Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! ENERO 2013

 NO ANIA TI KUNA TI BIBLIA

Paraiso

Paraiso

Ania ti Paraiso?

TI KUNA TI TATTAO

Adda dagiti agkuna a maysa laeng a sarsarita ti Paraiso. Kuna met ti dadduma a dayta kano ket kasla hardin a nagpintas a lugar nga agnanayon a pagnaedan ti nasingpet a tattao ken pangaramidanda kadagiti makaparagsak ken makagunggona a trabaho.

TI KUNA TI BIBLIA

Nausar ti sao a “paraiso” a mangtukoy iti hardin ti Eden, ti immuna a pagtaengan ti tao. (Genesis 2:7-15) Iladawan ti Biblia dayta a hardin kas pudpudno a lugar a nagnaedan ti umuna a pagassawaan a sadiay, awan ti sakit ken ipapatay. (Genesis 1:27, 28) Gapu ta simmukirda iti Dios, napapanawda iti paraiso a pagtaenganda. Nupay kasta, sigun iti adu a padto ti Biblia, tagiragsakento dagiti tattao ti naisubli a Paraiso iti masanguanan.

APAY A PAKASEKNAM DAYTA?

No pudno a naayat ti Dios, nainkalintegan ngarud a gunggonaanna dagiti matalek nga agdaydayaw kenkuana iti nasayaat a biag iti lugar a kas iti Paraiso. Nainkalintegan met nga ipakaammona kadagiti tattao no ania ti masapul nga aramidenda tapno magun-odda ti anamongna. Kuna ti Biblia a magun-odmo ti anamong ti Dios no adalem ti maipapan kenkuana ken agtulnogka kadagiti bilinna.—Juan 17:3; 1 Juan 5:3.

“Nangimula ni Jehova a Dios iti maysa a minuyongan idiay Eden, . . . ket inkabilna sadiay ti tao a binukelna.”—Genesis 2:8.

 Sadino ti ayan ti Paraiso?

TI KUNA TI TATTAO

Patien ti dadduma nga adda idiay langit ti Paraiso ngem kuna ti dadduma a maipasdekto dayta ditoy daga.

TI KUNA TI BIBLIA

Ditoy daga ti ayan ti immuna a Paraiso a nagnaedan ti tao. Nalawag nga inranta ti Dios ti daga kas manayon a pagnaedan ti tattao. Kuna ti Biblia nga inaramid ti Dios ti planetatayo nga agtalinaed iti agnanayon. (Salmo 104:5) Kunana pay: “Kukua ni Jehova ti langlangit, ngem ti daga intedna iti annak ti tattao.”—Salmo 115:16.

Ditay ngarud pakasdaawan nga ikari ti Biblia nga agbalinto a Paraiso daytoy daga. Ti Dios ipaayannanto ti sangatauan iti biag nga agnanayon. Agrairanto ti panagkaykaysa ken talna. Awanton ti ut-ot ken panagsagaba. Naan-anayto metten a matagiragsak dagiti tattao ti nakaskasdaaw a buya ti nakaparsuaan.—Isaias 65:21-23.

“Ti tolda ti Dios adda iti sangatauan, . . . ket awanton ni patay, awanto metten ti panagleddaang wenno panagsangit wenno ut-ot.”Apocalipsis 21:3, 4.

Siasino ti agnaedto iti Paraiso?

TI KUNA TI TATTAO

Isursuro ti adu a relihion a dagiti laeng nasingpet a tattao ti agnaedto iti Paraiso. Ngem adu ti mariro no asino ti maibilang a “nasingpet.” Ibaga ti dadduma nga umdasen ti basta makiraman kadagiti narelihiosuan a seremonia ken ti maulit-ulit a panagkararag.

TI KUNA TI BIBLIA

Isursuro ti Biblia nga agnaedto “dagiti nalinteg” iti Paraiso. Ngem siasino dagiti ibilang ti Dios a nalinteg? Saan a dagidiay mangan-annurot kadagiti narelihiosuan a ritual a di agar-aramid iti pagayatan ti Dios. Kuna ti Biblia: “Ad-adda kadi a pakaragsakan ni Jehova dagiti daton a mapuoran ken sakripisio ngem ti panagtulnog iti timek ni Jehova? Adtoy! Ti panagtulnog nasaysayaat ngem iti sakripisio.” (1 Samuel 15:22) Iti ababa a pannao, “dagiti nalinteg” nga agnaedto nga agnanayon iti Paraiso ket isu dagidiay agtultulnog kadagiti bilin ti Dios a nailanad iti Biblia.

TI MABALINMO NGA ARAMIDEN

Saan la a ti pannakipartisipar kadagiti narelihiosuan a seremonia ti ramanen ti panagtulnog kadagiti bilin ti Dios. Iti inaldaw a konduktam, mabalin a maparagsak wenno mapaguram ti Dios. Maammuam no kasano a paragsaken ti Dios babaen iti panangadalmo a naimbag iti Biblia. Saan a narigat a paragsaken ti Dios. Kuna ti Biblia a “dagiti bilinna saanda a makapadagsen.” (1 Juan 5:3) Magagaran ti Dios a manggunggona iti panagtulnogmo babaen ti panangipaayna kenka iti pribilehio nga agnaed iti Paraiso.

“Dagiti nalinteg tagikuaendanto ti daga, ket agtaengdanto nga agnanayon iti dayta.”—Salmo 37:29.