Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! NOBIEMBRE 2012

Ti Biblia—Libro ti Umiso a Padto—Paset 7

“Umayton ti Panungpalan”

Ti Biblia—Libro ti Umiso a Padto—Paset 7

Iti daytoy walo ti pasetna a serye, ibinsabinsa ti “Agriingkayo!” ti maysa a napateg nga aspeto ti Biblia—dagiti padto wenno pakpakaunana. Tulongannaka dagiti artikulo a mangsungbat kadagitoy a saludsod: Dagiti kadi padto ti Biblia ket inim-imbento laeng dagiti nalaing a tattao? Wenno paneknekan kadi dagita a ti Dios ti nangipaisurat kadagita? Awisendaka a mangusig kadagiti ebidensia.

MAKAPUNGTOTKA kadi no irurrurumen ken gunggundawayan dagiti dakes a gobierno dagiti umilida? Mariknam kadi ti kinaawan hustisia no dagiti babaknang ti ad-adda a pabpabaknangen dagiti dadakkel a negosio uray no agresulta dayta iti panagsagaba dagiti napanglaw? Makaungetka kadi no dagiti lider ti relihion ket kukuartaanda dagiti miembroda wenno mangisursuroda kadagiti agdadata a kinaulbod? No wen, mabalin a maragsakanka a makaammo a konkondenaren met ti Biblia dagita a dakes nga aramid. Usigen daytoy nga artikulo (1) dagiti padto ti Biblia a mangipakpakauna iti panagpatingga ti amin a kinadakes ken nadangkes a tattao ken (2) no apay a naan-anay a makapagtalektayo a pumayso dagita a padto.

Ti Panagpatingga ti Kinadakes

Iti napalabas nga artikulo daytoy a serye, nausig ti inted ni Jesus a pagilasinan a buklen ti adu a paset a mangipakita nga asidegen ti panungpalan ti agdama a lubong. Karaman iti dayta a pagilasinan ti sangalubongan a pannakaiwaragawag ti naimbag a damag ti Pagarian ti Dios—ti gobierno ti Dios a dandanin mangituray iti intero a daga. (Daniel 2:44; Mateo 24:3, 14) No malpasen dayta a panangiwaragawag a trabaho, “umayton ti panungpalan,” kinuna ni Jesus. Mabalin a masdaawka a makaammo a ti umuna a pukawento ti Dios ket ti palso a relihion, a di mangisursuro iti kinapudno maipapan Kenkuana. Ti palso a relihion ket inladawan ti Biblia kas maysa a balangkantis a naawagan iti “Babilonia a Dakkel.”—Apocalipsis 17:1, 5; kitaem ti kahon  a  “No Ania ti Babilonia a Dakkel,” iti daytoy a panid.

Padto 1:

“Dumtengto dagiti saplit [ti Babilonia a Dakkel], ipapatay ken leddaang ken nakaro a bisin, ket isu mapuoranto a naan-anay iti apuy, agsipud ta ni Jehova a Dios, a nangukom kenkuana, napigsa.”—Apocalipsis 18:2, 8.

Kaitungpalanna: Ipalgak ti Biblia nga iti naituding a tiempona, tignayento ti Dios dagiti napolitikaan a pannakabalin ti lubong a mangbusor ken mangdadael iti Babilonia a Dakkel. “Pagbalinendanto a walangwalang ken lamolamo” ken “lamutendanto dagiti nalasag a pasetna.” (Apocalipsis 17:16) Iti sabali a pannao, ibutaktakdanto ti nakababain a kinasiasinona ken samsamenda ti aglaplapusanan a kinabaknangna. Nagbiit ken naan-anay unay ti pannakadadaelnanto ket awanto pulos ti mabati uray maysa a tugotna.—Apocalipsis 18:21.

Mabalin nga ipagarup dagiti napolitikaan nga agtuturay nga inaramidda dayta iti bukodda a nakem. Ngem pasingkedan ti kaitungpalan daytoy a nakaskasdaaw a padto a gapuanan ti Dios ti makapaamanga a panagpatingga ti Babilonia. Ti Dios ‘ikabilna dayta kadagiti pusoda’ tapno ‘itungpalda ti panunotna.’—Apocalipsis 17:17.

Padto 2:

“Iti kaaldawan dagidiay nga ar-ari mangipasdekto ti Dios ti langit iti maysa a pagarian. . . . Rumekennanto ken pagpatinggaenna amin dagitoy a pagarian [nga inaramid ti tao], ket dayta agtalinaedto agingga kadagiti tiempo a di nakedngan.”—Daniel 2:44.

Kaitungpalanna: No ti palso a relihion ket nalpasen a dinadael ti Dios, iturongnan ti atensionna iti dadduma pay nga organisasion—napolitikaan ken nakomersialan—agraman nadangkes a tattao. (Proverbio 2:22; Apocalipsis 19:17, 18) Kas iti agpapaabang a mangpapanaw kadagiti dakes nga agab-abang, ti Dios ‘dadaelennanto dagidiay mangdaddadael iti daga.’ Ikisapnanto dagiti  naranggas ken imoral.—Apocalipsis 11:18; Roma 1:18, 26-29.

Siasinonto dagiti makalasat? Sumungbat ti Biblia: “Dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.”—Salmo 37:11; 72:7.

Makapagtalektayo kadi kadagiti padto ti Biblia? Masiguradotayo kadi a ti Dios gibusannanto ti kinadakes ken panagsagaba ken isalakanna dagiti nalinteg? Wen!

Mapagtalkan Dagiti Padto ti Biblia

Ti Pagarian ti Dios pukawennanto ti amin a palso a relihion, ti dakes a gobierno, ken ti naagum a komersio

Patien dagiti Saksi ni Jehova a ti Autor ti Biblia ket ni Jehova a Dios ken tungpalenna ti amin nga inkarina. (2 Timoteo 3:16) Nainkalintegan kadi dayta a panamati?

No adda nabayagen a gayyemmo a talaga a mangipatpateg unay kenka ken di pay pulos nagulbod kenka, mamatika kadi no ikarina nga addanto aramidenna a naimbag kenka ken no kabaelanna met a tungpalen dayta nga inkarina? Sigurado a mamatika. Adayo a nasaysayaat ti Dios ngem iti asinoman a tao a gayyemtayo. ‘Ti Dios saanna a mabalin ti agulbod’!—Tito 1:2.

Wen, ti Namarsua talaga a pukawennanto ti palso a relihion, ti manangirurumen a turay, ken ti naagum a lubong ti komersio. Kayatmo kadi a maammuan ti ad-adu pay maipapan iti mapasamak kalpasan dagita? Makatulong kenka ti sumaganad a ruar ti Agriingkayo! a pakabasaam iti maudi nga artikulo daytoy a serye.