Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! NOBIEMBRE 2012

Panangmatmat iti Lubong

Panangmatmat iti Lubong

Idiay Germany, agarup 33% kadagiti nayanak idi 2010 ti bastardo, idinto ta 15% laeng idi 1993.—ÄRZTE ZEITUNG ken THE LOCAL, GERMANY.

Sigun iti sensus idi 2010, 69.4% kadagiti ubbing iti United States ti kabbalay ti ama ken inada, 23.1% ti inada laeng ti kabbalayda, 3.4% ti amada laeng ti kabbalayda, ken 4.1% ti awan kabbalayda a nagannakda.—U.S. CENSUS BUREAU, U.S.A.

Natantiar a $380 bilion (U.S.) ti pukaw iti sangalubongan nga ekonomia idi 2011 gapu kadagiti natural a didigra. Ti ginggined idiay Japan ti “kanginaan pay laeng a didigra iti intero a pakasaritaan, a nangpukaw iti $210 bilion—malaksid pay iti pannakadadael ti planta nuklear iti Fukushima.”—NEW SCIENTIST, BRITAIN.

Ti keso ti masansan unay a mataktakaw a tagilako a makan iti intero a lubong. Nasurok a 3% kadagiti mailako a suplay iti lubong ti mapukpukaw kada tawen. Ti kangrunaan a makagapu ket dagiti agtatakaw iti tagilako ken mannanakaw nga empleado.—CENTRE FOR RETAIL RESEARCH, BRITAIN.

Dagiti Peggad ti “Heading” iti Soccer

Paset iti ay-ayam a soccer ti “heading” wenno ti panangusar iti ulo a mangtama iti bola. Nupay kasta, dagiti nabiit pay a panagadal a nagusar kadagiti high-tech a pageksamen ken eksaminasion a mangammo iti abilidad ti isip ipakitada a peligroso ti maulit-ulit a panangusar iti ulo a mangtama iti bola iti soccer. Sigun kadagiti managsirarak iti Albert Einstein College of Medicine iti New York, U.S.A., “dumakkel ti posibilidad a madangran ti utek ken maapektaran ti isip” gapu iti dayta. Adda nadetekda a depekto iti utek dagiti sagpaminsan nga agay-ayam a mangusar iti uloda a mangtama iti bola iti nasursurok ngem 1,000 agingga iti 1,500 a daras iti kada tawen. Dayta ket “sumagmamano la a daras iti kada aldaw para iti regular a player.”

Hybrid a Lugan—Napegpeggad Kadagiti Magmagna

“Dagiti grupo a mangiruprupir iti kalintegan ket maseknan iti kinatalged dagiti magmagna iti kalsada gapu kadagiti HEV [hybrid electric vehicle],” kuna ti maysa a report ti Department of Transportation (DOT) ti U.S. “Maseknanda ta kasla naul-ulimek dagiti HEV ken mabalin nga awan ti ungor dagita a pagpannurayan dagiti magmagna ken nakabisikleta kas pakdaar nga adda lugan nga umas-asideg kadakuada iti kalsada wenno krosing.” Kinapudnona, no idilig iti gagangay a lugan, “ti HEV ket dua a daras a dakdakkel ti posibilidadna a makadungpar kadagiti magmagna” bayat a maimanmaniobra, kuna ti report. Gapu iti dayta, insingasing ti National Highway Traffic Safety Administration a no nabuntog ti taray dagiti HEV, masapul nga adda mangngeg nga ungorda.