Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! NOBIEMBRE 2012

Maysa a Pamay-an Tapno Maawatantayo ti Biblia

Maysa a Pamay-an Tapno Maawatantayo ti Biblia

“Kasanom nga ammo nga umiso ti interpretasionmo iti Biblia? Mabalin nga ilawlawag dayta iti nagduduma a pamay-an!”

Adda kadin nangibaga kenka iti kasta? Ngem ammom kadi a posible a maawatam ti Biblia babaen iti mismo a linaonna? Kasano? Dagiti bersikulo nga adda iti aglawlaw ket makatulong tapno maawatam ti kaipapanan ti maysa a partikular a bersikulo. Ngem no saan latta a nalawag, daytoy ti mabalinmo nga aramiden: Idiligmo dayta iti dadduma pay a paset ti Biblia maipapan iti isu met la a suheto. Iti kasta, ipalpalubostayo a ti Biblia ti mangigiya iti panunottayo, saan a ti personal a panirigantayo.

Alaentay a pagarigan ti pannursuro ti Biblia maipapan iti kasasaad dagiti natay. Adtoy ti innem a teksto a naadaw iti nadumaduma a paset ti Biblia. Paliiwem no kasano ti panagtutunosda.

  • “Dagiti natay dida idaydayaw ni Jehova, ken siasinoman a bumaba iti ulimec.”Salmo 115:17. *
  • ‘Dica agcammatalec cadagiti principe, ken iti anac ti tao, a kencuana awan ti tulong. Ti angesna agpucaw, isu agpulang iti dagana; iti dayta met la nga aldaw dagiti pampanunotna mapucawda.’Salmo 146:3, 4.
  • “Dagiti sibibiag ammoda a mataydanto: ngem dagiti natay dida ammo ti aniaman.”Eclesiastes 9:5.
  • “Ni Tanem dinaca mabalin a dayawen, ni patay dinaca rambacan . . . Ti sibibiag, ti sibibiag, dayawennacanto, cas aramidec ita nga aldaw.”Isaias 38:18, 19.
  • “Ti cararua nga agbasol matayto.”Ezequiel 18:4.
  • Kinuna ni Jesu-Kristo maipapan iti nabiit pay idi nga ipapatay ni gayyemna a Lazaro: “Ni Lazaro a gayyemtayo matmaturog; ngem innac tapno riingec iti turogna. Kinuna ngarud dagiti adalan kencuana: Apo, no matmaturog, umimbagto. . . . Idin kinuna ngarud ni Jesus a silalawag cadacuada: Ni Lazaro natay.”Juan 11:11-14.

Nakitam kadi ti panagtutunos dagita a bersikulo? Kinapudnona, saan a kas iti patpatien ti adu a tattao, isursuro ti Biblia a dagiti natay ket talaga a natayen. Saanda a sibibiag idiay langit wenno iti dadduma pay a lugar. Kayariganda ti tao a nargaan ti turogna, a dina mapupuotan ti mapaspasamak iti aglawlawna. Gapuna, dida maidaydayaw ti Dios wenno makapagpanunot man laeng koma. *

Daytoy ti kangrunaan a punto: No tunggal suheto ti panangsukimattayo iti Biblia, agbalin a nalawag dagiti kangrunaan a pannursurona. Siempre, dayta a pamay-an, nga us-usaren dagiti Saksi ni Jehova, ket agkasapulan iti panagregget. (Proverbio 2:1-5) Ngem kasapulan dayta iti kaaduan a banag a talaga a makagunggona.

^ par. 5 Dagiti teksto ket nakotar iti Ti Biblia (PBS).

^ par. 11 Isursuro ti Biblia a dagiti natay nga adda iti lagip ti Dios ket ‘mariing’ wenno mapagungarto iti tiempo nga intuding ti Dios.—Kitaem ti Job 14:14, 15; Juan 5:28, 29; Aramid 24:15.