Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! ENERO 2013

 LUGLUGAR KEN TATTAO

Panagpasiar Idiay Cameroon

Panagpasiar Idiay Cameroon

POSIBLE a ti immuna a nagnaed iti Cameroon ket ti tribu a Baka—a pagaammo met kas Pygmy. Bayat ti 1500’s, simmangpet dagiti Portuguese. Kalpasan iti ginasut a tawen, sinakup dagiti Muslim a Fulani ti makin-amianan a paset ti Cameroon. Ita, 40% kadagiti umili ti Cameroon ti agkunkuna a Kristianoda, 20% ti Muslim, ken 40% ti mangan-annurot kadagiti nagkauna a relihion ti Africa.

Mangipabpablaak dagiti Saksi ni Jehova kadagiti literatura a naibasar iti Biblia iti lengguahe a Bassa a maus-usar idiay Cameroon

Managpadagus dagiti agnanaed kadagiti away ti Cameroon. Makablaawan dagiti bisita ken mapasangbayda iti pagtaengan sa maidasaranda iti danum ken taraon. Maibilang a panangpabain no pagkedkedam dayta, ngem maibilang a panangpadayaw no patgam.

Mangrugi ti saritaan babaen ti panangkablaaw ken panangkomusta kadagiti miembro ti pamilia. Kaugalianda pay a komustaen uray dagiti dinguenda! “No pumanawen ti bisita, saan nga umdas ti basta panagpinnakada,” kuna ni Joseph a taga-Cameroon.  “Masansan a kuyogen ti bumalay ti bisitana agingga iti kalsada ken agtultuloy ti panagsaritada. Kalpasanna, agpinnakadadan sa agawiden ti bumalay. No saan a kasta ti pannakatrato ti bisita, mabalin a mariknana a saan a naimpusuan ti pannakapasangbayna.”

Gagangay a makita dagitoy a bilog iti Sanaga River. Dagiti layagna ket naaramid iti aniaman nga adda a material

No dadduma bayat a manganda, agkakapinggan dagiti aggagayyem—ken agkammetda pay no dadduma. Dayta a kaugalian idiay Cameroon ket nabileg a simbolo ti panagkaykaysa. Kinapudnona, adda pay gundaway nga usarenda dayta a mamagkappia kadagiti limmamiis ti panaggayyemda. Ti pannangan nga agkapinggan ket arigna panangibaga, “Nagkappiakamin.”

Dagiti Saksi ni Jehova a mangipabpablaak iti daytoy a magasin ket naorganisar iti nasurok a 300 a kongregasion iti Cameroon ken agarup 65,000 ti maikonkondukta a panagadal iti Biblia