Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Enero 2013

Damdamag iti Lubong

Damdamag iti Lubong

Gulpo ti Mexico

Idi Abril 2010, adda napasamak nga aksidente iti estruktura iti taaw nga agsusop iti langis. Gapu iti dayta, nagadu a langis ken gas ti naiwaras iti baybay iti gistay tallo a bulan. Natakuatan ti maysa a grupo dagiti managsirarak a kalpasan ti dua ket kagudua a bulan, nagpukaw ti dadduma kadagiti mangkontaminar a kemikal. Impapanda a dagita ket linamut dagiti bakteria a paggugustoda ti methane. Ngem pagduaduaan dayta ti dadduma nga eksperto. Patienda a ti kaaduan a langis ket nagarinsaed laeng iti lansad ti taaw.

Russia

Sigun iti maysa a surbey, patien ti 59% kadagiti taga-Russia nga agtawen iti 18-35 a “tapno agballigika iti biag, masapul a pasaray labsingem dagiti prinsipiom ken pagalagadam iti moral,” kuna ti diario a Rossiiskaya Gazeta.

Peru

Ti dadduma kadagiti nasarakan a kabayaganen nga ambuligan wenno gumi ti mangipasimudaag a dagiti umili iti makin-amianan a Peru ket di kumurang a 3,000 a tawenen nga agpabpabusi iti mais ken agar-aramid iti bellaay a mais.

Italy

Para ken Lucio Soravito De Franceschi a Katoliko nga obispo iti Adria-Rovigo, ti mensahe maipapan iti Dios ket rumbeng a “maidanon a mismo kadagiti tattao” iti pagtaenganda. Kunana: “Saan laeng koma nga iti simbaan ti pangaywanantayo kadagiti tattao iti naespirituan no di ket kadagiti mismo a pagtaenganda pay.”

South Africa

Ti presio ti illegal a mailaklako a sara ti rhinoceros a mausar a pagagas ket ngimmina agingga iti $65,000 (U.S.) kada kilo. Idi 2011, iti pay laeng South Africa, 448 ti kangatuan a bilang dagiti rhino a pinatay dagiti illegal a mangnganup. Dagiti museo ken pagsubastaan idiay Europa ket sinerrek dagiti gang nga agbirbirok kadagita a sara. Agpegpeggad payen uray dagiti rhino nga adda kadagiti zoo iti Europa.