Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Nobiembre 2012

Mangaramidka Kadagiti Nalawag a Limitasion

Mangaramidka Kadagiti Nalawag a Limitasion

Agbalinka a natibker ken tungpalem ti saom

“Saan a nalaka ti agsolsolo a mangpadakkel iti annak—nangruna no tin-edyerdan ken mariknadan ti impluensia ti lubong nga agrebeldeda kadagiti nagannakda.”—DULCE, SOUTH AFRICA.

Ti karit.

Impadto ti Biblia a kadagiti “maudi nga aldaw,” kaaduan nga annak ket “nasukir kadagiti nagannak.”—2 Timoteo 3:1, 2.

Singasing.

“Nasken nga ammo ti annakmo no ania dagiti urnos ken namnamaem kadakuada.” (The Single Parent Resource, ni Brook Noel) Kuna ni Barry G. Ginsberg a maysa a child and family psychologist: “No nalawag dagiti limitasion, nasaysayaat ken saan unay a makapa-stress dagiti relasion.” Innayonna: “No mas espesipiko dagiti aramidentayo a limitasion, ken nalawlawag ti pannakaibaga dagita, nalaklaka a pagtalinaeden a naragsak ti pamilia.” Kasanoka a makaaramid kadagiti nalawag a limitasion?

Agbalinka a natibker ken tungpalem ti saom. (Mateo 5:37) Sigun iti maysa a panagadal idiay Australia, masansan a natangken ti ulo ti annak no di makapagkedked dagiti nagannak ken no kanayonda a pagustuan ti annakda. Kuna ti Biblia: “Ti ubing a mabaybay-an ibabainnanto ni inana.”—Proverbio 29:15.

Dika agbalin a konsintidor gapu ta makonsiensiaka iti kasasaadmo kas agsolsolo a nagannak. Kuna ti nadakamaten a ni Yasmin: “No dadduma, maasianak iti dua nga annakko gapu ta maymaysa ti nagannakda a mangpadpadakkel kadakuada.” Nupay gagangay dayta a riknana, dina impalubos a dayta ti mangapektar iti kinasimbeng ti panunotna kas maammuantayo iti sumaganad a parapo.

Sustinerem ti saom. “Mabalin a napateg ti panangdisiplina wenno nalabit panangdusa iti annak gapu iti di umiso nga inaramidda tapno maliklikan dagiti problema a mainaig iti kababalin ken emosion ti annak,” kuna ti American Journal of Orthopsychiatry. Imbaga ni Yasmin: “Pagsasaritaanmi nga agiina ti maipapan iti disiplina. No nakaaramidda iti di umiso, ikagumaak a sustineren ti saok. Nupay kasta, nasursurok ti dumngeg nga umuna ken siaalumamay nga ilawlawagko no kasano a nakaapektar iti pamilia ti inaramidda. Kalpasanna, ipatungpalkon ti imbagak a disiplina.”

Agbalinka a nainkalintegan; dika mangdisiplina no sipupungtotka. Nupay nasken nga itakderam ti umiso, masapul met nga agbalinka a nainkalintegan no kasapulan. “Ti sirib manipud ngato”—kayatna a sawen, manipud iti Dios—ket “nainkalintegan,” kuna ti Santiago 3:17. Ti nainkalintegan a tao ket saan nga agtignay a sidadarasudos, makapungtot a dagus, wenno estrikto unay. Imbes ketdi, agpanunot nga umuna, nalabit agkararag pay ketdi isu a makapagtignay iti natantanang ken umiso a pamay-an.

Ti panangsustiner iti sao, kinatibker, ken kinanainkalintegan—agraman ti nasayaat nga ulidanmo—ti makatulong kenka a mangaramid kadagiti limitasion tapno agbalin ti pagtaengam a pudno a pagkamangan dagiti annakmo.