ti wagas ti panagbiagyo siwayawaya koma iti panagayat iti kuarta . . . Ta [ti Dios] kinunana: ‘Saankanto a pulos panawan ket saankanto a pulos baybay-an.’”—Hebreo 13:5.

NO KASANO NGA IPAKPAKITA TI DIOS A MASEKNAN

No agrigat ti maysa nga agdaydayaw ken Jehova a Dios, mabalin a makita iti nadumaduma a pamay-an a maseknan ti Dios a tumulong. Ti maysa kadagita ket ti naayat a tulong dagiti kapammatian dayta a Kristiano. * Kuna ti Santiago 1:27: “Ti porma ti panagdaydayaw a nadalus ken di natulawan iti panangmatmat ti Dios ken Amatayo isu daytoy: panangtaripato kadagiti ulila ken iti balo a babbai kadagiti rigatda.”

Nagtitinnulong dagiti nagkauna a Kristiano. Kas pagarigan, idi naipadto nga adda bisin a mangapektar iti kasta unay iti Judea, determinado dagiti Kristiano iti Antioquia a siudad ti Siria a “mangipatulodda iti tulong a pagserbi kadagiti kakabsat nga agnanaed idiay Judea.” (Aramid 11:28-30) Kas resultana, naipaayan dagiti naapektaran a padada a Kristiano kadagiti kangrunaan a kasapulanda. Impakita dayta a naimpusuan a panangted ti Nakristianuan nga ayat nga addaan aramid.—1 Juan 3:18.

 Kasano a mapasayaat dagiti marigrigat ti kasasaadda?

“Siak, ni Jehova, ti Diosmo, Daydiay mangisursuro kenka tapno magunggonaam ti bagim.”—Isaias 48:17, 18.

TULTULONGANNATAYO TI DIOS A MANGPASAYAAT ITI KASASAADTAYO

Kas napaneknekanen ti minilion a tattao, makatulong ken awan kaasping ti sirib a masarakan iti Biblia. Kuna ti Proverbio 2:6, 7: “Ni met laeng Jehova mangted iti sirib; manipud ngiwatna adda pannakaammo ken panangilasin. Ket agpaay kadagiti napalungdo mangidulinto iti praktikal a kinasirib.” No dayta a sirib ket biroken ken iyaplikar dagiti tattao, mapasayaatda ti kasasaadda.

Kas pagarigan, liklikanda dagiti makadangran ken nagastos a bisio kas iti panagdroga wenno panagbartek. (2 Corinto 7:1) Agbalinda met a mapagpiaran, nagaggaget, ken mas responsable isu a dakdakkel ti posibilidad a makastrekda iti trabaho wenno mas talken ida dagiti amoda. Kuna ti Efeso 4:28: “Ti agtatakaw saan koma nga agtakawen, no di ket agtrabaho koma a sipipinget, . . . tapno adda koma maibunongna iti asinoman nga agkasapulan.”

Adda kadi ebidensia a makatulong ti sirib a linaon ti Biblia kadagiti marigrigat?

“Maipakita ti kinasirib ti Dios babaen kadagiti gapuananna.”—Mateo 11:19, Ti Baro a Naimbag a Damag Biblia.

DAGITI MANGPANEKNEK A KAPADASAN

Ni Wilson a taga-Ghana ket dandanin agpatingga ti kontratana kas maysa a temporario a trabahador. Iti maudi nga aldaw ti trabahona, adda nakitana a kuarta iti kotse ti managing director bayat a daldalusanna dayta. Imbaga ti superbisorna nga alaen lattan ni Wilson dayta. Ngem maysa ni Wilson a Saksi ni Jehova isu a dina kayat ti agtakaw. Insublina ketdi ti kuarta iti makinkukua. Isu nga imbes nga agpatinggan ti kontratana, nagbalin a permanente ni Wilson iti trabahona ken idi agangay, naingato ti saadna.

Idiay Europa, nasesante ni Géraldine gapu ta kagurgura ti amona dagiti Saksi ni Jehova. Ngem imbaga ti ina ti amona a nagdakkel a kamali ti inaramidna. Kinunana: “No kayatmo ti mapagtalkan, napasnek, ken nasaysayaat nga empleado, ti birokem ket maysa kadagiti Saksi ni Jehova.” Nagsukimat ti anakna maipapan kadagiti Saksi, isu a nakasubli ni Géraldine iti trabahona.

Ni Sarah ket maysa nga agsolsolo nga ina idiay South Africa. Idi napasaranna dagiti narigat a kasasaad, nariknana ti Nakristianuan nga ayat. Kasano? Ti pamiliana ket impaayan dagiti kapammatianna iti tulong para iti taraon ken transportasion. Idi agangay, kinuna dagiti annakna: “Adu ti tatang ken nanangmi iti kongregasion.”

Adu pay dagiti umasping kadagita a kapadasan. Ipalagip dagitoy ti kuna ti Proverbio 1:33: “No maipapan iti daydiay umim-imdeng [ken Jehova], agtaengto iti kinatalged.” Talaga nga agpayso dayta!

^ par. 5 Iti dadduma a pagilian, mangipapaay ti gobierno iti pinansial a tulong kadagiti marigrigat. No awan ti kasta, dagiti kabagianda ti kangrunaan a makinresponsabilidad iti dayta.—1 Timoteo 5:3, 4, 16.