Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Disiembre 2012

 Agimtuod Dagiti Agtutubo

Ania ti Pudpudno a Lalaki?

Ania ti Pudpudno a Lalaki?

“Tallo laeng ti tawenko idi natay ni tatangko. No dadduma, umapalak kadagiti ubbing nga adda ama a mangpadpadakkel kadakuada. Kasla dakdakkel ti kompiansada ngem siak.”—Alex. *

“Saanak a nasinged ken ni tatangko. Siak a mismo ti nagsursuro no kasano ti agbalin a pudpudno a lalaki.”—Jonathan.

KASTA met kadi ti marikriknam? Madanaganka kadi amangan no dimo pulos masursuro ti agbalin a pudpudno a lalaki? No wen, dika agdanag!

Usigem no kasano a mapagballigiam ti dua a gagangay a problema.

PROBLEMA 1: Dagiti di umiso a pagarup ti kaaduan maipapan iti pudpudno a lalaki

Ti kuna ti dadduma:

  • Natibker ti pakinakem dagiti pudpudno a lallaki; dida agsangit.
  • Saan a padikdiktaran dagiti pudpudno a lallaki.
  • Nalalaing ti lallaki ngem ti babbai.

Ti sabali a panirigan: Ti pudpudno a lalaki ket kasungani ti ubing. Pudpudnoka a lalaki no iwakwaksimon dagiti kababalin ti maysa nga ubing. Insurat ti Kristiano nga apostol a ni Pablo: “Idi ubingak, nagsasaoak a kas ubing, nagpampanunotak a kas ubing, nagrasrasonak a kas ubing; ngem ita ta nataenganakon, inidiakon dagiti kababalin ti maysa nga ubing.” (1 Corinto 13:11) Iti sabali a pannao, no ad-adda nga iwaksim ti inuubingan a panagpampanunot, panagsasao, ken panagtigtignay ket sukatam dagita  iti nataengan a panagpampanunot, panagsasao, ken panagtigtignay, ad-adda a mapaneknekam a maysaka a pudpudno a lalaki. *

Padasem daytoy: Isuratmo iti papel dagiti sungbatmo kadagitoy a saludsod:

  1. Ania dagiti naiwaksikon a “kababalin ti maysa nga ubing”?
  2. Ania pay ti mabalinko a parang-ayen?

Maisingasing a basaen: Lucas 7:36-50. Kitaem no kasano nga impakita ni Jesus nga isu ket pudpudno a lalaki babaen ti (1) panangtakderna no ania ti umiso ken (2) siraraem a pannakilangenna iti sabsabali—agraman kadagiti babbai.

“Bilibak iti gayyemko a ni Ken. Nupay nabileg iti pisikal, napigsa ti pakinakemna, ken nasinged iti Dios, isu ket nasingpet met a tao. Nasursurok kenkuana a ti pudpudno a lalaki dina tagibassiten ti dadduma tapno laeng maitan-okna ti bagina.”—Jonathan.

PROBLEMA 2: Kinaawan ti nasayaat nga impluensia ti maysa nga ama

Ti kuna ti dadduma:

  • No dimmakkelka nga awan ni tatangmo, dimonto pulos masursuro ti agbalin a pudpudno a lalaki.
  • No saan a nasayaat ti ulidan ni tatangmo, sigurado nga agbalinkanto met a kas kenkuana.

Ti sabali a panirigan: Uray no saan unay a nasayaat ti pannakapadakkelmo, dina kaipapanan dayta a sigurado a mapaayka! Mabalinmo a pasayaaten ti kasasaadmo. (Ezequiel 18:14) Mabalinmo a suroten ti imbalakad ni Ari David iti anakna a ni Solomon: “Bumilegka ken agbalinka a malalaki.”—1 Ar-ari 2:2.

Agpayso a narigat ti dumakkel iti poder ti saan a nadungngo nga ama—wenno dumakkel nga awanan ama. “Adu ti pagdaksanna no dimo  naam-ammo ni tatangmo,” kuna ni Alex a nadakamat iti rugi. “Agtawenakon iti 25 ngem adda dagiti banag a kasla ita pay la a sursuruek a rumbeng koma a nasursurok idi tin-edyerak.” No kasta met ti marikriknam, ania ti maaramidam?

Padasem daytoy: Agbirokka iti maysa a lalaki a nasayaat a pagwadan. * Damagem kenkuana no aniada a galad ti ibilangna a nangnangruna a napateg iti maysa a pudpudno a lalaki. Kalpasanna, saludsodem no kasano a mapatanormo dagita.—Proverbio 1:5.

Maisingasing a basaen: Proverbio kapitulo 1-9. Usigem ti naamaan a balakad a makatulong iti maysa nga ubing a dumakkel a masirib ken managbuteng iti Dios.

“Maragsakanak iti irarang-ayko kas pudpudno a lalaki. Nupay inar-arapaapko a nakatulong koma ni tatangko iti irarang-ayko, kaskasdi a nasayaat ti panangmatmatko iti masakbayak. Sigurado a saanak a mapaay.”—Jonathan.

^ par. 3 Nabaliwan ti dadduma a nagan iti daytoy nga artikulo.

^ par. 24 Nasayaat a pagwadan dagiti panglakayen iti kongregasion Kristiano.

DAMAGEM KADAGITI NAGANNAKMO

Para kadakayo, ania ti makuna a pudpudno a lalaki? Iti panagkitayo, ania ti maar-aramidakon iti daytoy a banag?

Ammuem ti Ad-adu Pay

SALUDSOD DAGITI AGTUTUBO

Apay a Rumbeng a Dimo Tuladen ti Tipikal a Panangiladawan ti Media?—Paset 2: Para iti Lallaki

Agbalinka kadi a makaay-ayo kadagiti babbai no tuladem ti panangiladawan ti media kadagiti lallaki?