Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Disiembre 2012

Ti Biblia—Libro ti Umiso a Padto—Paset 8

“Umay Koma ti Pagariam”

Ti Biblia—Libro ti Umiso a Padto—Paset 8

Daytoy ti maudi nga artikulo ti walo ti pasetna a serye ti “Agriingkayo!” a nangusig iti maysa a napateg nga aspeto ti Biblia—dagiti padto wenno pakpakaunana. Tulongannaka dagiti artikulo a mangsungbat kadagitoy a saludsod: Dagiti kadi padto ti Biblia ket inim-imbento laeng dagiti nalaing a tattao? Wenno paneknekan kadi dagita a ti Dios ti nangipaisurat kadagita? Awisendaka a mangusig kadagiti ebidensia.

AGARUP 2,000 a tawenen nga ikarkararag dagiti agkunkuna a Kristiano ti iyaay ti Pagarian ti Dios. Naibatay dayta iti sasao a mismo ni Jesus. Insurona dagiti adalanna nga ikararagda: “Umay koma ti pagariam. Maaramid koma ti pagayatam, kas sadi langit, kasta met iti daga.”—Mateo 6:10.

Ania ti Pagarian nga ikarkararag ti nagadu a tattao? Dayta ket nailangitan a gobierno ti Dios, a mangsukat iti amin a dadduma a gobierno. Kas nadutokan nga Ari daytoy a Pagarian, ibanag ni Jesu-Kristo ti pagayatan ti Dios idiay langit ken ditoy daga. (Daniel 2:44; 7:13, 14) Iti naikeddeng a tiempo, sungbatanto ti Dios daytoy pagtuladan a kararag babaen iti panamagpatinggana iti kinadakes ken panagsagaba ken panangisalakanna iti di mabilang a “dakkel a bunggoy” dagiti nasungdo nga agdaydayaw kenkuana. (Apocalipsis 7:9, 10, 13-17) Kalpasanna, “dagiti nalinteg tagikuaendanto ti daga, ket agtaengdanto nga agnanayon iti dayta.”—Salmo 37:29.

Mabalintayo kadi a maammuan no ania dagiti espesipiko a kasasaad a mainanamatayo iti sidong ti turay ni Kristo? Wen! Idi adda ni Jesus ditoy daga, impakitana a kayatna ken kabaelanna a solbaren dagiti problema ti sangatauan. Usigentayo ti uppat a padto ti Biblia ken kitaentayo no kasano a nangipaay ni Jesus iti panirpatan kadagiti aramidenna iti intero a lubong kas Ari iti nailangitan a Pagarian ti Dios.

 Padto 1:

“Ni Jehova . . . pagsardengenna dagiti gubat agingga iti ungto ti daga. Rungrungduenna ti bai ket putedputedenna ti pika; dagiti kareson ipuorna iti apuy.”—Salmo 46:8, 9.

Kaitungpalanna: Ti “Prinsipe ti Kappia” a ni Jesu-Kristo iyegnanto ti manayon a talna iti planetatayo. Babaen iti natalna a programa a panangisuro ken panangikkat iti amin nga armas iti intero a lubong, ti amin a tattao ket pagkaykaysaento ti Pagarian ti Dios kas maymaysa a pudno nga internasional a panagkakabsat.—Isaias 2:2-4; 9:6, 7; 11:9.

Ti ipakita ti historia:

Insuro ni Jesus kadagiti pasurotna a dida agusar iti armas. Imbes ketdi, maaddaanda iti natalna a relasion iti maysa ken maysa. Idi pinadas ti maysa kadagiti adalan ni Jesus a salakniban isuna babaen iti maysa nga armas, kinunana kenkuana: “Ipulangmo ta kampilanmo iti lugarna, ta amin dagidiay mangaramat iti kampilan mataydanto iti kampilan.” (Mateo 26:51, 52) Kinuna ni Jesus a mailasin dagiti pudno a Kristiano babaen iti panagiinnayatda.—Juan 13:34, 35.

Padto 2:

“Maaddanto ti naruay a bukbukel iti daga; iti tapaw dagiti bantay addanto ti panaglaplapusanan.”—Salmo 72:16.

Kaitungpalanna: Ti Pagarian ti Dios pagpatinggaennanto ti malnutrision, kinakirang ti taraon, ken bisin. Addanto naruay a nasustansia a taraon ti amin.

Ti ipakita ti historia:

Agminar idi ti naimpusuan nga asi ni Jesus kadagiti mabisin a tattao, ken ti nakaskasdaaw nga abilidadna nga agaramid iti milagro tapno mataraonanna ti nagadu a tattao. Sigun iti maysa a nakasaksi, ni Jesus “binilinna dagiti bunggoy nga agdalupisakda iti karuotan ket innalana ti lima a tinapay ken dua nga ikan, ket, idi timmangad sadi langit, nangisao iti pamendision ket, kalpasan a napispisina dagiti tinapay, imbunongna ida kadagiti adalan, dagiti adalan kalpasanna imbunongda kadagiti bunggoy. Gapuna nanganda amin ket napnekda, ket inurnongda dagiti tedda a pispisi, sangapulo ket dua a labba a napno. Ngem dagidiay nangan agarup lima ribuda a lallaki, malaksid dagiti babbai ken ub-ubbing.”—Mateo 14:14, 19-21.

Padto 3:

“Awanto ti agtataeng nga agkuna: ‘Masakitak.’” (Isaias 33:24) “Maluktanto ti matmata dagidiay bulsek, ket maluktanto ti mismo a laplapayag dagidiay tuleng. Iti dayta a tiempo kumalay-atto daydiay pilay a kas iti panagkalay-at ti kalakian nga ugsa, ket ti dila daydiay umel umkisto gapu iti ragsak.”—Isaias 35:5, 6.

 Kaitungpalanna: Pukawento ti Pagarian ti Dios ti amin a kita ti sakit ken pisikal a depekto. Makakitanton dagiti bulsek. Makangngeg ken makasaonto metten dagiti umel. Saanton a kasapulan ti aniaman nga agas, ospital, ken doktor.

Ti ipakita ti historia:

Idi insuro ni Jesus kadagiti tattao ti maipapan iti Pagarian ti Dios, siraragsak nga inagasanna ti amin a kita ti sakit ken depekto ti bagida. Impakita ngarud ni Jesus ti aramidennanto iti intero a daga kas Ari ti nailangitan a Pagarian ti Dios.—Lucas 7:22; 9:11.

Padto 4:

Ti Dios “pudno nga alimonennanto ni patay iti agnanayon.”—Isaias 25:8.

Kaitungpalanna: Bayat ti panagturay ni Kristo kas Ari ti Pagarian ti Dios, “dagidiay adda kadagiti pakalaglagipan a tanem” ket mapagungarto iti paraiso a daga. (Juan 5:28, 29) Parmekento ni Jesus ti naulpit a kabusortayo a ni patay tapno maaddaantayo iti biag nga agnanayon.—Salmo 37:29.

Ti ipakita ti historia:

Di kumurang a namitlo nga impakita ni Jesus ti pannakabalinna a mangpagungar iti natay. (Lucas 7:11-15; 8:41-55; Juan 11:38-44) Kalpasan ti ipapatay a mismo ni Jesus, nasurok a 500 a saksi ti nakapaneknek nga isu ket napagungaren.—1 Corinto 15:3-8.

Iti daytoy walo ti pasetna a serye dagiti artikulo, nailawlawag ti adu a padto ti Biblia a natungpalen. Paneknekan amin dagita a padto agraman ti dadduma pay a ti Biblia ket saan nga inimbento laeng dagiti nalaing a tattao. Imbes ketdi, nalawag nga impaisurat dayta ti Dios. Sigurado a “ti padto saan a naiyeg uray kaano babaen ti pagayatan ti tao, no di ket dagiti tattao nagsaoda manipud iti Dios.”—2 Pedro 1:21.

Gapu ta ti Biblia ket libro a naglaon kadagiti di agmintis a padto, makapagtalekka nga “iti apagbiit laengen a kanito, ket daydiay nadangkes awanton; ket pudno unay nga imutektekamto ti lugarna, ket isu awanton. Ngem dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.”—Salmo 37:10, 11.