Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Disiembre 2012

 Panangmatmat iti Lubong

Panangmatmat iti Lubong

“Sipud idi 2004, nagtriple ti bilang dagiti ma-search iti Google a pakairamanan ti sao a ‘porn.’”—THE ECONOMIST, BRITAIN.

“No makiasawa ti maysa a balasang [a taga-Russia], . . . agarup 60% ti posibilidad a kabilento ni lakayna, wenno agkinnabilda no agapada.”—MOSKOVSKIYE NOVOSTI, RUSSIA.

“Maysa iti kada pito a sientista wenno doktor a nakabase iti UK ti nakakita kadagiti katrabahuanda a nangigagara a nangbalbaliw wenno nangpeke iti impormasion bayat ti panagsirarakda wenno tapno maipablaak dayta.”—BRITISH MEDICAL JOURNAL, BRITAIN.

“Manipud idi 1971, uppat a daras nga immadu dagiti nakalasat iti kanser iti U.S. iti agarup 12 milion . . . Ti iyaadu dagiti nakalasat ket mabalin a gapu iti nasapsapa a pannakadayagnos babaen kadagiti pannakaeksamen, mas epektibo a pannakaagas ken napasayaat a pannaka-checkup.”—UC BERKELEY WELLNESS LETTER, U.S.A.

Sakbay la unay ti Krismas idi 2011, agarup 100 a papadi ken monghe ti agkakaribal a relihion ti naglalaban iti Church of the Nativity idiay Betlehem. “Bassit la a problema dayta a . . . mapaspasamak iti kada tawen,” kuna ti maysa a lieutenant-colonel ti polisia. “Awan ti asinoman a naaresto ta amin a naglalaban ket agserserbi iti Dios.”—REUTERS NEWS SERVICE, U.S.A.

Dakkel a Berde a Pader a Mangballasiw iti Africa

Idi 2007, inrugi ti African Union ti maysa a proyekto ti amin a nasion ti Africa a panagaramid iti berde a pader tapno malapdan ti ilalawa ti desierto. Manipud Senegal iti Laud agingga iti Djibouti iti Daya, 11 a pagilian ti agmulmula iti minilion a palakay dagiti maitutop a kita ti mulmula iti panagreggetda a mulaan ti daga a 7,600 a kilometro ti kaatiddogna ken 15 a kilometro ti kaakabana. “Dagiti imulami ket nasken a dagidiay kita a saan a paginteresan dagiti managtroso,” kinuna ni Aliou Guissé, a propesor ti plant ecology iti Cheikh Anta Diop University idiay Dakar, Senegal. Mainanama a dagiti mamulaan a lugar ket agserbinto met a protektado a kabakiran ken mangipaay iti agtultuloy a pamastrekan kadagiti lumugar.

Apay nga Agsuyaabtayo?

Di mailawlawag dagiti sientista no apay nga agsuyaab ti amin a tao ditoy daga—kaaduanna, mamin-adu iti kada aldaw. Uray dagiti sikog ket agsuyaab. Kasta met dagiti hedgehog, abestrus, uleg, ken ikan. Adu ti teoria, a masansan nga agkokontra, ngem awan ti makakombinsir iti amin a managsirarak. Ipagarup ti adu a sientista a dayta a pananglang-ab iti angin, a kadawyanna nga agpaut iti innem a segundo ket mangnayon iti suplay nga oksiheno ti utek. Ngem “agingga ita, awan pay ebidensia a nasarakan dagiti managsirarak a mangsuporta iti dayta a pagarup,” kuna ti Science News. Ipasimudaag dagiti baro a panagadal kadagiti bao a “ti panagsuyaab ket kas iti maysa a thermostat, a mangpalamiis iti nag-overheat nga utek.” Ngem awan a talaga ti makasigurado.